បើរវល់ ហើយចង់រក្សាអត្ថបទទុកអានពេលក្រោយច្រើនប៉ុណ្ណាក៏បាន គ្រាន់តែ Login ហើយចូលទៅកាន់ សុខភាពខ្ញុំ ឥឡូវនេះ!

មាតិកា

រង្វាស់សុខភាព

ចែករំលែក

Cervical Cerclage (ការដេរមាត់ស្បូន)

យល់ដឹងកម្រិតមូលដ្ឋាន

១- តើការដេរមាត់ស្បូនជាអ្វី?

ការដេរមាត់ស្បូន គឺជាការដេរដោយបច្ចេកទេសពិសេសដើម្បីឲ្យមាត់ស្បូនបិទជិតក្នុងអំឡុងពេលមានផ្ទៃពោះ។ ប្រសិនបើជាដឹងថាមាត់ស្បូនខ្សោយយើងអាចធ្វើការដេរបានចាប់ពីសប្ដាហ៍ទី ១៤ ទៅ។ ពេលមានផ្ទៃពោះ មាត់ស្បូននឹងត្រូវបានបិទយ៉ាងជិតដោយឆ្នុកដែលជាទឹករម្អិល។ នៅពេលដែលទារកលូតលាស់សម្ពាធទៅលើមាត់ស្បូនកាន់តែកើនឡើង។ ប្រសិនបើមាត់ស្បូនខ្សោយ មាត់ស្បូននឹងបើកដោយគ្មានការឈឺចាប់ដែល និងធ្វើឲ្យថង់ទឹកភ្លោះលយចេញមកក្រៅហើយបែក។ មាត់ស្បូនដែលខ្សោយអាចធ្វើឲ្យមានការរលូតកូននៅបន្ទាប់ពីសប្ដាហ៍ទី ១២ និងមុនសបា្ដហ៍ទី ២៤។

២- តើដេរមាត់ស្បូនដើម្បីអ្វី?

គ្រូពេទ្យអាចនឹងណែនាំស្រីៗយើងឲ្យដេរមាត់ស្បូន ប្រសិនបើមាត់ស្បូនប្រឈមនឹងការបើកមុនពេលកំណត់កូនត្រូវកើត ឬក្នុងករណីខ្លះនៅពេលដែលមាត់ស្បូនឆាប់បើកពេក។ គ្រូពេទ្យអាចណែនាំយើងដេរមាត់ស្បូនអំឡុងពេលមានគភ៌ដើម្បីបង្ការការកើតមិនគ្រប់ខែប្រសិនបើស្រីៗយើងមាន៖

– ប្រវត្តិរលូតនៅត្រីមាសទី ២ ម្ដង ឬច្រើនជាងម្ដងដែលទាក់ទងទៅនិងការបើកមាត់ស្បូនដោយមិនមានការឈឺចាប់ហើយដោយគ្មានការសម្រាលឬការរបើកស្រោមទឹកភ្លោះ។

– ដេរមាត់ស្បូនមុន ដោយសារមានការបើកមាត់ស្បូនមិនមានការឈឺចាប់នៅត្រីមាសទី ២

– នៅពេលធ្វើការពិនិត្យរាងកាយឃើញថាមាត់ស្បូនបើកនៅត្រីមាសទី ២

– ការរកឃើញថាមាត់ស្បូនខ្លីនៅពេលធ្វើការពិនិត្យដោយម៉ាស៊ីនអេកូ (តិចជាង ២៥ មីលីម៉ែត្រ) មុនសប្ដាហ៍ទី ២៤

ដឹងពីកត្តាប្រឈម

១- កត្តាប្រឈម

ការដេរមាត់ស្បូន គឺមិនធ្វើសម្រាប់មនុស្សគ្រប់គ្នានោះទេ។ វាអាចធ្វើឲ្យមានផលវិបាកធ្ងន់ធ្ងរ ហើយមិនមែនអាចបង្ការការកើតមិនគ្រប់ខែបានរហូតនោះទេ។ យើងត្រូវយល់ដឹងពីហានិភ័យ និងថាតើវាមានប្រយោជន៍សម្រាប់យើងនិងកូនឬអត់។

គ្រូពេទ្យអាចមិនគាំទ្រដេរមាត់ស្បូនទេ ប្រសិនបើយើងមាន៖

– ហូរឈាមតាមទ្វារមាស

– សម្រាលមុនកំណត់

– ការឆ្លងមេរោគក្នុងស្បូន

– ការរបើកស្រោមទឹកភ្លោះមុនពេលកំណត់មិនគ្រប់ខែ៖ នៅពេលដែលស្រោមទឹកភ្លោះដែលការពារទារកពេលនៅក្នុងផ្ទៃធ្លាយ ឬបែកមុនគភ៌មានអាយុ ៣៧ សប្ដាហ៍

