និយមន័យ

ជាការថតសួតដោយស៊កបំពង់តូច ភ្ជាប់ជាមួយពន្លឺ និងកាមេរ៉ាចូលដើម្បីមើលរចនាសម្ព័ន្ធតាមបំពង់ខ្យល់ អាចមើលឃើញពីបម្រែបម្រួលបំពង់ក បំពង់សំឡេង និងបំពង់ខ្យល់ជាដើម។ សុងថតបែបនេះ ធ្វើឡើងនៅពេលអ្នកជំងឺមានកូនកណ្ដុរក្នុងទ្រូងសង្ស័យថាមានជំងឺផ្សេងៗ និងមានប្រយោជន៍ក្នុងការចាប់យកអ្វីដែលស្លាក់ផ្សេងទៀតបានផងដែរ។

គ្រូពេទ្យអាចស្នើឲ្យធ្វើការថតប្រុងកូស្កូពី ក្នុងករណីដូចខាងក្រោម៖

– រកមូលហេតុបង្កឲ្យមានការហូរឈាម ពិបាកដកដង្ហើម និងក្អករ៉ាំរ៉ៃជាដើម

– ច្រឹបយកសាច់ទៅពិនិត្យ

– ធ្វើរោគវិនិច្ឆ័យដោយបឺតយកវត្ថុសំណាកទៅពិសោធ

– កំណត់ការរីករាលដាលនៃមហារីកសួត

– ចាប់យកវត្ថុដែលស្លាក់ចេញ

– ព្យាបាលការហូរឈាម

– បន្ធូរភាពតឹងស្ទះបំពង់ខ្យល់

– ព្យាបាលដោយកាំរស្មីវិទ្យុសកម្មបាញ់ដោយផ្ទាល់។

ស្វែងយល់ពីហានិភ័យ

ទោះជាការថតសុងសួតបែបនេះមានអត្ថប្រយោជន៍ច្រើនជាងផលវិបាកក៏ពិតមែន ប៉ុន្តែករណីខ្លះអាចជួបរងផលប៉ះពាល់ជាយថាហេតុដូចជា៖

– ធ្វើឲ្យបំពង់ខ្យល់រួមតូច និងពិបាកដកដង្ហើម

– ចង្វាក់បេះដូងមិនធម្មតា

– រលាកសួត

– ក្អកកាន់តែខ្លាំង

– ងាយប្រតិកម្មទៅថ្ងៃក្រោយ

– រលាកបំពង់កជាដើម

តួយ៉ាងការឆ្លុះសួត ក៏មិនអាចកំណត់រោគវិនិច្ឆ័យបានច្បាស់លាស់ដែរ ដោយសារអាចមានការច្រឹបយកសាច់ទៅពិនិត្យខុសកន្លែង ក្នុងករណីមានដុំមហារីកសួត។

ដឹងពីអ្វីកើតឡើង

គួរតែមានអ្នកជូនមកមន្ទីរពេទ្យ និងតមញ៉ាំអាហារពី ៦-១២ ម៉ោង បញ្ឈប់ការប្រើថ្នាំដូចជា ថ្នាំពង្រាវឈាម អាស្ពីរីន និងថ្នាំបំបាត់ការឈឺចាប់ជាដើម។ ជាទូទៅការសុងថតសួតរបៀបនេះត្រូវការពេលត្រឹម ១៥ នាទីប៉ុណ្ណោះ។

ពេលដាក់ឧបករណ៍ចូលទៅ ពេទ្យអាចមើលឃើញពីបម្រែបម្រួលមិនប្រក្រតីផ្សេងៗ ក៏ដូចជាការច្រឹបសាច់មកពិនិត្យជាដើម។ ករណីចាំបាច់អ្នកជំងឺអាចត្រូវគ្រូពេទ្យប្រើថ្នាំសណ្ដំដើម្បីឲ្យមានភាពងាយស្រួលក្នុងដំណើរការ។

ការថែទាំបន្ទាប់

មានអ្វីកើតឡើងក្រោយធ្វើការសុងសួតដោយប្រុងកូស្កូពី?

បើអ្នកជំងឺទទួលថ្នាំសណ្ដំអំឡុងពេលធ្វើការសុង ឥទ្ធិពលថ្នាំនឹងសាបទៅវិញក្នុងរយៈពេល ២ម៉ោងបន្ទាប់។ គ្រូពេទ្យនឹងប្រាប់អ្វីដែល បានរកឃើញ បន្ទាប់មកធ្វើការពិគ្រោះពីវិធីព្យាបាលសមស្រប។ អ្នកជំងឺគួរដឹងពីចំណុចខ្លះៗខាងក្រោមនេះ៖

– មិនត្រូវផឹកទឹក ឬញ៉ាំអាហារអ្វីទាំងអស់ចន្លោះពី ១-២ ម៉ោង រង់ចាំទាល់តែបំពង់កវិលមករកភាពប្រក្រតីវិញ។

– ខ្ជាក់ទឹកមាត់ចេញរហូតដល់អាចលេបដោយខ្លួនឯងចៀសវាងករណីស្លាក់។

– មិនត្រូវបើកបរជាដាច់ខាត រង់ចាំយ៉ាងហោចណាស់ ៨ម៉ោង ក្រោយធ្វើការសុងរួច។

– ត្រូវតមបារីរយៈពេល ២៤ម៉ោង។

– អាចត្រឡប់ទៅធ្វើការវិញជាធម្មតានៅថ្ងៃបន្ទាប់។

ក្នុងករណីមានសំនួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុតសូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬការព្យាបាលជូនទេ៕

Bronchoscopy (ការ​ថត​សួត​ដោយម៉ាស៊ីន​ ប្រុងកូស្កូពី)

និយមន័យ

ស្វែងយល់ពីហានិភ័យ

ដឹងពីអ្វីកើតឡើង

ការ​ថែទាំ​បន្ទាប់

Bronchoscopy (ការថតសួតដោយម៉ាស៊ីន ប្រុងកូស្កូពី)

ការថែទាំបន្ទាប់