គ្នាយើងធ្លាប់ឮពីជំងឺលើសឈាមហើយ ប៉ុន្តែធ្លាប់ដឹងជំងឺបម្រុងលើសសម្ពាធឈាមទេ? ជំងឺបម្រុងលើសសម្ពាធឈាម (Prehypertension) បង្កជាឱកាសខ្ពស់ក្នុងការវិវត្តទៅជាជំងឺលើសឈាម។ ជំងឺបម្រុងលើសសម្ពាធឈាមគឺជាស្ថានភាពសម្ពាធឈាមខ្ពស់ជាងកម្រិតធម្មតាដែលស្ថានភាពនេះមានចាប់ពី ១២០/៨០មិល្លីម៉ែត្របារត ទៅ១៣០/៨៩មិល្លីម៉ែត្របារត។ ជំងឺបម្រុងលើសសម្ពាធឈាមជាសញ្ញាព្រមានមួយថាយើងអាចនឹងកើតមានជំងឺលើសឈាមបាន។ ប៉ុន្តែយើងអាចបង្ការមិនឲ្យជំងឺនេះវិវត្តទៅជាជំងឺលើសឈាមបានដោយយកចិត្តទុកដាក់លើកត្តាប៉ុន្មានខាងក្រោមនេះ។
ធ្លាប់តែឮជំងឺលើសឈាម ចុះជំងឺបម្រុងលើសសម្ពាធឈាមម៉េចវិញ? ការពារដោយវិធីណា?
១. របបអាហារ
សម្រាប់របបអាហារគួរញ៉ាំរបបអាហារដែលសម្បូរដោយបន្លែ ផ្លែឈើ គ្រាប់ធញ្ញជាតិ និងផលិតផលធ្វើពីទឹកដោះគោមានជាតិខ្លាញ់ទាប។ អាហារទាំងនេះជួយគ្រប់គ្រងជាតិខ្លាញ់ និងកូលេស្តេរ៉ូល។ ម៉្យាងទៀតគួរកំណត់បរិមាណជាតិសូដ្យូមដែលអាចធ្វើឲ្យសម្ពាធឈាមឡើង និងបន្ថែមអាហារមានជាតិកាល់ស្យូម ប៉ូតាស្យូម និងម៉ាញ៉េស្យូមច្រើនព្រោះជាតិរ៉ែទាំងនេះជួយបញ្ចុះសម្ពាធឈាម។
២. បន្ថយអំបិល
អ្នកជំនាញជាច្រើនបានណែនាំឲ្យកាត់បន្ថយអំបិលដោយកាត់បន្ថយការញ៉ាំអាហារកែច្នៃ ពិនិត្យមើលស្លាកសញ្ញាលើកញ្ចប់អាហារថាតើមានអំបិលកម្រិតណា ប្រើគ្រឿងទេសជំនួសអំបិល និងកាត់បន្ថយការដាក់អំបិលច្រើនពេលចម្អិនអាហារ។ សមាគមជំងឺបេះដូងសហរដ្ឋអាមេរិកបានណែនាំឲ្យញ៉ាំអំបិល ឬជាតិសូដ្យូម ១ ៥០០មិល្លីក្រាមក្នុងមួយថ្ងៃដែលស្មើនឹង១ស្លាបព្រាកាហ្វេប៉ុណ្ណោះ។
៣. ហាត់ប្រាណ
យកល្អយើងគួរហាត់ប្រាណជាប្រចាំទោះមិនមែនជាការហាត់ប្រាណដោយប្រើកម្លាំងខ្លាំងក៏ដោយ ក៏អាចហាត់យ៉ាងតិច៣០នាទីក្នុងមួយថ្ងៃ។
៤. រក្សាទម្ងន់
ការលើសទម្ងន់អាចបណ្ដាលឲ្យមានជំងឺបម្រុងលើសសម្ពាធឈាមបាន ហើយរបបអាហារដែលល្អ និងការធ្វើចលនារាងកាយឲ្យបានច្រើនគឺអាចជួយសម្រកទម្ងន់ដែលលើសបាន។
៥. កាត់បន្ថយគ្រឿងស្រវឹង
ការផឹកគ្រឿងស្រវឹងច្រើនអាចធ្វើឲ្យសម្ពាធឈាមឡើងខ្ពស់។ ដូចនេះសម្រាប់បុរសគួរផឹកត្រឹមតែ២កែវក្នុងមួយថ្ងៃ និងសម្រាប់ស្ត្រីគួរផឹកតែមួយកែវក្នុងមួយថ្ងៃ។
៦. គ្រប់គ្រងស្ត្រេស
រាងកាយរបស់យើងនឹងផលិតអ័រម៉ូនច្រើននៅពេលទប់ទល់នឹងស្ថានភាពស្ត្រេស ហើយអ័រម៉ូនទាំងនេះបង្កើនសម្ពាធឈាមក្នុងរយៈពេលខ្លីដោយធ្វើឲ្យបេះដូងលោតញាប់ និងសរសៃឈាមរួមតូច។ ទោះបីមិនមានភស្តុតាងច្បាស់ថាមូលហេតុអ្វីបានជាស្ត្រេសអាចបង្កឲ្យលើសសម្ពាធឈាមរយៈពេលវែងក៏ដោយ ប៉ុន្តែការទប់ទល់នឹងស្ថានភាពស្ត្រេសអាចបង្កើនហានិភ័យនេះដោយយើងអាចញ៉ាំច្រើនលើសកំណត់ ជក់បារី ផឹកគ្រឿងស្រវឹង និងញ៉ាំអាហារដែលមិនល្អជាដើម។ ដូចនេះយកល្អយើងគួរគ្រប់គ្រងស្ត្រេសតាមវិធីដែលល្អសម្រាប់សុខភាព។
៧. តាមដានសម្ពាធឈាម
បើអាចយើងគួរតាមដានសម្ពាធឈាមមួយថ្ងៃពីរដងដោយវាស់នៅពេលព្រឹក និងពេលយប់។ យើងអាចទិញឧបករណ៍វាស់សម្ពាធឈាម និងតាមដានដោយខ្លួនឯងនៅផ្ទះ ឬទៅពិនិត្យជាមួយគ្រូពេទ្យក៏បាន។
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ប្រភព
https://www.webmd.com/hypertension-high-blood-pressure/features/prehypertension-risks#1
https://www.mayoclinic.org/diseases-conditions/high-blood-pressure/in-depth/stress-and-high-blood-pressure/art-20044190#:~:text=Your%20body%20produces%20a%20surge,long%2Dterm%20high%20blood%20pressure.