ដោយសារតែបញ្ហាការចាក់ថ្នាំពង្រីកលិង្គ ជារឿងធម្មតារបស់ប្រុសៗថៃ អាជ្ញាធរសុខាភិបាល បានប្រកាសព្រមានថា ការចាក់ថ្នាំពង្រីកលិង្គដោយគ្មានការអនុញ្ញាត អាចបណ្ដាលឲ្យឆ្លងមេរោគធ្ងន់ធ្ងរ និងកើតមហារីក។

វេជ្ជបណ្ឌិត Arkhom Praditsuwan អគ្គនាយកគាំទ្រសេវាកម្មសុខាភិបាល បញ្ជាក់ថា វាជារឿងសាមញ្ញរបស់ប្រុសៗថៃ ក្នុងការចាក់ថ្នាំពង្រីកលិង្គ ដោយរំពឹងថា អាចធ្វើឲ្យស្រីៗពេញចិត្ត ទោះបីជានាយកដ្ឋានគាំទ្រសេវាកម្មសុខាភិបាល បានប្រកាសព្រមានជាបន្ដបន្ទាប់ពីហានិភ័យក៏ដោយ។

មន្រ្តីសុខាភិបាលថៃរូបនេះ បន្ដថា គ្លីនិកគ្មានច្បាប់មួយចំនួន បានប្រើសារធាតុដែលមិនត្រូវបានអនុញ្ញាតដោយវេជ្ជបណ្ឌិត ដូចជា ប្រេងអូលីវ បន្លែ និងស៊ីលីកូនកម្រិតឧស្សាកម្ម ចាក់បញ្ចូលទៅក្នុងលិង្គ។ លោកថា ការចាក់បញ្ចូលសារធាតុទាំងនេះ មិនអាចពង្រីកទំហំទេ ប៉ុន្ដែអាចបណ្ដាលឲ្យឆ្លងមេរោគ ហើម និងលែងរឹង ហើយជាលទ្ធផល ធ្វើឲ្យពិបាកទាំងនោម ទាំងរួមភេទ។

ជាងនេះទៅទៀត អ្នកដែលចាក់សារធាតុទាំងនេះ ប្រឈមនឹងការឆ្លងមេរោគអេដស៍ និងថ្លើម ប្រសិនឧបករណ៍ មានមេរោគ ហើយបើធ្ងន់ធ្ងរ អាចឈានដល់ការកាត់អវៈយវៈភេទ និងកើតមហារីក។

អត្ថបទពាក់ព័ន្ធ៖ កាត់ស្បែកចុងលិង្គ មានគុណប្រយោជន៍ និងគ្រោះថ្នាក់ម៉េចខ្លះ?

វេជ្ជបណ្ឌិត Arkhom Praditsuwan បន្ថែមថា អ្នកផ្ដល់សេវាការចាក់ថ្នាំពង្រីកលិង្គដោយគ្មានច្បាប់អនុញ្ញាត ប្រឈមនឹងការជាប់ពន្ធនាគាររហូតដល់ ៣ឆ្នាំ និងពិន័យជាប្រាក់ ប្រមាណ ១ពាន់ដុល្លារ លើករណីរំលោភច្បាប់ស្ដីពីវិជ្ជាជីវៈវេជ្ជសាស្ត្រ។ ហើយប្រសិនបើមានការបើកគ្លីនិកគ្មានច្បាប់អនុញ្ញាតវិញ នឹងប្រឈមការជាប់ពន្ធនាគាររហូតដល់ ៥ឆ្នាំ ហើយពិន័យជាប្រាក់ ប្រមាណ ៣ពាន់ដុល្លារ។

ក្នុងករណីមានសំណួរ ឬមន្ទិលសង្ស័យជុំវិញបញ្ហាសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ថៃ ព្រមានថាប្រយ័ត្នកាត់ចោល រឿងចង់ធំហើយចាក់ថ្នាំពង្រីកលិង្គ