ជាធម្មតាការធ្លាក់សរបស់ស្រី គឺជារឿងធម្មតាទេ វាដូចទៅនឹងជាការសម្អាតប្រព័ន្ធបន្តពូជស្រីៗដែរ។ ប៉ុន្តែមានគ្នាយើងខ្លះ បញ្ហាធ្លាក់ស អាចកើតឡើងខុសប្រក្រតីភ្លាមៗ ដែលវាបញ្ជាក់ពីបញ្ហាសុខភាពណាមួយ កំពុងកើតឡើងក្នុងខ្លួន។ ចុះធ្លាក់សខុសប្រក្រតីដោយសារមូលហេតុអ្វីខ្លះ? គួរឲ្យបារម្ភអត់? ចង់ដឹង អត្ថបទខាងក្រោមនេះ នឹងបញ្ជាក់ប្រាប់។
១- ធ្លាក់សធម្មតា
ធ្លាក់ស គឺជាការធ្លាក់ភ្នាសរអិលផលិតចេញពីក្នុងមាត់ស្បូន ជាផ្នែកខាងក្រោមស្បូន ភ្ជាប់មកកាន់ទ្វារមាស។ ការធ្លាក់សនេះ គឺជួយការពារឲ្យទ្វារមាសមានសំណើម និងការពារជំងឺឆ្លងមួយចំនួន។ បរិមាណសធ្លាក់មក គឺខុសៗគ្នា ចំណែកឯក្លិន និងពណ៌ អាចប្រែពីពណ៌ថ្លាទៅជាសខាប់ ប្រែប្រួលទៅតាមរយៈពេលវដ្ដរដូវស្រីៗយើងផ្ទាល់។ ឧទាហរណ៍ ទ្វារមាសយើងនឹងធ្លាក់សច្រើនពេលកំពុងបញ្ចេញមេជីវិត ឬកំពុងបំបៅដោះ ហើយនឹងថយចុះទៅវិញពេលយើងចាប់ផ្ដើមអស់រដូវ។ ក្លិនអាចខុសគ្នា បើយើងកំពុងពពោះ ឬមិនបានសម្អាតទ្វារមាសត្រឹមត្រូវនោះ។
រាល់បញ្ហាទាំងអស់បានរៀបរាប់ដូចខាងលើ សុទ្ធតែមិនបង្កគ្រោះថ្នាក់ ឬធ្វើឲ្យយើងត្រូវខ្វាយខ្វល់នោះទេ។ ប៉ុន្តែបើក្លិន ក៏ដូចជាពណ៌របស់សមើលទៅខុសប្រក្រតី ពិសេសទ្វារមាសមានការរមាស់ ឬក្រហាយ អាចជាសញ្ញារលាកនៅទ្វារមាស ឬទ្វារមាសយើង កំពុងតែមានបញ្ហាអ្វីមួយជាមិនខាន។
២- ធ្លាក់សខុសប្រក្រតី
មូលហេតុទាំងឡាយណា ធ្វើឲ្យមានអតុល្យភាពរបស់បាក់តេរីល្អក្នុងទ្វារមាស អាចធ្វើសមានក្លិន ពណ៌មិនល្អ ឬធ្លាក់សខុសពីធម្មតា ខណៈខាងក្រោមនេះ ជាមូលហេតុមួយចំនួន អាចធ្វើឲ្យមានអតុល្យភាពបាក់តេរីល្អក្នុងទ្វារមាស៖
– ប្រើប្រាស់ពពួកថ្នាំផ្សះ ឬពពួកថ្នាំស្តេរ៉ូអ៊ីត។
– មានជំងឺឆ្លងបាក់តេរីក្នុងទ្វារមាន (Bacterial Vaginosis) ដែលជាការឆ្លងរោគ បង្កឡើយដោយបាក់តេរី ហើយច្រើនកើតឡើងលើស្រីៗមានផ្ទៃពោះ ឬស្រីៗមានដៃគូររួមភេទច្រើន។
– ថ្នាំពន្យារកំណើត។
– មានជំងឺកាមរោគ ដូចជា ប្រមេះទឹកថ្លា (Chlamydia) និង ប្រមេះទឹកបាយ (Gonorrhea)
– ជំងឺទឹកនោមផ្អែម។
– មានការបង្ករោគនៅអាងត្រគាកក្រោយទទួលការវះកាត់។
