Glaucoma Surgery (វះកាត់ព្យាបាលជំងឺទឹកដក់បាតភ្នែក)
ចំណេះដឹងមូលដ្ឋាន
១- អ្វីជាការវះកាត់ព្យាបាលជំងឺទឹកដក់បាតភ្នែក?
វះកាត់ព្យាបាលជំងឺទឹកដក់បាតភ្នែក ជាការវះកាត់ដើម្បីបន្ថយហានិភ័យខូចខាតសរសៃប្រសាទភ្នែក (Optic Nerve) ដែលជានាំយករូបភាពពីស្រទាប់រ៉េទីន ទៅកាន់ខួរក្បាល ហើយបកប្រែជារូបភាពឲ្យយើងបានឃើញពីអ្វីៗនៅជុំវិញខ្លួន។
ជំងឺទឹកដក់់បាតភ្នែក ជាជំងឺដែលសម្ពាធក្នុងគ្រាប់ភ្នែកកើនឡើង ដោយសារសារធាតុរាវក្នុងភ្នែកបញ្ចេញមិនត្រឹមត្រូវ និងអាចធ្វើឲ្យខូចខាតសរសៃប្រសាទភ្នែក។ ជំងឺនេះ ឧស្សាហ៍កើតណាស់ មនុស្សម្នាក់ក្នុងចំណោមម ៥០នាក់ អាយុលើសពី ៤០ឆ្នាំ កើតមានជំងឺនេះ។ បើសិនជាធ្ងន់ធ្ងរខ្លាំង អាចបណ្តាលឲ្យខ្វាក់ភ្នែកទាំងសងខាង។ ក្នុងករណីខ្លះ សរសៃប្រសាទភ្នែក អាចនឹងខូច ទោះបីសម្ពាធក្នុងភ្នែកនៅកម្រិតធម្មតាក៏ដោយ។
២- ហេតុអ្វីត្រូវវះកាត់ព្យាបាលទឹកដក់បាតភ្នែក?
ការវះកាត់នេះ ដើម្បីបន្ថយសម្ពាធក្នុងភ្នែក ដោយបង្កើតច្រកសម្រាប់ទឹកហូរចេញពីគ្រាប់ភ្នែក។ យ៉ាងណា ការវះកាត់ក៏ជួយបន្ថយការឈឺចាប់ក្នុងគ្រាប់ភ្នែកផងដែរ។
កត្តាប្រឈម
៣- កត្តាប្រឈមវះកាត់ព្យាបាលទឹកដក់បាតភ្នែកមានអ្វីខ្លះ?
ជាធម្មតាមុនពេលសម្រេចវះកាត់ ការប្រើថ្នាំព្យាបាលជំងឺទឹកដក់បាតភ្នែក គឺជាជម្រើសដំបូង បើគ្មានប្រសិទ្ធភាព ពេទ្យនឹងណែនាំឲ្យធ្វើការវះកាត់ ដោយប្រើកាំរស្មីឡាស៊ែរ ខណៈការវះកាត់នៅតែមិនអាចព្យាបាលបាន ទើបពេទ្យនឹងព្យាបាលដោយវះកាត់បើផ្លូវទឹកចេញពីភ្នែក ដែលវិធីនេះ ធ្វើឡើងដូចគ្នាទៅនឹងការវះកាត់ជំងឺភ្នែកឡើងបាយ។
បញ្ហាកើតមានញឹកញាប់ក្រោយការវះកាត់នោះ គឺមានស្លាកស្នាម ហើយស្លាកស្នាមនេះអាចនឹងរារាំងរន្ធបង្ហូរទឹកចេញពីភ្នែក ធ្វើភ្នែកមានសម្ពាធ ដំណើរការខុសប្រក្រតី ហើយបើសិនជា ទឹកមិនអាចហូរចេញបានល្អទេ នោះអាចនឹងត្រូវវះកាត់បន្តទៀត។
ពេលកំពុងវះកាត់ ជាទូទៅគេនឹងប្រើថ្នាំ Mitomycin ដើម្បីការពារកុំឲ្យមានស្លាកស្នាម ឬសន្លាក់ ដោយថ្នាំនេះត្រូវបានគេប្រើច្រើនជាងថ្នាំ 5-fluorouracil នៅអំឡុងពេលវះកាត់ តែមិនអាចប្រើក្រោយពេលវះកាត់ឡើយ។ ឯថ្នាំ 5-fluorouracil អាចប្រើបានទាំងពេលវះកាត់ និងចាក់ទៅក្នុងភ្នាសស្តើងខាងក្រៅគ្រាប់ភ្នែក (Conjunctiva) ក្រោយពេលវះកាត់ ដើម្បីការពារកុំឲ្យកកើតសន្លាក់។
ផលវិបាកក្រោយការវះកាត់ភ្លាមៗរួមមាន៖
– ស្រវាំងភ្នែក
– ហូរឈាមក្នុងគ្រាប់ភ្នែក
– បាត់បង់គំឃើញផ្នែកកណ្តាលបណ្តោះអាសន្ន ឬជារៀងរហូត។ អត្រាគ្រោះថ្នាក់ អាស្រ័យទៅនឹងការបាត់បង់គំឃើញមុនពេលវះ។
– ការបង្ករោគក្នុងភ្នែក
– ឡើងសម្ពាធក្នុងគ្រាប់ភ្នែក ធ្វើឲ្យចន្លោះក្នុងផ្នែកខាងមុខគ្រាប់ភ្នែកកំពិត (ករណីកម្រ)។
ផលវិបាកក្រោយការវះកាត់រយៈយូររួមមាន៖
– ភ្នែកឡើងបាយ
– បន្តខូចខាតសរសៃប្រសាទបាតភ្នែក
– ការបង្ករោគ
– ធ្លាក់ត្របកភ្នែក។
អ្នកគួរយល់ដឹងពីកត្តាប្រឈម និងផលវិបាកមុនពេលវះកាត់។ សូមពិគ្រោះជាមួយគ្រូពេទ្យ សម្រាប់ព័ត៌មានលម្អិត។
អត្ថបទពាក់ព័ន្ធ៖
ស្វែងយល់មុនវះកាត់
៤- គួរត្រៀមអ្វីខ្លះមុនវះកាត់?
