ស្វែងយល់ពីការប្រើប្រាស់
១- ផ្សិតឆាហ្គាជួយអីខ្លះដល់រាងកាយ?
ផ្សិតឆាហ្គា (Chaga) ជាផ្សិតមួយប្រភេទអាចផលិតសារធាតុមួយ Conk គេយកវាមកផលិតជាឱសថ។ គេប្រើផ្សិតឆាហ្កា (Chaga) ឱសថសម្រាប់លេបព្យាបាលជំងឺបេះដូង ទឹកនោមផ្អែម មហារីកក្រពះ និងពោះវៀន ជំងឺថ្លើម សម្លាប់ប៉ារ៉ាស៊ីត ឈឺក្រពះ និងជំងឺរបេង។
២- វាដំណើរការម៉េច?
រហូតមកដល់ពេលនេះ នៅមិនទាន់មានការសិក្សាអាចបញ្ជាក់ពីដំណើរការរបស់ផ្សិតនេះនៅឡើយទេ។ ដូចនេះអាចសួរគ្រូពេទ្យ ឬពេទ្យឱសថបូរាណសម្រាប់ព័ត៌មានបន្ថែម។ ប៉ុន្តែទោះជាយ៉ាងណាក្តី គេជឿថា ផ្សិតឆាហ្គា (Chaga) អាចជួយភ្ញោចប្រព័ន្ធការពារ ខណៈសារធាតុគីមីមានក្នុងផ្សិតនេះ ដើរតួរជាអ្នកប្រឆាំងអុកស៊ីដកម្មផងដែរ។ ផ្សិតឆាហ្គា អាចជួយបញ្ចុះជាតិស្ករ និងជាតិខ្លាញ់ក្នុងឈាមថែមទៀតផង។
កត្តាគួរប្រុងប្រយ័ត្ន
៣– មុនប្រើគួរដឹងអីខ្លះ?
គួរពិភាក្សាជាមួយគ្រូពេទ្យ ឱសថការី ឬគ្រូពេទ្យឱសថបុរាណបើមានបញ្ហាដូចជា៖
– កំពុងមានផ្ទៃពោះ ឬបំបៅដោះកូន ព្រោះអំឡុងពេលមានផ្ទៃពោះ ឬបំបៅដោះកូន យើងត្រូវប្រើប្រាស់ថ្នាំឲ្យត្រូវតាមកម្រិតណែនាំរបស់គ្រូពេទ្យតែប៉ុណ្ណោះ។
– បើកំពុងប្រើប្រាស់ថ្នាំអ្វីផ្សេង រាប់បញ្ចូលទាំងថ្នាំអ្នកទិញខ្លួន និងថ្នាំទិញតាមវេជ្ជបញ្ជា ត្រូវប្រាប់គ្រូពេទ្យជាមុន
– មានប្រតិកម្មជាមួយផ្សិតឆាហ្គា (Chaga) ឬថ្នាំពេទ្យ និងឱសថបុរាណដទៃ
– កំពុងមានជំងឺប្រចាំកាយ ឬមានបញ្ហាសុខភាពណាមួយ
– ធ្លាប់មានប្រតិកម្មជាមួយអាហារ សារធាតុពណ៌ សារធាតុរក្សាគុណភាពអាហារ ឬជាមួយសត្វ។
លក្ខខណ្ឌចុះបញ្ជីការផ្លូវច្បាប់លើឱសថបុរាណ មិនតឹងរ៉ឹងដូចការចុះបញ្ជីការផ្លូវច្បាប់លើថ្នាំពេទ្យទេ។ ដូចនេះគេត្រូវការ សិក្សាបន្ថែមដើម្បីដឹងពីសុវត្ថិភាពប្រើប្រាស់ឱសថបុរាណ។ គុណសម្បត្តិនៃការប្រើឱសថនេះ ត្រូវច្រើនជាងផលប៉ះពាល់មុនពេលប្រើវា។ សូមពិគ្រោះជាមួយអ្នកជំនាញខាងឱសថរុក្ខជាតិ ឬគ្រូពេទ្យបន្ថែម។
៤– មានសុវត្ថិភាពកម្រិតណា?
