១០ សំណួរជុំវិញទស្សនៈយល់ខុសអំពីការមានផ្ទៃពោះ

តាំងពីដើមរៀងមក ចាស់ៗតែងមានត្រណមច្រើនយ៉ាងចំពោះស្រីៗមានផ្ទៃពោះ ដើម្បីរក្សាគភ៌ឲ្យនៅគង់ មានសុខភាពល្អ។ ក្នុងចំណោមត្រណមទាំងនោះ មានមួយចំនួនគឺជាទស្សនៈយល់ខុស ប្រាសចាកពីផ្នែកវេជ្ជសាស្ត្រទៅវិញ។

១- មុជទឹកយប់ធ្វើឲ្យកូនថ្លោស?

ការដែលស្រីៗមានពោះពុងមុជទឹកពេលយប់មិនមែនធ្វើកូនថ្លោសនោះទេ កូនថ្លោសអាចមកពីរបបអាហាររបស់ម៉ាក់ៗច្រើនជាង ដូចជាការញុំាបន្លែ ផ្លែឈើលើសកម្រិត។ ការពិតទៅចាស់ៗហាមស្រីៗមានផ្ទៃពោះមិនឲ្យងូតទឹកនៅពេលយប់ ខ្លាចងងឹតធ្វើឲ្យរអិលដួល ប៉ះពាល់ដល់កូនក្នុងពោះប៉ុណ្ណោះ។

២- ញ៉ាំពពួកខ្ចៅខ្យងធ្វើឲ្យកូនកើតមកហៀរទឹកមាត់?

មិនអាចនោះទេ! មកទល់ពេលនេះគ្មានភស្តុតាងណាបញ្ជាក់ថា ការញ៉ាំពពួកខ្ចៅខ្ចង លៀស គ្រុំ ធ្វើឲ្យកើតមកហៀរទឹកមាត់នោះទេ។ ផ្ទុយទៅវិញ ការដែលកូនហៀរទឹកមាត់មិនឈប់រហូតដល់ធំ អាចមកពីអណ្តាតធំ មានការបង្ករោគ នៅក្រពេញទឹកមាត់ ឬមានបញ្ហាប្រព័ន្ធសរសៃប្រសាទជាដើម។ ចំណែកឯការញ៉ាំខ្ចៅខ្យងអាចធ្វើឲ្យម៉ាក់ៗមិនស្រួលពោះ ឆ្លងពពួកសត្វល្អិត-ព្រូន ចូលក្នុងពោះវៀន ដូច្នេះទោះវាមិនធ្វើឲ្យកូនហៀរទឹកមាត់ ក៏យើងមិនគួរញ៉ាំដែរ។

៣- ញ៉ាំគ្រាប់ជីរ-ល្ង ស្រួលកើតកូន?

កូនកើតស្រួល ឬពិបាក អាស្រ័យទៅលើទម្រង់រាងកាយយើង ទំហំក្បាលកូន ទំហំអាងត្រគាកម៉ាក់ៗ ម្យ៉ាងវិញទៀតបើកូនថ្លោសខ្លាំងក៏ពិបាកកើតដែរ មិនមែនមកពីការញ៉ាំគ្រាប់ជីរ ឬល្ងនោះទេ។

អត្ថបទពាក់ព័ន្ធ៖ ម៉ាក់ៗញ៉ាំគ្រាប់ជីរ-ល្ង ច្រើនពេលពពោះ ស្រួលកើតកូន?

៤- ហាមរួមភេទពេលមានផ្ទៃពោះ?

ពេទ្យហាមរួមភេទតែក្នុងករណីដែលម៉ាក់ៗមានបញ្ហាសុកពាំងមាត់ស្បូន កូនកើតមិនគ្រប់ខែ មានធ្លាក់ឈាមតាមទ្វារមាស មានឆ្លងជំងឺកាមរោគនៅប្រដាប់ភេទ មានការបែកទឹកភ្លោះមុនពេលសម្រាល និងមាត់ស្បូនបើកប៉ុណ្ណោះ។ ទោះជាពេទ្យមិនហាមក្តី តែស្រីៗគ្នាយើងមិនសូវមានចំណង់ប៉ុន្មានទេអំឡុងពពោះ ណាមួយចាញ់កូនទៀតរឹតតែអត់អារម្មណ៍។

៥- ចូលចិត្តញ៉ាំបបរធ្វើឲ្យកើតមកមិនស្អាត?

