មនុស្សមួយចំនួនតែងប្រឈមនឹងបញ្ហាផ្លាស់ប្ដូរអារម្មណ៍លឿនមែនទែន មួយនាទីសប្បាយ មួយនាទីទៀតទៅជាពិបាកចិត្ត ស្រពោនអារម្មណ៍បានមួយរំពេច។ បើតាមក្បួនពេទ្យជំនាញ ទាំងនេះមិនមែនជាសញ្ញាធម្មតាទេ វាអាចសញ្ញានៃជំងឺផ្លូវចិត្ត។

លោកវេជ្ជបណ្ឌិត យឹម សុបុត្រា ជំនាញផ្នែកវិកលវិទ្យា បានបកស្រាយឲ្យដឹងថា នៅពេលដែលនិយាយទាក់ទងនឹងជំងឺផ្លូវចិត្ត ឬពាក្យបច្ចេកទេសគេហៅថា Mental Disorder វាក៏មានទាក់ទងនឹងអារម្មណ៍ដែរ។“កាលណាដែលបុគ្គលមានបញ្ហាផ្លូវចិត្ត ដាច់ខាតគឺមានអាការៈបែបនេះ ជួនសប្បាយ ជួនយំ ជួយភ័យ ព្រួយអ៊ីហ្នឹង”។

លើសពីនេះ គ្រូពេទ្យឯកទេសវិកលវិទ្យារូបនេះបានពន្យល់ថា ឲ្យតែមានបញ្ហាផ្លូវចិត្ត មិនមែនមានតែការផ្លាស់ប្ដូរអារម្មណ៍ទេ នៅមានចង្កោមសញ្ញាមួយចំនួនដែលរួមផ្សំទៀតដូចជា៖

– គេងមិនលក់

– អស់កម្លាំង ល្វើយៗ

– គិតច្រើន ស្រ្តេស

– វង្វេងវង្វាន់។ ពេលខ្លះ វាអាចធ្វើឲ្យយើងទៅជាឈឺក្រពះ ឈឺក្បាល ឈឺខ្នង ឬឈឺចុកចាប់កន្លែងណាមួយដោយមិនដឹងមូលហេតុ។

កត្តាដែលបណ្ដាលឲ្យមនុស្សសព្វថ្ងៃនេះ ប្រឈមនឹងអាការៈបែបនេះច្រើន គឺអាស្រ័យទៅលើវិបត្តិគ្រួសារ វិបត្តិសេដ្ឋកិច្ច ឬបរាជ័យនៅក្នុងកិច្ចការអ្វីមួយ។ ក្នុងករណីធ្ងន់ធ្ងរ អ្នកជំងឺអាចមានគំនិតមិនល្អ គិតចង់ធ្វើបាបខ្លួនឯង ឬគិតចង់សម្លាប់ខ្លួនក៏ថាបាន។

មានអាការៈឆាប់ផ្លាស់ប្ដូរអារម្មណ៍ អាចជាសញ្ញាជំងឺផ្លូវចិត្ត