គេមិនទាន់ដឹងនៅឡើយឱសថរុក្ខជាតិប្រភេទនេះ មានសុវត្ថិភាព ឬអាចមានផលប៉ះពាល់អ្វីខ្លះ។
៥- គួរប្រុងប្រយ័ត្ន
– ស្រ្តីមានផ្ទៃពោះ និងបំបៅដោះកូន៖ នៅមិនទាន់មានព៍ត៌មានច្បាស់លាស់អំពីការប្រើប្រាស់ ឱសថនេះនៅឡើយទេ។ គប្បីមិនគួរប្រើប្រាស់វា អំឡុងពេលនេះឡើយ។
– ជំងឺប្រព័ន្ធភាពស៊ាំប្រឆាំងខ្លួនឯង (Auto-immune diseases)៖ មានជំងឺ Multiple Sclerosis (MS) ជំងឺ Lupus (systemic lupus erythematosus (SLE)) ជំងឺរលាកសន្លាក់ Rheumatoid Arthritis (RA) ឬជំងឺផ្សេងៗទៀត។ ដោយសារតែ ផ្សិតឆាហ្គា (Chaga) អាចធ្វើឲ្យប្រព័ន្ធការពារធ្វើការកាន់តែខ្លាំង។ ដូចនេះវាអាចធ្វើឲ្យរោគសញ្ញាជំងឺ ប្រព័ន្ធភាពស៊ាំប្រឆាំងរាងកាយខ្លួនឯង កាន់ឡើងកាន់តែធ្ងន់ធ្ងរ។ បើដឹងថាខ្លួនឯងមានជំងឺណាមួយក្នុងចំណោមជំងឺខាងលើ អ្នកមិនគួរប្រើ ផ្សិតឆាហ្គាឡើយ។
– បញ្ហាហូរឈាម៖ ការប្រើប្រាស់ ផ្សិតឆាហ្គា (Chaga) ច្រើនអាចបណ្តាលឲ្យមានបញ្ហាចំពោះអ្នកមានជំងឺហូរឈាម (Bleeding Disorder)។
– សម្រាប់អ្នកជំងឺទឹកនោមផ្អែម៖ ផ្សិតឆាហ្គា (Chaga) អាចធ្វើឲ្យកម្រិតជាតិស្ករក្នុងឈាម អ្នកជំងឺទឹកនោមផ្អែមធ្លាក់ចុះ។ ដូចនេះត្រូវសង្កេតរកមើលសញ្ញាបង្ហាញពីការធ្លាក់ចុះជាតិស្ករក្នុងឈាម និងត្រូវតាមដានកម្រិតជាតិស្ករជាប្រចាំ បើអ្នកមានជំងឺទឹកនោមផ្អែម ហើយមានប្រើ ផ្សិតនេះ (Chaga)។ កម្រិតប្រើប្រាស់ថ្នាំសម្រាប់ ត្រូវកំណត់ឲ្យត្រឹមត្រូវដោយគ្រូពេទ្យ។
– ការវះកាត់៖ ពេលប្រើ ផ្សិតឆាហ្គា អាចបណ្តាលឲ្យមានការហូរឈាមច្រើននៅអំឡុងពេលវះកាត់។ គួរឈប់ប្រើ ផ្សិតនេះ យ៉ាងតិចឲ្យបាន ២សប្តាហ៍ មុនពេលការវះកាត់ចាប់ផ្តើម។
ស្វែងយល់ពីផលរំខាន
៦-មានផលរំខានអីខ្លះ?
បើមានកង្វល់ជុំវិញផលរំខានក្នុងការប្រើប្រាស់ផ្សិតឆាហ្គា (Chaga) សូមពិភាក្សាជាមួយគ្រូពេទ្យ ឬពេទ្យឱសថបុរាណ ដើម្បីដឹងអំពីព័ត៌មានបន្ថែម។
ស្វែងយល់ពីអន្តរកម្មថ្នាំ
៧- មានអន្តរកម្មជាមួយអីខ្លះ?
ផ្សិតឆាហ្គា (Chaga) អាចមានអន្តរកម្មជាមួយថ្នាំដែលអ្នកកំពុងប្រើ ឬមានអន្តរកម្មជាមួយបញ្ហាសុខភាពរបស់អ្នក។ គួរពិភាក្សាជាមួយគ្រូពេទ្យ ឬគ្រូពេទ្យឱសថបុរាណ មុនពេលប្រើ។
ស្វែងយល់ពីកម្រិតថ្នាំ
ព័ត៌មានទាំងនេះ មិនបានរាប់ជាការណែនាំរបស់គ្រូពេទ្យនោះទេ។ ត្រូវតែពិភាក្សាជាមួយគ្រូពេទ្យ ឬឱសថការី មុនពេលចាប់ផ្តើមប្រើប្រាស់ថ្នាំប្រភេទនេះ។
៨- កម្រិតប្រើធម្មតាម៉េចដែរ?
កម្រិតថ្នាំលើមនុស្សម្នាក់ៗ គឺខុសៗគ្នា អាស្រ័យលើកត្តាអាយុ ស្ថានភាពសុខភាព និងជំងឺផ្សេងៗ។ ពពួកឱសថនេះ មិនមែនសុទ្ធតែមានសុវត្ថិភាពទាំងអស់ទេ។ សូមពិគ្រោះជាមួយគ្រូពេទ្យ ដើម្បីដឹងពីកម្រិតថ្នាំត្រឹមត្រូវសម្រាប់យើង។
៩- អាចមានទម្រង់អីខ្លះ?
ផ្សិតឆាហ្គា (Chaga) មានជាទម្រង់ដូចខាងក្រោម៖
– ក្រៀម
– ប្រភេទគ្រាប់ថ្នាំ
– ម្សៅ
– ថ្នាំទឹក
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
