៣ ចំណុចសំខាន់ យើងគួរដឹងពីវីរុសបំប្លែងថ្មី Delta

វីរុសបំប្លែងថ្មីDelta កំពុងក្លាយជាវីរុសកូវីដ-១៩ វាយលុកពាសពេញពិភពលោកនៅក្នុងពេលបច្ចុប្បន្ន ហើយក៏មានករណីនាំចូលមកស្រុកខ្មែរយើងដែរ។ វីរុសបំប្លែង Delta ត្រូវបានរកឃើញថា ជាវីរុសមានប្រភពដើមចេញពីប្រទេសឥណ្ឌា។ នេះបើតាមការឲ្យដឹងលោកស្រី Soumya Swaminathan ប្រធានផ្នែកវិទ្យាសាស្ត្រ នៃអង្គការសុខភាពពិភពលោក (WHO)។

១. តើវីរុសបំប្លែងថ្មី Delta បង្ករោគសញ្ញាធ្ងន់ធ្ងរ ឬធ្វើឲ្យធ្លាក់ខ្លួនឈឺធ្ងន់កម្រិតណា?

ការសិក្សាស្រាវជ្រាវបន្ថែមពីវីរុសនេះគឺចាំបាច់ ប៉ុន្តែមានការសិក្សាមួយចំនួនបង្ហាញថា វីរុសបំប្លែងថ្មី Delta អាចបណ្ដាលឲ្យយើងធ្លាក់ខ្លួនឈឺធ្ងន់បាន បើឆ្លងវា។ ការសិក្សាមួយចេញផ្សាយនៅថ្ងៃទី ១៤ ខែមិថុនា វិបសាយ The Lancet បានពិនិត្យមើលផលប៉ះពាល់នៃវីរុសបំប្លែងថ្មី Delta នៅប្រទេស Scotland អះអាងថា ហានិភ័យនៃការចូលមន្ទីរពេទ្យពីជំងឺកូវីដ-១៩ កើនឡើងទ្វេដង ចំពោះអ្នកជំងឺដែលបានឆ្លងវីរុសបំប្លែងថ្មី Delta បើប្រៀបធៀបជាមួយមនុស្សឆ្លងវីរុស Alpha។

អ្នកស្រាវជ្រាវអង់គ្លេសបានរាយការណ៍ពីរោគសញ្ញាដែលអាចជាប់ពាក់ព័ន្ធនឹងវីរុសបំប្លែង Delta នេះ។ របាយការណ៍ពីកម្មវិធីតាមដានរោគសញ្ញា វ៉ាក់សាំងដែលមនុស្សច្រើនជាង៤លាននាក់កំពុងប្រើប្រាស់ក្នុងចក្រភពអង់គ្លេសបង្ហាញថា រោគសញ្ញារបស់ជំងឺកូវីដ-១៩ ឥឡូវនេះគឺឈឺក្បាល ឈឺក ហៀរសម្បោរ និងក្ដៅខ្លួន ស្រដៀងនឹងរោគសញ្ញាផ្ដាសាយធំដែរ។

ចំណែកឯនៅសហរដ្ឋអាមេរិកវិញ អ្នកជំនាញអះអាងថា ដង្ហក់ ក្អក និងបញ្ហាសួតផ្សេងទៀតជារោគសញ្ញាទូទៅនៃជំងឺកូវីដ-១៩ និងនៅក្នុងករណីខ្លះ មានចេញរោគសញ្ញាដូចជា តឹងច្រមុះ ហៀរសម្បោរ និងឈឺក្បាល។

អ្នកស្រាវជ្រាវនៅមិនទាន់ដឹងច្បាស់នៅឡើយទេថា ហេតុអីបានជារោគសញ្ញាស្រដៀងនឹងផ្ដាសាយធំ ឬមានពាក់ព័ន្ធនឹងវីរុសបំប្លែងថ្មី Delta ឬក៏អត់នោះទេ។ រោគសញ្ញាជាច្រើនរបស់ជំងឺកូវីដ-១៩ ស្រដៀងនឹងផ្ដាសាយធំដែរ ហើយថ្មីៗនេះ មជ្ឈមណ្ឌល CDC អាមេរិក បានបញ្ចូលអាការៈតឹងច្រមុះ និងហៀរសម្បោរចូលទៅក្នុងបញ្ជីរោគសញ្ញាកូវីដ-១៩ គួរតាមដាន។

២. តើវីរុសបំប្លែងថ្មី Delta រីករាលដាលដល់ណាខ្លះ?

