មេរោគកម្រ Brain Eating Amoeba បានឆក់យកជីវិតពលរដ្ឋអាមេរិកម្នាក់ នៅរដ្ឋ North Carolina ក្រោយបុគ្គលដែលមិនត្រូវបានបញ្ចេញអត្តសញ្ញាណរូបនេះ បានហែលទឹកនៅក្នុងឧទ្យាន ១កន្លែង នៅក្នុងរដ្ឋ North Carolina។

ពលរដ្ឋអាមេរិករូបនេះ បានធ្លាក់ខ្លួនឈឺនៅថ្ងៃទី១២ ខែកក្កដា ២០១៩ ក្រោយបានហែលទឹកនៅឧទ្យាន Fantasy Lake Water Park ក្នុងតំបន់ជនបទ Cumberland County។ ក្រោយការពិនិត្យ មជ្ឈមណ្ឌលគ្រប់គ្រង និងបង្ការជំងឺអាមេរិក (CDC) បញ្ជាក់ថា ជំងឺរបស់ពលរដ្ឋអាមេរិកម្នាក់នេះ បណ្ដាលមកពីមេរោគ Brain Eating Amoeba មានឈ្មោះថា Naegleria fowleri ភាគច្រើន ប្រទះឃើញក្នុងទឹកធម្មជាតិ ដែលក្តៅឧណ្ហៗ។

មជ្ឈមណ្ឌលដដែលបន្ថែមថា មេរោគ Naegleria fowleri មិនបណ្ដាលឲ្យឈឺទេ បើលេបចូលតាមមាត់ ប៉ុន្ដែបើចូលតាមច្រមុះវិញ វាអាចបង្កគ្រោះថ្នាក់ធ្ងន់ធ្ងរ។ មេរោគនេះ ឆ្លងទៅមនុស្ស ក្រោយវាស្ថិតនៅក្នុងទឹកមានសីតុណ្ហភាពក្តៅជាយូរ និងក្រោយមក សីតុណ្ហភាពទឹក ធ្លាក់ចុះវិញ។ រោគសញ្ញានៃជំងឺនេះ មានដូចជា ឈឺក្បាលខ្លាំង អាចឈានដល់សន្លប់ក៏មាន។

ពេលនេះ មន្ត្រីសុខាភិបាលអាមេរិក កំពុងធ្វើការដោះស្រាយបញ្ហាទឹកបឹង នៅឧទ្យាន Fantasy Lake Water Park ដើម្បីការពារអ្នកហែលទឹកផ្សេងទៀត កុំឲ្យឆ្លងមេរោគ Naegleria fowleri។ គិតចាប់ពីឆ្នាំ១៩៦២-២០១៨ ពលរដ្ឋអាមេរិក ចំនួន ១៤៥នាក់ បានឆ្លងមេរោគ Naegleria fowleri។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

មេរោគកម្រមួយក្នុងទឹក ឆក់យកជីវិតអ្នកហែលទឹកម្នាក់