បច្ចុប្បន្នដោយសារការស្រាវជ្រាវវិស័យវេជ្ជសាស្ត្រកាន់តែទំនើប ថ្នាំនេះព្យាបាលជំងឺអេដស៍ជាច្រើន សុទ្ធតែមានប្រសិទ្ធភាពខ្ពស់ ខណៈថ្មីៗនៅអង់គ្លេសបុរសជនជាតិអង់គ្លេសម្នាក់ គឺជាសះស្បើយពីជំងឺអេដស៍ថែមទៀតផង។ គួរចាប់អារម្មណ៍ជាងនេះ អាមេរិក បានចេញថ្នាំព្យាបាលអេដស៍ថ្មី ដោយផ្សំសារធាតុ ២មុខ រួមគ្នា សម្រាប់ព្យាបាលមនុស្សពេញវ័យផ្ទុកមេរោគអេដស៍ តែពុំធ្លាប់ទទួលថ្នាំព្យាបាលមុនមក។

ថ្នាំព្យាបាលជំងឺអេដស៍ថ្មីនេះ ត្រូវគេដឹងថា គឺការផ្សំរួមគ្នារវាងសារធាតុ Dolutegravir និង Lamivudine ដែលមានឈ្មោះ Dovato ត្រូវបានរដ្ឋបាលចំណីអាហារ និងឱសថអាមេរិក FDA ចេញសេចក្តីជូនដំណឹងនៅខែ មេសា ឆ្នាំ ២០១៩ នេះ អនុញ្ញាតឲ្យប្រើប្រាស់ជាផ្លូវការ។

យ៉ាងណាលើប្រអប់ថ្នាំ ក៏មានការណែនាំឲ្យប្រុងប្រយ័ត្នចំពោះអ្នកផ្ទុក ជំងឺអេដស៍ និង ជំងឺថ្លើមប្រភេទ B ផងដែរ ព្រោះអ្នកផ្ទុកជំងឺទាំង ២ ប្រភេទនេះរួមគ្នា គួរបន្ថែមការព្យាបាលទៅលើជំងឺរលាកថ្លើមប្រភេទ B បន្ថែមទៀត ឬក៏អាចនឹងផ្លាស់ប្ដូរថ្នាំព្យាបាលផ្សេងទៀត ព្រោះថា បើអ្នកជំងឺប្រើថ្នាំដែលមានសារធាតុ Lamivudine អាចធ្វើអោយជំងឺរលាកថ្លើមប្រភេទ B វិវត្តកាន់ធ្ងន់ធ្ងរ ដោយសារតែតែវីរុសរលាកថ្លើម ស៊ាំជាមួយនឹងថ្នាំ ធ្វើឲ្យមានបញ្ហាថ្លើម ដូចជា ខ្សោយថ្លើមជាដើម។ ដូច្នេះ អ្នកមានផ្ទុកជំងឺទាំង ២ ប្រភេទនេះ ត្រូវតាមដានសុខភាពបន្ដទៀត ក្រោយឈប់ប្រើថ្នាំនេះ។

ថ្នាំព្យាបាលជំងឺអេដស៍នេះ ក៏បណ្ដាលឲ្យអ្នកជំងឺ ឈឺក្បាល រាក ក្អួត គេងមិនលក់ និងអស់កម្លាំង។ ចំពោះស្រ្ដីពពោះ ចាប់ពីត្រីមាសទី ១ ក៏ត្រូវចៀសវាងប្រើប្រាស់ថ្នាំនេះដូចគ្នា ដោយសារសារធាតុថ្នាំ Dolutegravir ប៉ះពាល់ដល់ការលូតលាស់នៃប្រព័ន្ធប្រសាទទារក (Neural tube)។

ការអនុញ្ញាតឲ្យប្រើប្រាស់ថ្នាំនេះ ក្រោយមានការសាកល្បងលើមនុស្សពេញវ័យ ផ្ទុកជំងឺអេដស៍ចំនួន ១.៤៣៣នាក់ ហើយពុំធ្លាប់ទទួលការព្យាបាលជំងឺនេះពីមុនមក។ ដោយលទ្ធផល រកឃើញថា ថ្នាំមានផ្ទុកសារធាតុ Dolutegravir និង Lamivudine កាត់បន្ថយចំនួនវីរុស HIV ក្នុងឈាមបានច្រើន បើធៀបនឹងថ្នាំផ្សេងទៀត។

អត្ថបទពាក់ព័ន្ធ៖

គួរបញ្ជាក់ថា ក្រសួងសុខាភិបាលអាមេរិក កាលពីខែកុម្ភៈ ២០១៩ បានប្រកាសគំនិតផ្ដួចផ្ដើមលុបបំបាត់ ជំងឺអេដស៍ នៅទូទាំងប្រទេស។ គោលបំណងកាត់បន្ថយការឆ្លងមេរោគនេះឲ្យបាន ៧០% នៅរយៈពេល ៥ ឆ្នាំខាងមុខ និង ៩០% នៅរយៈពេល ១០ ឆ្នាំខាងមុខ។ តាមការប៉ាន់ស្មាន ពលរដ្ឋអាមេរិក ១,១លាននាក់ មានផ្ទុកមេរោគអេដស៍ ប៉ុន្ដែប្រហែល ១៥% ឬ ១/៧ នាក់ មិនដឹងថា ពួកគេឆ្លងមេរោគនេះឡើយ។

​អាមេរិក បញ្ចេញ​ថ្នាំ​ព្យាបាលអេដស៍​ថ្មី ​កាន់​តែ​មាន​ប្រសិទ្ធ​ភាព​ខ្ពស់

អាមេរិក បញ្ចេញថ្នាំព្យាបាលអេដស៍ថ្មី កាន់តែមានប្រសិទ្ធភាពខ្ពស់