រាករូស អាចជារឿងធម្មតា នរណាក៏ធ្លាប់ឆ្លងកាត់ដែរ ប៉ុន្តែអំឡុងពេលពពោះ បើជួបបញ្ហារាករូសញឹកញាប់ ស្រីៗគ្នាយើងត្រូវចេះប្រយ័ត្នប្រយែងខ្លួនផង ព្រោះរាករូសខ្លាំង អាចប៉ះពាល់ទាំងសុខភាពម៉ាក់ៗ និងគភ៌ក្នុងផ្ទៃបាន។ អត្ថបទនេះ “Hello គ្រូពេទ្យ” នឹងណែនាំតិចនិកខ្លះៗ ជួយយើងដោះស្រាយបញ្ហារាករូសពេលពពោះ ដើម្បីចៀសផុតពីគ្រោះថ្នាក់។
អំឡុងពេលពពោះ ស្រាប់តែរាកខុសធម្មតា គួរធ្វើម៉េច?
១- ផឹកទឹកឲ្យបានគ្រប់គ្រាន់
ពេលមានបញ្ហារាករូស ខ្លួនប្រាណយើងនឹងបាត់បង់ជាតិទឹក បើមិនផឹកទឹកឲ្យបានគ្រប់គ្រាន់ទេ រាងកាយងាយនឹងបាត់បង់ជាតិទឹកយ៉ាងលឿន។ បាត់បង់ជាតិទឹក អាចធ្វើអោយខូចខាតដល់ការវិវត្តខួរឆ្អឹងខ្នងរបស់ទារកក្នុងផ្ទៃ បង្កភាពមិនប្រក្រតីផ្សេងៗពីកំណើត ឬគ្នាយើងប្រឈមការសម្រាលមុនខែទៀតផង។ តែយើងអាចការពារបញ្ហាបាត់បង់ជាតិទឹកបាន ដោយផឹកទឹកឲ្យបានច្រើននៅពេលថ្ងៃ យា៉ងហោចណាស់ឲ្យបាន ២លីត្រ ដោយផឹកម្តងបន្តិចៗ។ ទឹកធម្មតា ជាជម្រើសល្អបំផុត តែគ្នាយើងក៏អាចផឹកសារធាតុរាវផ្សេងៗ ដូចជា ទឹកផ្លែឈើស្រស់ក៏បានដែរ។ តែមិនត្រូវផឹកកាហ្វេ ឬតែឡើយ ដោយសារមានសារធាតុកាហ្វេអ៊ីន អាចធ្វើឲ្យយើងបត់ជើងតូចច្រើន នាំឲ្យយើងបាត់បង់ជាតិទឹកកាន់តែលឿន។ តែបើផឹកទឹកបានគ្រប់គ្រាន់ ទឹកនោមនឹងមានពណ៌លឿងស្រាល ឬថ្លាតែម្តង។
២- ផ្លាស់ប្តូររបបអាហារ
ករណីរាករូសពេលពពោះ ក៏អាចកើតឡើងដោយសាររបបអាហារដូចគ្នា ហេតុនេះញ៉ាំអាហារមានតុល្យភាព គឺអាចជួយដោះស្រាយបាន។ គួរញ៉ាំចេក បាយ និងផ្លែប៉ោម ឲ្យបានច្រើន និងញ៉ាំសាច់សុទ្ធ ការ៉ុត និងយ៉ាអួ ដែលមានសារធាតុប្រ៉ូបាយអូទិកឲ្យបានច្រើនផងដែរ។
ត្រូវញ៉ាំអាហាមានអនាម័យ លាងសម្អាតផ្លែឈើ បន្លែ និងអាហារផ្សេងៗទៀតឲ្យបានស្អាតល្អ ជាពិសេសអាហារឆៅ។ មិនត្រូវញ៉ាំអាហារមិនបានសម្លាប់មេរោគក្នុងកម្តៅត្រឹមត្រូវនោះទេ។ ត្រូវចម្អិនអាហារឲ្យបានត្រឹមត្រូវមុននឹងបរិភោគ ហើយគួរចៀសវាងស៊ុតស្ទើរឆ្អិន (ពងជ័រព្នៅ) និងសាច់ក្រហមស្ទើរឆ្អិន។
បើសិនជាទៅញ៉ាំអីនៅក្រៅ មិនគួរទៅកន្លែងប៊ូហ្វេទេ ក៏គួរចៀសវាងអាហារតាមផ្លូវដូចគ្នា។ មិនគួរញ៉ាំផ្លែឈើទាំងសំបក ឬផ្លែឈើមិនបានចិតដោយខ្លួនឯងឡើយ ព្រោះយើងមិនដឹងថា វាស្អាត ឬអត់នោះទេ។
អត្ថបទពាក់ព័ន្ធ៖
- កំពុងមានផ្ទៃពោះ ស្រាប់តែឧស្សាហ៍ចុកពោះ គួរឲ្យបារម្ភអត់?
- ងូត ឬដេកត្រាំទឹកក្តៅពេលពពោះ ប៉ះពាល់កូនក្នុងផ្ទៃ?
៣- ប្រញាប់ទៅមន្ទីរពេទ្យ
បើសិនអាការៈរាកមិនបាត់រយៈពេល ២-៣ ថ្ងៃ ស្រីៗកំពុងពពោះ គួរប្រញាប់ទៅមន្ទីរពេទ្យ។ គ្រូពេទ្យអាចនឹងណែនាំឲ្យយើងប្រើថ្នាំមួយចំនួន។ ហើយកុំបារម្ភអី ព្រោះគ្រូពេទ្យនឹងឲ្យតែថ្នាំណា មានសុវត្ថិភាពសម្រាប់កូនក្នុងផ្ទៃយើងប៉ុណ្ណោះ។
បើមានអាការៈដូចខាងក្រោមនេះ សូមទាក់ទងទៅគ្រូពេទ្យឲ្យបានលឿនបំផុត៖
– មានឈាមក្នុងលាមក
– ទឹកនោមលឿងខ្លាំង
– ស្ងួតមាត់
– ឈឺក្បាល
– អស់កម្លាំង និងល្ហិតល្ហៃ។
រាករួស អាចមកពីការពុលអាហារ ឬដោយសារបម្រែបម្រួលពេលពពោះ (ការផ្លាស់ប្តូរអ័រម៉ូន របបអាហារ ធ្វើឲ្យងាយប្រតិកម្ម)។ សម្រាប់គ្នាយើងកំពុងពពោះ អាចនឹងមានជម្រើសព្យាបាលតិចជាងធម្មតា។ យ៉ាងណាមិញ រាករូសភាគច្រើន នឹងជាទៅវិញដោយខ្លួនឯង ដោយមិនបាច់ប្រើថ្នាំអ្វីឡើយ ហើយបើចង់ព្យាបាល ក៏មានវីធីព្យាបាលបានដូចគ្នា។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម