ម៉ាក់ៗជាច្រើនតែងយកចិត្តទុកដាក់ចំពោះសុខភាពរាងកាយ និងបញ្ញាស្មារតីរបស់ទារក ហើយក្រោយពេល ៦ ខែ បានបន្ថែមចំណីអាហារដែលសម្បូរជីវជាតិ ដើម្បីឲ្យកូនកាន់តែឈ្លាសវៃ។ ការសិក្សាបានបង្ហាញថាការប៉ះស្បែក និងស្បែករវាងម្ដាយ-កូនមានអត្ថប្រយោជន៍ខ្លាំងណាស់ចំពោះខួរក្បាលកុមារច្រើនជាងអាហារបំប៉នផ្សេងៗ។
ការសិក្សាថា ស្បែកប៉ះស្បែករវាងកូន និងម៉ាក់មានប្រយោជន៍ចំពោះខួរក្បាលទារក
ត្រួតពិនិត្យដោយ គឹម កាណែល
១- អ្វីជាការប៉ះស្បែក និងស្បែក
បន្ទាប់ពីអ្នកបានកើតកូនហើយ គ្រូពេទ្យនឹងយកកូនអ្នកមកដាក់ពោបពីលើទ្រូងម៉ាក់។ ការប៉ះពាល់គ្នាផ្ទាល់បែបនេះ គឺជាពេលវេលាសំខាន់ដែលយើង និងកូនអ្នកចាប់ផ្ដើមស្គាល់គ្នា ហើយកូនក៏ចាប់ផ្ដើមទទួលអារម្មណ៍កក់ក្ដៅពីម៉ាក់ៗ។
២- ការសិក្សា និងលទ្ធផលគួរឲ្យភ្ញាក់ផ្អើល
អ្នកស្រាវជ្រាវឈ្មោះ Nathalie Maitre នៅមន្ទីរពេទ្យ Nationwide Children’s Hospital បានបកស្រាយការវិវត្តន៍ខួរក្បាលទារក ១២៥ នាក់ដោយមានជំនួយពីមួកអេឡិចត្រូអង់សេហ្វាឡូក្រាម (EEG) ។ ការសិក្សាត្រូវបានធ្វើឡើងលើទារកដែលកើតនៅចន្លោះសប្ដាហ៍ទី ២៤-៣៦ និងទារកកើតនៅសប្ដាហ៍ទី ៣៨-៤២។
អ្នកស្រាវជ្រាវបានរកឃើញថា ការប៉ះស្បែករបស់កូន និងម៉ាក់ៗពេលដំបូងបន្ទាប់ពីកើត មានឥទ្ធិពលលើខួរក្បាលកូន។ ការប៉ះពាល់ផ្ទាល់ស្បែកនិងស្បែកអាចឲ្យមានផលល្អលើប្រព័ន្ធប្រសាទបានជាពិសេសសម្រាប់ទារក ១៥ លាននាក់ដែលកើតមិនគ្រប់ខែរៀងរាល់ឆ្នាំ។ ការស្រាវជ្រាវមុនៗរបស់លោកស្រី Maitre ពីអត្ថប្រយោជន៍នៃការដាក់កូនពោបលើទ្រូងបែបនេះ អាចជួយកុមារពីហានិភ័យនៃការចុះកម្ដៅខ្លាំងនៅក្នុងខ្លួន (Hypothermia) ចំពោះក្មេងដែលកើតមិនគ្រប់ខែបាន។ ដូច្នេះការប៉ះស្បែកគ្នានៅពេលដំបូងរបស់ទារកពិតជាអាចជួយឲ្យខួរក្បាលមានការអភិវឌ្ឍ និងមានសុខភាពល្អក្នុងរយៈពេលវែង។
៣- អត្ថប្រយោជន៍ការប៉ះពាល់ស្បែកនិងស្បែកលើផ្លូវចិត្ត
– ភ្ជាប់ចំណងជាមួយប៉ាម៉ាក់
សាស្ត្រាចារ្យ Gene Cranston Anderson ជាបណ្ឌិតសាស្ត្រាចារ្យនៃការថែទាំកុមារនៅសាកលវិទ្យាល័យ Case Western Reserve University នៅទីក្រុង Cleveland សហរដ្ឋអាមេរិក បានថ្លែងថាទារកអាចស្គាល់សំឡេងប៉ា និងម៉ាក់របស់ពួកគេតាំងពីស្ថិតនៅក្នុងពោះ។ ការដាក់កូនពោបលើទ្រូង មិនត្រឹមតែអាចបង្កើតទំនាក់ទំនងរវាងទារកនិងម៉ាក់ប៉ុណ្ណោះទេ វាថែមទាំងអាចបង្កើតទំនាក់ទំនងរវាងឪពុក និងកូនផងដែរ។
– កាត់បន្ថយការឈឺចាប់ និងភាពតានតឹង
ការទាក់ទងគ្នាស្បែកនិងស្បែករយៈពេល ១០ នាទីក្រោយសម្រាល អាចជួយកាត់បន្ថយកម្រិតអ័រម៉ូនស្ត្រេសរបស់ទារក និងបង្កើនកម្រិតអុកស៊ីតូស៊ីនដែលមាននាទីភ្ញោចដល់ប្រព័ន្ធប្រសាទក្នុងការជួយឲ្យទារកមានអារម្មណ៍មានសុវត្ថិភាព និងស្ងប់ស្ងាត់។ ទារកដែលកើតមិនគ្រប់ខែហើយបានគេងលើទ្រូងម៉ាក់ៗនឹងមានប្រតិកម្មតិចតួច លើតេស្តកែងជើង និងការឈឺចាប់ដទៃដែលអាចកើតមានចំពោះពួកគេ។
– ជួយឲ្យទារកគេងលក់ស្រួល
បើប្រៀបធៀបទៅនឹងទារកដែលចិញ្ចឹមក្នុងកែវ ទារកដែលកើតមកភ្លាមបានដេកនៅលើទ្រូងម្ដាយ គឺអាចគេងលក់ស្រួល និងអាចកាត់បន្ថយនូវកម្រិតស្ត្រេសរបស់ពួកគេបាន។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញដើម្បីស្វែងយល់ពីដំណោះស្រាយរបស់អ្នក។ Hello Health Group មិនចេញ វេជ្ជបញ្ជា មិនធ្វើរោគវិនិច្ឆ័យ ឬការព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យដោយ
គឹម កាណែល
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម