ការដុត អាចបញ្ជាក់អាល់កុលនោះ ជាប្រភេទអេតាណុល ឬមេតាណុលទេ?

ក្រោយវីរុស COVID-19 រាតត្បាតនៅកម្ពុជាហើយនោះ មិនថាទឹកលាងដៃ ជេល ឬអាល់កុលឡើយសុទ្ធតែឡើងថ្លៃទាំងអស់។ តែអ្វីដែលធ្វើឲ្យយើងកាន់តែព្រួយបារម្ភនោះ គឺការលក់អាល់កុលមេតាណុលខ្ពស់ បានក្លែងបន្លំជាអាល់កុលអេតាណុល ដែលអាចប៉ះពាល់ចំពោះសុខភាពខ្លាំងណាស់។

កន្លងមកក៏ធ្លាប់មានការបង្ហាញពីរបៀបមើលអាល់កុលអេតាណុល (អាល់កុលពេទ្យ) និងមេតាណុល ដែលអាចមើលដឹងតាមរយៈការដុត បើភ្លើងពណ៌ក្រហម គឺអាល់កុលអេតាណុល តែបើភ្លើងខៀវជាមេតាណុល។ ឱសថការី គីម កាណែល បានឲ្យដឹង នោះមិនមែនជារឿងពិតឡើយ ការបែងចែកអាល់កុលអេតាណុល និងមេតាណុល មើលដឹងតាមរយៈមន្ទីរពិសោធន៍តែប៉ុណ្ណោះ ក្រៅពីនោះគឺមិនអាចដឹងឡើយ ទោះតាមរយៈការហិតក៏ដោយ។

លោកបន្តថា នៅក្នុងមន្ទីរពិសោធន៍គេប្រើឧបករណ៍ពិសោធន៍មួយចំនួនដើម្បីអាចបញ្ជាក់ថាសូលុយស្យុងដែលប្រើគឺជាអាល់កុលអេតាណុលពិតឬមិនពិត ឧទាហរណ៍ដូចជាឧបករណ៍ HPLC (High performance Liquid Chromatography) ដែលមានសមត្ថភាពអាច វិភាគដឹងក្នុងសូលុយស្យុងមានកម្រិតភាគរយរបស់អេតាណុល និងមេតាណុលបាន។ អាល់កុលអេតាណុល អាចប្រើប្រាស់ក្នុងវិស័យវេជ្ជសាស្ត្រ និងយកមកលាងដៃ លាងសម្អាត សម្លាប់មេរោគបាន តែសម្រាប់មេតាណុលវិញ គឺមានតែប្រើប្រាស់ក្នុងមន្ទីរពិសោធន៍តែប៉ុណ្ណោះ ហើយយើងមិនអាចយកមកប្រើប្រាស់ក្នុងជីវភាពប្រចាំថ្ងៃបានឡើយ ព្រោះវាបង្កគ្រោះថ្នាក់ចំពោះសុខភាពអ្នកប្រើ ដោយធ្វើឲ្យពុលឈានដល់ងងឹតភ្នែកជារៀងរហូត និងអាចបង្កគ្រោះថ្នាក់ដល់ជីវិតទៀតផងបើសិនជាមិនបានសង្គ្រោះទាន់ពេលវេលា។

ដើម្បីទទួលបានអាល់កុលអេតាណុលត្រឹមត្រូវ ឱសថការីខាងលើណែនាំឲ្យទៅទិញអាល់កុលពីឱសថស្ថានស្របច្បាប់ ដែលមានលក់និងគ្រប់គ្រងដោយឱសថការី ឬសួររកប្រភពអាល់កុល និងអាចស្នើសុំមើលវិញាបនបត្រត្រួតពិនិត្យរបស់ផលិតផល។

អត្ថបទពាក់ព័ន្ធ៖

អ្នកប៉ះពាល់ដោយប្រយោលជាមួយជនជាតិជប៉ុនទាំង៤០នាក់ នឹងធ្វើតេស្ត COVID-19
រដ្ឋាភិបាលបញ្ជាឲ្យបិទសាលានៅក្រុងសៀមរាប ក្រោយរកឃើញអ្នកផ្ទុកវីរុស COVID-19
ដឹងលទ្ធផលតេស្ត COVID-19 លើភរិយានិងប្អូនថ្លៃ បុរសវ័យ៣៨ឆ្នាំនៅសៀមរាប
អាប់ដេត ពីស្ថានភាពសុខភាពបុរសខ្មែរ វ័យ៣៨ឆ្នាំ មានផ្ទុកវីរុស COVID-19
ហេតុអីពាក់ម៉ាសតែមួយមុខ មិនអាចការពារវីរុស COVID-19 បាន?
ដំបូន្មានល្អៗ ជុំវិញវិធីបង្ការកូនពីវីរុស COVID-19

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