ការពពោះកូនក្នុងផ្ទៃរបស់ស្រីៗ ជារឿងអស្ចារ្យដែលមនុស្សប្រុសមិនអាចធ្វើបាន ដូចនេះហើយស្វាមីគួរតែបង្ហាញរឿងទាំងនេះទៅកាន់ភរិយា ដែលជាទំនួលខុសត្រូវសំខាន់ក្នុងនាមជាមេគ្រួសារ។ ខាងក្រោមនេះជារឿងដែលប្ដីល្អ គួរតែធ្វើពេលប្រពន្ធមានផ្ទៃពោះ ណែនាំដោយអ្នកគ្រូពេទ្យ មួន រ៉ានី បម្រើការនៅមណ្ឌលសុខភាពព្រែកពោធិ៍ ស្រុកស្រីសន្ធរ ខេត្តកំពង់ចាម៖
ពេលប្រពន្ធពពោះ ប្ដីល្អមិនគួររំលងរឿងកំប៉ិកកំប៉ុកទាំងនេះឡើយ
ត្រួតពិនិត្យដោយ ដេត ធន្នី
១- ជូនប្រពន្ធទៅធ្វើការ
បើទោះបីជាមធ្យោបាយធ្វើដំណើរឥឡូវសម្បូរបែបក៏ពិតមែន តែស្វាមីមិនគួរបណ្ដោយឲ្យប្រពន្ធធ្វើដំណើរម្នាក់ឯងទៅធ្វើការដែរ។ ព្រោះអ្នកពោះធំច្រើនមានអាការៈវិលមុខ ធេងធោងភ្លាមៗ ប្រសិនបើបើកម៉ូតូ ឬឡានម្នាក់ឯង ប្រាកដជាមានគ្រោះថ្នាក់ ហើយបើធ្វើដំណើរតាមឡានក្រុង ឬម៉ូតូកង់បី មានបញ្ហាអស់ទាំងនោះ អ្នកដទៃប្រាកដជាមិនអាចមកជួយអ្វីបានច្រើនដែរ។
២- ជូនប្រពន្ធទៅពេទ្យ
ពេទ្យតែងតែណាត់ម៉ាក់ៗឲ្យទៅពិនិត្យផ្ទៃពោះរៀងរាល់ខែ ហើយប្រសិនបើកូនមានសុខភាពមិនសូវល្អទៀតនោះ រឹតតែត្រូវតាមដានញឹកញាប់។ ដូចនេះហើយមនុស្សស្រីពេលមានប្ដីនៅក្បែរខ្លួនមានអារម្មណ៍កក់ក្ដៅ សួរនាំបញ្ហាផ្សេងៗពីកូនបានលម្អិត និងបើត្រូវជួបបញ្ហាមិនស្រួលណាមួយមានអ្នកពិគ្រោះយោបល់ តែបើគ្មានវិញ គ្នាមិនដឹងត្រូវធ្វើយ៉ាងណាឡើយក្នុងកាលៈទេសៈពិបាកៗ។
៣- កំដរប្រពន្ធ
អ្នកពោះធំច្បាស់ជាមានអារម្មណ៍ធុញថប់ និងគេងមិនលក់ជាដើម។ ប្ដីគួរតែឆ្លៀតពេលទំនេរចុងសប្ដាហ៍ជូនប្រពន្ធដើរកម្សាន្តស្រូបយកខ្យល់អាកាសបរិសុទ្ធ ដើម្បីស្រឡះមុខមាត់ កុំឲ្យអារម្មណ៍ថាល្វើយខ្លាំងពេក។ តែបើមិនអាចទៅណាបានឆ្ងាយ គួរតែឆ្លៀតជូនទៅកន្លែងមានលក់អាហារញ៉ាំ ឬសួនច្បារមានទេសភាពស្អាតៗក៏ល្អដែរ។
អត្ថបទពាក់ព័ន្ធ៖ ជាស្វាមី និងប៉ាៗល្អគួរតែធ្វើរឿងទាំងនេះពេលម៉ាក់ៗពពោះ និងសម្រាល
៤- ម៉ាស្សាឲ្យប្រពន្ធ
ពោះកាន់តែធំអាការៈចុករួយផ្សេងៗក៏មានកាន់តែច្រើនកន្លែង ជាពិសេសចង្កេះ និងជើងតែម្ដង។ ដឹងបែបនេះហើយយប់ឡើង បុរសៗគួរតែជួយច្របាច់ជើង និងធ្វើសរសៃឲ្យប្រពន្ធ ដើម្បីបានធូរស្បើយខ្លះៗ មិនតែប៉ុណ្ណោះ ពេលពាក់កណ្ដាលអាធ្រាត្រគួរតែក្រោកជួយ បើឮសំឡេងប្រពន្ធប្រាប់ថារមួលក្រពើ។
៥- មានកាដូលើកទឹកចិត្ត
ពពោះកូនមួយៗមិនមែនជារឿងងាយស្រួលឡើយ ហត់នឿយទាំងកាយទាំងចិត្ត បាត់បង់រូបឆោម និងលះបង់ពេលវេលាសម្រាប់ខ្លួនឯងជាច្រើនដើម្បីកូន។ ដូចនេះប្ដីគួរតែមានកាដូជាការលើកទឹកចិត្តបន្តិចបន្តួច ដើម្បីឲ្យម៉ាក់ៗមានអារម្មណ៍កក់ក្ដៅ និងគិតថាខ្លួនមិនឯកា។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យដោយ
ដេត ធន្នី
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម