កើតរលាកថ្លើមប្រភេទ B ពេលពពោះប៉ះពាល់កូនអត់? គួរព្យាបាលម៉េច?

ជំងឺរលាកថ្លើម ជាប្រភេទជំងឺងាយឆ្លងណាស់ ពិសេសរលាកថ្លើមប្រភេទ B ងាយឆ្លងបំផុតតាមរយៈការរួមភេទ។ ដោយសារជំងឺ ជាប្រភេទជំងឺឆ្លង និងរ៉ាំរ៉ៃ ស្រីៗជាច្រើនដែលកំពុងពពោះ ត្រូវតែប្រុងប្រយ័ត្នឲ្យមែនទែន ព្រោះរលាកថ្លើមប្រភេទ B អាចមានផលអវិជ្ជមានច្រើនចំពោះកូនក្នុងផ្ទៃ។ “Hello គ្រូពេទ្យ’ នឹងពន្យល់ពីផលប៉ះពាល់ ក៏ដូចជាវិធីព្យាបាល ឲ្យគ្នាយើងបានដឹង។

១- ផលប៉ះពាល់ពីជំងឺរលាកថ្លើមប្រភេទ B ទៅគភ៌ក្នុងផ្ទៃ

ជាធម្មតា ជំងឺរលាកថ្លើមប្រភេទ B ទំនងជាមិនមានឥទ្ធិពលទៅលើការមានផ្ទៃពោះ និងការបង្កើតកូនទេ ប៉ុន្តែឱកាសប៉ះពាល់ នៅតែអាចកើតមានដដែល ទាមទារជាចាំបាច់ ក្នុងការថែទាំសុខភាពមុនពេលសម្រាល។ បើស្រីៗមានផ្ទុកជំងឺរលាកថ្លើមប្រភេទ B អំឡុងពេលពពោះ អាចប្រឈមបញ្ហាមួយចំនួន ដូចជា៖

– កូនកើតមិនគ្រប់ខែ

– កើតកូនមកមិនគ្រប់គីឡូ

– មានការវិវត្តទៅជាជំងឺទឹកនោមផ្អែមពេលពពោះ

– មានធ្លាក់ឈាមខ្លាំងនៅអំឡុងពេលត្រីមាសទី ៣ នៃការពពោះ។

គ្នាយើង អាចនឹងចម្លងជំងឺរលាកថ្លើមប្រភេទ B ទៅកូនក្នុងផ្ទៃ ហើយត្រូវគេជឿថា ភាគច្រើនឆ្លងនៅពេលសម្រាលកូនតែម្តង។ ទោះជាយ៉ាងនេះក្ដី ជំងឺនេះ មិនមែនជាមូលហេតុនាំឲ្យយើងមិនអាចសម្រាលកូនតាមធម្មជាតិនោះដែរ ហើយចំពោះការសម្រាលដោយវះកាត់ ក៏មិនមានភស្ដុតាងបញ្ជាក់ថា អាចការពារកូនកុំឲ្យឆ្លងរោគពីយើងបានដូចគ្នា។

បើយើងមានផ្ទុកវីរុសរលាកថ្លើមប្រភេទ B កូនយើងគួរតែចាក់វ៉ាក់សាំងការពារជំងឺរលាកថ្លើមប្រភេទនេះ នៅពេលកើតភ្លាម ហើយចំពោះទារកខ្លះទៀត គ្រូពេទ្យអាចនឹងចាក់អង្គបដិបក្ស (Antibody) ប្រឆាំងជំងឺរលាកថ្លើមប្រភេទ B (គេដឹងថាជា Immunoglobulin) ថែមទៀតផង។ គ្រូពេទ្យនឹងតាមដាន ហើយធ្វើតេស្តឈាមកូនយើងជាបន្តបន្ទាប់ ព្រោះវាចាំបាច់ណាស់ ដើម្បីដឹងថាការការពារបានពេញលេញ និងត្រឹមត្រូវ។

ទារកនឹងត្រូវចាក់វ៉ាក់សាំងការពារម្តងទៀត នៅក្រោយពេលកើតបានមួយខែ បន្ទាប់មកចាក់ម្តងទៀតបន្ទាប់ពីកើតបាន ២ខែ និងមួយលើកចុងក្រោយ នៅពេលកូនយើងមានអាយុបានមួយឆ្នាំ។ គ្រូពេទ្យនឹងតម្រូវឲ្យកូនធ្វើតេស្តឈាម នៅអាយុគម្រប់មួយឆ្នាំដំបូង ដើម្បីឲ្យដឹងថា តើអស់វីរុសក្នុងឈាមហើយឬនៅ? ការចាក់ថ្នាំបង្ការការពារម្តងទៀតនៅលើកក្រោយ គឺត្រូវបានណែនាំឲ្យចាក់ នៅពេលក្មេងមានអាយុប្រហែល ៥ ឆ្នាំ។ ស្រីៗមានជំងឺរលាកថ្លើមប្រភេទ B អាចបំបៅកូនដោយទឹកដោះម្តាយដោយសុវត្ថិភាព ដរាបណាកូនយើងបានចាក់វ៉ាក់សាំងការពារត្រឹមត្រូវ។