រឿងនេះក៏មិនពិតដែរ សម្បុរស្បែកកូនស្អាត ឬមិនស្អាត អាស្រ័យលើរបបអាហារ សម្បុរម៉ាក់ប៉ា និងអនាម័យខ្លួនប្រាណម៉ាក់ៗ បើម៉ាក់មានការបង្ករោគផ្សិតអំឡុងពពោះនោះស្បែកកូនក៏មិនស្អាតដែរ។

៦- ញ៉ាំម្នាស់ធ្វើឲ្យរលូតកូន

ការភាន់ច្រឡំនេះ គឺដោយសារក្នុងផ្លែម្នាស់មានអង់ហ្ស៊ីម Bromelain ។ ពួកគេអះអាងថា អង់ហ្ស៊ីម Bromelain បំបែកជាតិប្រូតេអ៊ីន ហើយកូនទើបតែបង្កកំណើតថ្មីៗក្នុងផ្ទៃពោះ គឺផ្សំបង្កើតឡើងដោយជាតិប្រូតេអ៊ីន អ៊ីចឹងការញ៉ាំអង់ហ្ស៊ីម Bromelain អាចបណ្តាលឲ្យមានការហូរឈាម និងរលូតកូនបាន តែគ្មានភស្តុតាងគាំទ្រការអះអាងនេះទេ ផ្ទុយទៅវិញ ម៉ាក់ៗញ៉ាំម្នាស់ក្នុងបរិមាណល្មម មានសុវត្ថិភាព។

អត្ថបទពាក់ព័ន្ធ៖ រឿងដ៏ចម្រូងចម្រាស! ពិតអត់ដែលថា ញ៉ាំម្នាស់ រលូតកូន?

៧- ទឹកដូងមិនល្អចំពោះស្រីៗមានផ្ទៃពោះ?

ក្នុងទឹកដូងសម្បូររ៉ែប៉ូតាស្យូម ម៉ាញេ៉ស្យូម កាល់ស្យូម និងផូស្វរ ជួយទប់ទល់បញ្ហាទល់លាមក បង្ការអការៈចាញ់កូន ក្អួតចង្អោរ ជួយការលូតលាស់ទារក និងលំនឹងទឹកភ្លោះបានល្អ។

៨- ហាត់ប្រាណធ្វើឲ្យរលូតកូន?

ហាត់ប្រាណល្អចំពោះស្រីៗមានផ្ទៃពោះ ពេទ្យហាមតែការហាត់ប្រាណណាដែលត្រូវប្រើកម្លាំង និងកាយវិការខ្លាំងៗប៉ុណ្ណោះ។

៩- មើលអេកូញឹកញាប់ពេកអាចប៉ះពាល់ដល់កូនក្នុងពោះ?

គ្មានការសិក្សាបែបវិទ្យាសាស្ត្រណាបញ្ជាក់ថា ការមើលអូកេសាស្ត្រច្រើនធ្វើឲ្យប៉ះពាល់ដល់កូនក្នុងពោះនោះទេ តែវាបានផ្តល់អត្ថប្រយោជន៍ច្រើនដល់យើងវិញ ដោយអាចដឹងពីការវិវត្តរបស់កូន។

អត្ថបទពាក់ព័ន្ធ៖ មើលអេកូញឹកពេក ប៉ះពាល់កូនអត់? ពិនិត្យប៉ុន្មានដងល្អ?

១០-ចាញ់កូនពេកធ្វើឲ្យរលូតកូន?

មានម៉ាក់ៗជាច្រើនយល់ច្រឡំថា ការចាញ់កូនខ្លំាងអាចធ្វើឲ្យរលូតកូន តាមពិតមិនអ៊ីចឹងទេ អាការៈចាញ់កូនគឺតែងតែកើតមានអំឡុងត្រីមាសទី១ នៃការពពោះ ដោយសារតែការកើនឡើងកម្រិតអ័រម៉ូននៅក្នុងខ្លួន។

ត្រួតពិនិត្យដោយ Editor HK

អត្ថបទដោយ ដេត ធន្នី · កែ 21/06/2021

១០ សំណួរ​ជុំវិញ​ទស្សនៈ​យល់​ខុស​អំពី​ការ​មាន​ផ្ទៃពោះ