មកដល់ថ្ងៃនេះ វីរុសបំប្លែងថ្មី Delta ត្រូវបានរកឃើញថា រីករាលដាលដល់ទៅ ៩៥ប្រទេសហើយ។ នេះបើតាមការឲ្យដឹងរបស់អង្គការសុខភាពពិភពលោក (WHO)។ វីរុសបំប្លែងថ្មី Delta ត្រូវបានរកឃើញនៅក្នុងទាំង៥០រដ្ឋ របស់សហរដ្ឋអាមេរិក។ ចំណែកប្រទេសខ្លះត្រូវបានបិទខ្ទប់ទីក្រុងមួយចំនួន និងដាក់កំហិតទៅលើជើងហោះហើរចូលប្រទេសពីតំបន់ផ្ទុះវីរុសបំប្លែងថ្មី Delta ដូចជា ប្រទេសអូស្ត្រាលី អាហ្វ្រិក អាល្លឺម៉ង់ ទីក្រុងហុងកុង និងតៃវ៉ាន់ ដើម្បីទប់ស្កាត់ការឆ្លងវីរុសបំប្លែងថ្មី Delta។

៣. តើវ៉ាក់សាំងធម្មតាមានប្រសិទ្ធភាពប្រឆាំងនឹងវីរុសបំប្លែងថ្មី Delta ឬអត់?

វ៉ាក់សាំងដែលកំពុងចរាចរណ៍ឲ្យប្រើប្រាស់បង្ហាញឲ្យឃើញ អាចប្រឆាំងនឹងវីរុសបំប្លែងថ្មី Delta ការពារយើងពីវីរុសនេះ ហើយអ្នកវិទ្យាសាស្ត្រក៏បានយល់ស្របថា បុគ្គលដែលចាក់វ៉ាក់សាំងបានគ្រប់ដូសហើយ មិនចាំបាច់បារម្ភខ្លាំងពីការឆ្លងវីរុសបំប្លែងថ្មី Delta ពេកទេ។

ក្រុមហ៊ុនផលិតវ៉ាក់សាំង Moderna បានអះអាងថា វ៉ាក់សាំង Moderna អាចប្រឆាំងនឹងវីរុសបំប្លែងថ្មីនេះបាន បន្ទាប់ពីតេស្ដឈាមអ្នកចាក់វ៉ាក់សាំង Moderna គ្រប់ដូស ហើយឃើញថា មានអង់ទីករការពាររាងកាយពីវីរុសកូវីដ-១៩។ ចំពោះវ៉ាក់សាំង Pfizer និង AstraZeneca ក៏បង្ហាញលទ្ធផលស្រដៀងនឹងវ៉ាក់សាំង Moderna ដែរ ។

ទោះជាយ៉ាងនេះក្ដី យើងមិនទាន់ដឹងច្បាស់នៅឡើយទេថា វ៉ាក់សាំងកូវីដ-១៩ ដទៃទៀត ពិតជាអាចការពារយើងបានពីវីរុសបំប្លែងថ្មី Delta នេះឬក៏យ៉ាងនោះទេ និងទាមទារឲ្យមានការស្រាវជ្រាវបន្ថែម ដើម្បីបញ្ជាក់ពីប្រសិទ្ធភាពវ៉ាក់សាំងប្រឆាំងនឹងវីរុសនេះ។

ត្រួតពិនិត្យដោយ គ្រូពេទ្យឯកទេស.វេជ្ជ. ចាន់ ស៊ីណេតឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ នាង សុខុមដាលីញ៉ា · កែ 05/07/2021

៣ ចំណុចសំខាន់ យើងគួរដឹងពីវីរុសបំប្លែងថ្មី Delta

១. តើ​វីរុស​បំប្លែង​ថ្មី Delta បង្ក​រោគ​សញ្ញា​ធ្ងន់ធ្ងរ ឬ​ធ្វើ​ឲ្យ​ធ្លាក់​ខ្លួន​ឈឺ​ធ្ងន់​កម្រិតណា?

២. តើ​វីរុស​បំប្លែង​ថ្មី Delta រីក​រាល​ដាល​ដល់​ណា​ខ្លះ?

៣. តើ​វ៉ាក់សាំង​ធម្មតា​មាន​ប្រសិទ្ធភាព​ប្រឆាំង​នឹង​វីរុស​បំប្លែង​ថ្មី Delta ឬ​អត់?

១. តើវីរុសបំប្លែងថ្មី Delta បង្ករោគសញ្ញាធ្ងន់ធ្ងរ ឬធ្វើឲ្យធ្លាក់ខ្លួនឈឺធ្ងន់កម្រិតណា?

២. តើវីរុសបំប្លែងថ្មី Delta រីករាលដាលដល់ណាខ្លះ?

៣. តើវ៉ាក់សាំងធម្មតាមានប្រសិទ្ធភាពប្រឆាំងនឹងវីរុសបំប្លែងថ្មី Delta ឬអត់?