អត្ថបទពាក់ព័ន្ធ៖

ហានិភ័យឆ្លងកាមរោគពេលពពោះ និងវិធីបង្ការ ស្រីៗគួរស្វែងយល់
បង្ការគ្រោះថ្នាក់ ស្រីៗត្រូវចាក់វ៉ាក់សាំងប្រភេទនេះឲ្យបាន៣ខែ មុននឹងយកកូន

២- ជម្រើសព្យាបាលរលាកថ្លើមប្រភេទ B ពេលពពោះ

បើការធ្វើតេស្តឈាមពេលពពោះ បង្ហាញថាគ្នាយើងមានជំងឺរលាកថ្លើមប្រភេទ B គ្រូពេទ្យ ឬគិលានុប្បដ្ឋាយិកា អាចនឹងសុំឲ្យយើងធ្វើតេស្ត និងព្យាបាលបន្ថែម។ គ្រូពេទ្យ នឹងធ្វើតេស្តត្រួតពិនិត្យមើលចំនួនវីរុស នៅក្នុងឈាមយើង ខណៈកម្រិតនៃជំងឺរលាកថ្លើមប្រភេទ B គឺអាស្រ័យលើចំនួនវីរុស បើយើងមានផ្ទុកវីរុសក្នុងឈាមខ្ពស់ យើងនឹងត្រូវបានណែនាំឲ្យធ្វើការព្យាបាលដោយប្រើថ្នាំ Tenofovir (Viread) ។

ការព្យាបាល អាចនឹងចាប់ផ្តើមនៅត្រីមាសទី ៣ នៃការពពោះ ដោយអាស្រ័យលើកម្រិតវីរុសមានផ្ទុកក្នុងឈាម ហើយត្រូវព្យាបាលរយៈពេល ៤ – ១២ សប្តាហ៍បន្ថែមទៀត បន្ទាប់ពីយើងសម្រាលកូនរួច។ គ្រូពេទ្យ អាចនឹងណែនាំឲ្យយើងលេបថ្នាំយូរជាងនេះ ដើម្បីជួយឲ្យសុខភាពទទួលបានអត្ថប្រយោជន៍ល្អកាន់តែច្រើន។

បើស្រីៗគ្នាយើងមានផ្ទុកវីរុសនៅក្នុងឈាមចំនួនតិចតួច គ្រូពេទ្យ នឹងមិនណែនាំឲ្យព្យាបាលអ្វីនៅពេលនេះឡើយ ខណៈថ្នាំព្យាបាលជំងឺរលាកថ្លើមប្រភេទ B គឺមានច្រើនប្រភេទ ខុសៗគ្នា ដោយថ្នាំខ្លះទៀត ត្រូវគេជឿថាគ្មានសុវត្ថិភាពចំពោះស្រីៗកំពុងពពោះនោះទេ។ ដូច្នេះបើគ្នាយើងដឹងថាខ្លួនថា មានជំងឺរលាកថ្លើមប្រភេទ B គួរទៅពិគ្រោះជាមួយគ្រូពេទ្យមុនពេលមានផ្ទៃពោះ។ បើយើងទទួលការព្យាបាលនៅពេលមានផ្ទៃពោះហើយ គួរតែពិភាក្សាជាមួយវេជ្ជបណ្ឌិតបន្ថែម ដើម្បីមានការផ្លាស់ប្តូរថ្នាំ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

Editor HK

អត្ថបទដោយ ចាន់ សុខឡាង · កែ 19/10/2019

កើតរលាកថ្លើមប្រភេទ B ពេលពពោះប៉ះពាល់កូនអត់? គួរព្យាបាលម៉េច?

១- ផលប៉ះពាល់​ពី​ជំងឺ​រលាក​ថ្លើម​ប្រភេទ B ទៅ​គភ៌​ក្នុង​ផ្ទៃ

២- ជម្រើសព្យាបាល​រលាក​ថ្លើម​ប្រភេទ B ពេល​ពពោះ

១- ផលប៉ះពាល់ពីជំងឺរលាកថ្លើមប្រភេទ B ទៅគភ៌ក្នុងផ្ទៃ

២- ជម្រើសព្យាបាលរលាកថ្លើមប្រភេទ B ពេលពពោះ