ត្រូវប្រាប់គ្រូពេទ្យពីថ្នាំយើងទើបប្រើថ្មីៗ ប្រតិកម្មឬអាលែកហ្ស៊ីមុនពេលវះកាត់ និងពិភាក្សាជាមួយគ្រូពេទ្យថ្នាំសណ្តំផងដែរ។ សូមធ្វើតាមការណែនាំរបស់គ្រូពេទ្យ ពីការតមអាហារ និងទឹកមុនពេលវះកាត់។
ទទួលបានការណែនាំពីការតមអាហារ និងទឹកមុនពេលវះ។ ជាទូទៅ ត្រូវតមញ៉ាំអាហារ ៦ ម៉ោងមុនវះកាត់។ ហើយអាចញ៉ាំទឹក និងអាហារបានធម្មតាវិញ ក្រោយវះកាត់ ២-៣ ម៉ោង។
៥- មានអ្វីកើតឡើងអំឡុងពេលវះកាត់?
វិធីដាក់ថ្នាំសន្លប់មានច្រើនយ៉ាង ដូចនេះអាចពិភាក្សាជាមួយគ្រូពេទ្យ ដើម្បីជ្រើសរើសយកវិធីសមស្របមួយ។ ការវះកាត់ មានរយៈពេលប្រមាណពី ៤៥-៧៥ នាទី។ គ្រូពេទ្យនឹងបង្កើតផ្លូវថ្មីសម្រាប់ឲ្យទឹកហូរចេញស្រួលជាងមុន នៅក្រោមត្របកភ្នែក។ សូមពិគ្រោះជាមួយគ្រូពេទ្យសម្រាប់ព័ត៌មានបន្ថែម។
ថែទាំក្រោយវះកាត់
៦- មានអ្វីកើតឡើងក្រោយវះកាត់?
ក្រោយវះកាត់ ២-៣ ម៉ោង យើងអាចត្រឡប់ទៅផ្ទះបាន។ យើងត្រូវត្រលប់មកជួបគ្រូពេទ្យវិញតាមការណាត់ជួប ២-៣ដង ក្នុង ២-៣ សប្តាហ៍ម្តង និងធ្វើការពិនិត្យភ្នែកឡើងវិញ ខណៈជំងឺភាគច្រើនត្រូវសម្រាកនៅផ្ទះ ២ សប្តាហ៍។
ហាមហ៊ែលទឹក លើករបស់ធ្ងន់ ឬអោនក្បាលទាបជាងចង្កេះមុនពេលទៅជួបគ្រូពេទ្យ។ ការហាត់ប្រាណឲ្យបានទៀងទាត់ អាចជួយយើងធ្វើការបានធម្មតាវិញលឿន។ សូមពិគ្រោះជាមួយគ្រូពេទ្យមុនពេលធ្វើលំហាត់ប្រាណ។
គណនា BMI
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Trabeculectomy (Filtration Surgery) for Glaucoma. http://www.webmd.com/eye-health/trabeculectomy-filtration-surgery-for-glaucoma. Accessed July 16, 2016.
Glaucoma – Surgery. http://www.webmd.com/eye-health/tc/glaucoma-surgery. Accessed July 16, 2016.
Glaucoma Surgery. http://www.allaboutvision.com/conditions/glaucoma-surgery.htm. Accessed July 16, 2016.
Glaucoma Surgery. http://www.glaucoma.org/treatment/surgery-overview.php. Accessed July 16, 2016.
កំណែប្រែបច្ចុប្បន្ន
09/11/2021
អត្ថបទដោយ Chamnan Amrith
បច្ចុប្បន្នភាពដោយ៖ នាង សុខុមដាលីញ៉ា
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម