ជំងឺគ្រុនឈាម បានរាលដាលយ៉ាងខ្លាំង ក្នុងតំបន់អាស៊ាន នៅឆ្នាំ២០១៩នេះ ដោយប្រទេសហ្វីលីពីន បានរងគ្រោះខ្លាំងជាងគេ បន្ទាប់ពីថៃ វៀតណាម និងខ្មែរយើង។

គិតចាប់តាំងពីដើមឆ្នាំមក អ្នកស្លាប់ដោយជំងឺគ្រុនឈាម នៅក្នុងប្រទេសហ្វីលីពីន បានកើនឡើងរហូតដល់ ៦២២នាក់ ហើយអាជ្ញាធរប្រទេសនេះ បានប្រកាសអាសន្នពីជំងឺគ្រុនឈាមតាំងពីខែកក្កដា មកម្ល៉េះ។ នេះបើតាមក្រសួងសុខាភិបាលហ្វីលីពីន។

ចំណែកអ្នកកើតជំងឺគ្រុនឈាម គិតត្រឹមថ្ងៃទី២០ ខែកក្កដា ២០១៩ មានចំនួនប្រមាណ ១៤៦.០០០នាក់ កើនឡើង ៩៨% បើធៀបនឹងរយៈពេលដូចគ្នា នៅឆ្នាំ ២០១៨។

លោក Francisco Duque រដ្ឋមន្រ្តីក្រសួងសុខាភិបាលហ្វីលីពីន បានបញ្ជាក់ក្នុងសន្និសីទកាសែត កាលពីថ្ងៃទី៧ ខែសីហា ២០១៩ ថា តាមទិន្នន័យ ជំងឺគ្រុនឈាម មានប្រមាណ ៥.១០០ ករណី/សប្ដាហ៍ ហើយនេះជាតួលេខខ្ពស់បំផុត។

អត្ថបទពាក់ព័ន្ធ៖ ហ្វីលីពីនកំពុងសម្រេចចិត្តប្រើវ៉ាក់សាំងគ្រុនឈាមចាស់ ទោះបីត្រូវប្រឈមរឿងអាស្រូវ

ដើម្បីបំបាត់ជំងឺគ្រុនឈាម ចាប់តាំងពីខែកក្កដាមក អាជ្ញាធរសុខាភិបាលហ្វីលីពីន បានពង្រាយពេទ្យរាប់រយនាក់ ទៅតាមមន្ទីរពេទ្យខេត្ត និងស្រុក និងផ្ដល់ជំនួយបន្ទាន់ ទៅកាន់តំបន់មានការផ្ទុះជំងឺគ្រុនឈាម។

ជាងនេះទៅទៀត ហ្វីលីពីន កំពុងពិចារណាយកវ៉ាក់សាំងចាស់ (Dengvaxia) មកប្រើប្រាស់ឡើងវិញផងដែរ។ វ៉ាក់សាំងនេះ ផលិតដោយក្រុមហ៊ុនបារាំង ហើយត្រូវសង្ស័យថា បង្កឲ្យក្មេង ៤នាក់ ឈឺរហូតដល់បាត់បង់ជីវិត កាលពីឆ្នាំ២០១៧។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

តួលេខខ្ពស់ជាងគេ អ្នកស្លាប់ដោយជំងឺគ្រុនឈាមនៅហ្វីលីពីន កើនលើស ៦០០នាក់