– ការមានទំងន់កូនភ្លោះ

– ទារកមានសភាពមិនធម្មតាដែលមិនអាចរស់បាន

– ស្រោមទឹកភ្លោះលយចេញមកក្រៅតាមមាត់ស្បូនដែលបើក

បន្ទាប់ពីដេរមាត់ស្បូន យើងត្រួវទាក់ទងទៅគ្រូពេទ្យជាបន្ទាន់ប្រសិនបើមានការធ្លាយទឹកភ្លោះតាមទ្វារមាស ដែលជាសញ្ញានៃការបែកស្រោមទឺកភ្លោះមិនគ្រប់ខែ។ គ្រូពេទ្យអាចណែនាំយើងដកចេញ ប្រសិនបើមានការបែកស្រោមទឹកភ្លោះមិនគ្រប់ខែ និងការឆ្លងមេរោគក្នុងស្បូនដោយអាស្រ័យទៅតាមដំណាក់កាលនៃគភ៌។

ផលវិបាកមានដូចជា៖

– ការឆ្លងមេរោគ

– ការហូរឈាមតាមទ្វារមាស

– ការរហែកមាត់ស្បូន

– ការលយចេញនៃស្រោមទឹកភ្លោះតាមទ្វារមាស

– ការបែកស្រោមទឺកភ្លោះមុនពេលកំណត់មិនគ្រប់ខែ៖ នៅពេលដែលស្រោមទឹកភ្លោះដែលការពារទារកពេលនៅក្នុងផ្ទៃធ្លាយរឺបែកមុនគភ៌មានអាយុ ៣៧ សប្ដាហ៍

– ការសម្រាលមិនគ្រប់ខែនិងកូនកើតមិនគ្រប់ខែ

– ការរលូត

គ្នាយើងត្រូវចាំថាប្រសិនបើមាត់ស្បូនបើកនៅត្រីមាសទី ២ យើងអាចជួបប្រទះបញ្ហាទាំងនេះបើទោះបីជាមិនបានដេរមាត់ស្បូនក៏ដោយ។

ការយល់ដឹងពីហានិភ័យនិងផលវិបាកមុនធ្វើ ការដេរមាត់ស្បូន ជាការសំខាន់។ ប្រសិនបើមានចម្ងល់អាចទាក់ទងទៅគ្រូពេទ្យ ឬគ្រូពេទ្យវះកាត់ដើម្បីទទួលបានព័ត៌មានបន្ថែម។

រូបដេរមាត់ស្បូន

យល់ដឹងនូវអ្វីដែលបានកើតឡើង

១- តើត្រូវរៀបចំដូចម្តេច?

មុនពេលធ្វើ ការដេរមាត់ស្បូន យើងត្រូវការពិនិត្យអេកូដើម្បីពិនិត្យមើលសញ្ញាជីវិតទារក និងទាត់ចោលភាពមិនប្រក្រតីផ្សេងៗ។

២- តើមានអ្វីកើតឡើងអំឡុងពេលដេរមាត់ស្បូន?

ការវះកាត់នេះជាធម្មតាត្រួវចាក់ថ្នាំស្ពឹកតាមឆ្អឹងខ្នង។ ការដេរមាត់ស្បូនជាធម្មតាចំណាយពេល ២០ ទៅ ៣០ នាទី។

ជើងរបស់យើងនឹងត្រូវដាក់នៅលើឈ្នាន់។ គ្រូពេទ្យផ្នែករោគស្ត្រីនឹងប្រើថ្នាំសម្លាប់មេរោគមកសម្អាតទ្វារមាស រួចនឹងដាក់ប្រដាប់ប្រដារទៅក្នុងទ្វារមាសហើយប្រើវាដើម្បីដាក់ថ្នេរដោយប្រើស្ដុតសប្បនិមិត្តក្រាស់នៅក្នុង និងជុំវិញមាត់ស្បូនរបស់យើង។

ការជាសះស្បើយ

១-តើមានអ្វីកើតឡើងបន្ទាប់ពីដេរមាត់ស្បូន?

យើងអាចត្រលប់ទៅផ្ទះវិញនៅថ្ងៃបន្ទាប់។
មានឈាមហូរតិចតួច ២ ទៅ ៣ ថ្ងៃក្រោយវះកាត់ជារឿងធម្មតា។
អ្នកអាចត្រលប់ទៅមានសកម្មភាពធម្មតាដូចជាការរួមភេទវិញនៅថ្ងៃទី ៧ ឬទី ១០ បន្ទាប់ពីការវះកាត់។
មិនត្រូវធ្វើលំហាត់ប្រាណធ្ងន់ធ្ងរ។
ប្រសិនបើមានការឈឺចាប់ហូរឈាម កន្ត្រាក់ ឬយើងគិតថានឹងសម្រាល ត្រូវរាយការណ៍ទៅគ្រូពេទ្យភ្លាម។ គ្រូពេទ្យផ្នែករោគស្ត្រីររបស់យើងនឹងដកថ្នេរនោះចេញនៅពេលគភ៌មានអាយុ ៣៦ សប្ដាហ៍ ដែលជាទូទៅធ្វើនៅក្នុងបន្ទប់សម្រាល។

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ ចាន់ សុខឡាង · កែ 20/01/2021

Cervical Cerclage​ (ការ​ដេរ​មាត់​ស្បូន)

យល់​ដឹ​ង​​កម្រិត​មូល​ដ្ឋាន