ប្តីប្រពន្ធភាគច្រើនមិនបានត្រៀមលក្ខណៈគ្រប់គ្រាន់មុនពេលមានកូននោះទេ ច្រើនតែត្រៀមនៅពេលកំពុងពពោះទៅវិញ ជាហេតុធ្វើឲ្យទាំងម្តាយ និងកូនជួបបញ្ហាប្រឈមជាច្រើន។ មិនរាប់បញ្ចូលការត្រៀមលុយកាក់នោះទេ តែប៉ុន្មានចំណុចខាងក្រោមមនេះ គឺជាការត្រៀមលក្ខណៈផ្សេងៗទាក់ទងនឹងរបបអាហារ ទម្លាប់រស់នៅ ការថែទាំសុខភាព សម្រាប់ប្តីប្រពន្ធដែលត្រៀមលក្ខណៈយកកូន ណែនាំដោយលោកស្រីវេជ្ជបណ្ឌិត ទី សុវណ្ណរដ្ឋ សញ្ញាបត្រពីប្រទេសបារាំង។
រឿងសំខាន់ៗប្តីប្រពន្ធត្រូវធ្វើ ដើម្បីត្រៀមលក្ខណៈយកកូន
១. ជួបជាមួយគ្រូពេទ្យ
ការជួបពិគ្រោះជាមួយគ្រូពេទ្យមុនពេលសម្រេចចិត្តយកកូន ពិតជាសំខាន់ខ្លាំងណាស់ តែភាគច្រើនប្តីប្រពន្ធតែងរំលងរឿងនេះ។ គ្រូពេទ្យអាចសាកសួរពីបញ្ហាសុខភាពនាពេលបច្ចុប្បន្នទាំងបុរសទាំងស្ត្រី សួរពីប្រវត្តិជំងឺពីមុនៗ ឬប្រវត្តិរបស់ក្រុមគ្រួសារជាដើម ដើម្បីបង្ការហានិភ័យផ្សេងៗពេលមានផ្ទៃពោះ។បើក្នុងករណីមានភាគីណាមួយកំពុងប្រើថ្នាំព្យាបាលជំងឺ គ្រូពេទ្យអាចនឹងឲ្យបញ្ឈប់ការប្រើថ្នាំ ឬឲ្យផ្លាស់ប្តូរការព្យាបាល បើសិនថ្នាំទាំងនោះអាចប៉ះពាល់កូន។
២. ធ្វើតេស្តឈាម
ត្រូវតេស្តឈាមទាំងពីរនាក់ប្តីប្រពន្ធ មើលមេរោគមួយចំនួនដែលអាចឆ្លងពីប្តីមកប្រពន្ធ និងពីម្តាយទៅកូននៅពេលមានផ្ទៃពោះ ឬពេលសម្រាលកូន។ អ៊ីចឹងពេលយើងដឹងមុន យើងអាចមានវិធានការ ធ្វើម៉េចព្យាបាលពពួកមេរោគទាំងនោះឲ្យនៅក្នុងកម្រិតមួយទាប ដែលមិនមានផលប៉ះពាល់កូន។
៣. ចាក់វ៉ាក់សាំង
ស្ត្រីត្រូវចាក់វ៉ាក់សាំងមួយចំនួនមុនពេលត្រៀមយកកូន ដូចជា វ៉ាក់សាំងការពារជំងឺស្អូច (៣ខែមុនពេលយកកូន) និងវ៉ាក់សាំងការពារជំងឺថ្លើមប្រភេទ B ក្នុងករណីមិនទាន់មានអង់ទីករការពារ។
អត្ថបទពាក់ព័ន្ធ៖ បង្ការគ្រោះថ្នាក់ ស្រីៗត្រូវចាក់វ៉ាក់សាំងប្រភេទនេះឲ្យបាន៣ខែ មុននឹងយកកូន
៤. កាត់បន្ថយការញ៉ាំជាតិកាហ្វេអ៊ីន
ជាតិកាហ្វេអ៊ីន មិនមែនមានតែនៅក្នុងកាហ្វេនោះទេ គ្រាន់តែក្នុងចំណោមភេសជ្ជៈផ្សេង កាហ្វេមានកម្រិតជាតិកាហ្វេអ៊ីនខ្ពស់ជាងគេ។ មិនថា កាហ្វេ តែ ភេសជ្ជៈផ្អែមៗ ទឹកក្រូចកំប៉ុង ឬភេសជ្ជៈប៉ូវកម្លាំង យើងត្រូវកាត់បន្ថយទាំងអស់គ្នា មិនឲ្យលើសពី២ពែង/ថ្ងៃឡើយ ហើយបើមិនញ៉ាំសោះ រឹតតែល្អ។
៥. កុំផឹកស្រា និងជក់បារី
ចំពោះប្តីប្រពន្ធដែលមិនផឹកគ្រឿងស្រវឹង មិនជក់បារី មិនចោទជាបញ្ហានោះទេ តែបើភាគីណាមួយ ឬក៏ទាំងពីរនាក់ មានផឹកគ្រឿងស្រវឹង ឬជក់បារី ចាំបាច់ត្រូវបញ្ឈប់វាភ្លាម នោះទើបមិនប៉ះពាល់ដល់គុណភាពមេជីវិត និងការបង្កកំណើត។
អត្ថបទពាក់ព័ន្ធ៖ ៥ សំណួរ-ចម្លើយ ស្រីៗចង់ដឹងបំផុត ពាក់ព័ន្ធរឿងផឹកស្រាពេលពពោះ
៦. លេបថ្នាំវីតាមីន-ជាតិរ៉ែ
អាស៊ីដហ្វូលិក ជាអ្វីដែលស្រីៗចាំបាច់ត្រូវញ៉ាំរយៈពេល ៣ ខែ មុនពេលមានកូន ហើយត្រូវបន្តញ៉ាំរហូតដល់ពេលពពោះបាន ៣ ខែ ទើបកាត់បញ្ហាប្រឈមជំងឺពកឆ្អឹងកងខ្នងលើទារកបាន។ ក្រៅពីនោះទាំងប្រពន្ធទាំងប្តីត្រូវការនូវពពួកវីតាមីន និងជាតិរ៉ែផ្សេងៗទៀត មានជាតិដែក កាល់ស្យូម ស័ង្កសី សេឡេញ៉ូម អាស៊ីដខ្លាញ់អេមេហ្កា៣ និងវីតាមីន D ជាដើម។
អត្ថបទពាក់ព័ន្ធ៖ ហេតុផលសំខាន់ៗ ស្រីៗគួរញ៉ាំថ្នាំវីតាមីន មុនពេលមានផ្ទៃពោះ
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម