រឿងបំបៅដោះអូនៗមិនមែនងាយៗឯណា ពិសេសសម្រាប់ម៉ាក់ៗថ្មីថ្មោង ព្រោះមានអ្វីច្រើនយើងត្រូវដឹង ទាំងជំនាញ និងបច្ចេកទេសបំបៅទើបអាចទៅរួច។ ត្រឹមអូនៗម្នាក់ពិបាកទៅហើយ ចុះទម្រាំភ្លោះទៀត មិនដឹងពិបាកប៉ុណ្ណាទេ ត្រូវអត់? ឈប់ខ្វាយខ្វល់ទៀត ពិសេសគ្នាយើងទើបសម្រាល ឬត្រៀមសម្រាលបេប៊ីភ្លោះ “Hello គ្រូពេទ្យ” នឹងប្រាប់បច្ចេកទេសខ្លះៗ អាចជួយបាន។
ចង់ចាកចេញពី Hellokrupet?
ប្រាកដហើយថា អ្នកចង់ចាកចេញ?
តិចនិកបំបៅដោះកូន សម្រាប់ស្រីៗមានកូនភ្លោះ
១- រៀបចំកាលវិភាគ
រៀបចំកាលវិភាគមានភាពបត់បែន ជារឿងល្អ ដោយសារតែបេប៊ីម្នាក់ៗ អាចខុសៗគ្នា ម៉ោងពេលបំបៅដោះក៏ខុសគ្នាតាមហ្នឹងដែរ។ បេប៊ីមួយក្នុងចំណោមបេប៊ីភ្លោះ អាចចង់មឹមរាល់ ៣ ម៉ោងម្តង ហើយមួយទៀត អាចនឹងចង់មឹម ២ ម៉ោងម្តង។ បើយើងបង្កើតទម្លាប់ខ្លះមិនអាចផ្លាស់ប្តូរបាន អាចនឹងបង្កភាពលំបាកដល់ម៉ាក់ៗ និងបេប៊ី អំឡុងពេលបេប៊ីនៅតូចពេក ពិបាកទាំងការបំបៅតែម្តង។ យ៉ាងណាមិញ ទារកនឹងទម្លាប់ខ្លួនបាន នៅសប្តាហ៍ទី ៦ ហើយការបំបៅដោះ ក៏នឹងមានភាពងាយស្រួលជាងមុនដែរ។
២- បំបៅក្នុងពេលតែមួយ
បើសិនជាបេប៊ីទាំងពីរឃ្លានក្នុងពេលតែមួយ អ្វីគួរធ្វើ គឺប្រើកន្សែងរុំ ឬខ្នើយដើម្បីជាជំនួយ។ ជាមួយគ្នានេះ គ្នាយើងអាចផ្លាស់ប្តូរទម្លាប់ ដូចជា បីដៃពីរ បីដៃមួយ បីក្រោមក្លៀក ដេកផ្អៀង ដេកផ្ងារ ជាដើម។ កាន់តែល្អ អាចប្តូរដោះបំបៅចុះឡើង ដើម្បីជួយឲ្យការផលិតទឹកដោះបានស្មើគ្នាទាំងសងខាង។
លើសពីនេះ បើគ្នាយើងបំបៅដោះបេប៊ីភ្លោះក្នុងពេលតែមួយ ត្រូវប្រាកដថា យើងបានបី បេប៊ីម្នាក់ត្រឹមត្រូវ និងមានលំនឹង ចាំបី បេប៊ីម្នាក់ទៀតឡើង រួចសឹមបន្តបំបៅដោះ។ ប៉ុន្តែយល់ល្អ បំបៅម្តងមួយសិនទៅ រហូតដល់ពេលយើងមានជំនាញច្បាស់ ចាំអនុវត្តបែបនេះ។
អត្ថបទពាក់ព័ន្ធ៖
- ត្រូវបំបៅដោះកូនឲ្យបានប៉ុន្មានខែ ទើបសុខភាពកូនល្អ?
- មូលហេតុម៉ាក់ៗសម្បូរទឹកដោះហូរហៀរ កូនពីរនាក់បៅមិនអស់ និងដំណោះស្រាយ
៣- ផលិតទឹកដោះឲ្យបានគ្រប់គ្រាន់
បើម៉ាក់ៗគ្មានទឹកដោះគ្រប់គ្រាន់សម្រាប់បេប៊ីទាំងពីរទេ តែចង់បន្តបំបៅដោះនោះ ចាំបាច់ត្រូវបំបៅឲ្យបាន ៨ ដង/ថ្ងៃ។ តែកុំបារម្ភអី រឿងទឹកដោះតិច អាចដោះស្រាយបាន ដោយគ្រាន់តែឲ្យកូនមឹមញឹកញាប់បន្តិច ហើយម៉ាក់ៗ អាចញ៉ាំអាហារមួយចំនួនជួយភ្ញោចការផលិតទឹកដោះឲ្យបានច្រើនផងដែរ។
៤- វិធីមើលថែកូនមួយពេលកំពុងបំបៅកូនមួយទៀត
បើត្រូវមើលថែទាំបេប៊ីម្នាក់ ទាំងកំពុងបំបៅបេប៊ីមួយទៀត គួរធ្វើយ៉ាងម៉េច? ម៉ាក់ៗ អាចសាកល្បងវិធីនេះបាន ដូចជា អង្គុយរាបស្មើមួយកន្លែង បន្ទាប់មកដាក់អូនៗមិនមឹមនៅលើកន្សែង និងក្បែរខ្លួនយើង ធ្វើបែបនេះគឺអាចបំបៅអូនៗមួយផង មើលថែរអូនៗមួយទៀតផង។
៥- សុំជំនួយ
គ្នាយើង អាចចូលរួមក្នុងក្រុមស្រីៗមានកូនភ្លោះដូចគ្នា ដើម្បីចែករំលែកបទពិសោធន៍ និងគន្លឹះមានប្រយោជន៍ជាមួយគ្នា។ អាចសុំជំនួយពីម៉ាក់យើង ពីប្តី ឬសមាជិកគ្រួសារផ្សេងទៀត ឬអាចជួលអ្នកមើលថែក្មេងមកជួយក៏បាន។
៦- ត្រូវថែទាំខ្លួនឯងផង
ចិញ្ចឹមមើលថែបេប៊ីភ្លោះ ច្បាស់ជារឿងពិបាកណាស់ លើសពីនេះ គ្នាយើងមានកូនភ្លោះ គឺប្រឈមហានិភ័យខ្ពស់កើត ជំងឺបាក់ទឹកចិត្តក្រោយពេលសម្រាល។ ហេតុនេះ ម៉ាក់ៗគួរគេងឲ្យបានគ្រប់គ្រាន់ មើលថែខ្លួនឲ្យបានល្អ ទទួលជំនួយ ហើយក្នុងខ្លាច ឬអៀនខ្មាសសុំជំនួយនៅពេលយើងត្រូវការ។
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ប្រភព
Breastfeeding twins or multiples. https://www.babycenter.com/0_breastfeeding-twins-or-multiples_8479.bc. Accessed April 26, 2017.
10 tips for breastfeeding multiples. https://www.todaysparent.com/baby/breastfeeding/10-tips-for-breastfeeding-multiples/. Accessed April 26, 2017.
Share