– ជំងឺរលាកអាងត្រគាក (PID)។
– ជំងឺទ្រីកូមីណាស់ (Trichomoniasis) ជាការឆ្លងរោគបង្កឡើងដោយប៉ារ៉ាស៊ីត ហើយច្រើនឆ្លងនៅពេលរួមភេទដោយមិនបានការពារ។
– ជំងឺស្វិតទ្វារមាស ជញ្ជាំងទ្វារមាសស្ដើង ស្ងួត និងមានការរលាកនៅជញ្ជាំងទ្វារមាសអំឡុងពេលអស់រដូវ។
– រលាកទ្វារមាស មានរកាំនៅជុំវិញ ឬក្នុងទ្វារមាសតែម្ដង។
– ឆ្លងមេរោគផ្សិតក្នុងទ្វារមាស
– មានប្រើប្រដាប់បាញ់លាងសម្អាតទ្វារមាស ស្រោមអនាម័យ ឬសំឡីអនាម័យស្ទះក្នុងទ្វារមាស។
អត្ថបទពាក់ព័ន្ធ៖
- ស្រីៗ រដូវមកទៀង ឬមិនទៀង អាស្រ័យលើកត្តាទាំងនេះ
- របស់ទាំងអស់នេះ អាចប្រើនៅបរិវេណខាងក្រៅបាន តែហាមដាក់ចូលទ្វារមាស
៣- ទទួលយកដំបូន្មានគ្រូពេទ្យ
បើយើងសង្កេតឃើញសធ្លាក់ចេញពីទ្វារមាសមានលក្ខណៈមិនប្រក្រតី គួរទៅជួបគ្រូពេទ្យរោគស្ត្រីឲ្យបានលឿន។ គ្រូពេទ្យអាចនឹងធ្វើរឿងមួយចំនួនរួមមាន៖
– សាកសួរពីរោគសញ្ញា និងប្រវត្ដររួមភេទរបស់យើង ដូចជា សួរថាតើយើងមានរួមភេទញឹកញាប់ដែរទេ? ថ្មីៗនេះបានរួមភេទជាមួយដៃគូរផ្សេងដែរអត់? ឬយើងមានប្រើថ្នាំពន្យារកំណើតដែរអត់?
– ពេទ្យអាចសុំធ្វើការពិនិត្យត្រង់ទ្វារមាស
– យកសរបស់អ្នកទៅពិនិត្យរកមើលជំងឺឆ្លង
– អាចបូមឈាមយកទៅពិនិត្យរកមើលជំងឺកាមរោគ។
៤- វិធីព្យាបាលបញ្ហាធ្លាក់សខុសប្រក្រតី
ការព្យាបាល គឺខុសៗគ្នា អាស្រ័យទៅមូលហេតុនៃបញ្ហានីមួយៗ ប៉ុន្តែភាគច្រើន ចាប់ផ្ដើមពីការប្រើប្រាស់ថ្នាំពេទ្យជាមុន។ ខាងក្រោមនេះ គឺជាគន្លឹះមួយចំនួនសម្រាប់ការពារជំងឺឆ្លងនៅទ្វារមាស ដែលជាមូលហេតុធ្វើឲ្យមានធ្លាក់សខុសប្រក្រតី៖
– ត្រូវសម្អាតទ្វារមាសជាប្រចាំ ដោយលាងវាថ្នមៗជាមួយសាប៊ូស្រាល និងទឹកក្ដៅឧណ្ហៗ។
– មិនត្រូវប្រើប្រាស់សាប៊ូមានក្លិនខ្លាំង ឬផលិតផលគ្រឿងសំអាងស្រីៗ ឬប្រើប្រដាប់បាញ់សម្អាតទ្វារមាសឡើយ។
– បន្ទាប់ពីចេញពីបន្ទប់ទឹក ត្រូវសម្អាតពីខាងមុខ ជូតទៅខាងក្រោយ ដើម្បីការពារទ្វារមាសទប់ទល់ជាមួយពពួកបាក់តេរី ដែលបណ្ដាលឲ្យមានការបង្ករោគកើតឡើង។
– ស្លៀកខោក្នុងប្រភេទក្រណាត់កូតុងសុទ្ធ និងមិនត្រូវស្លៀកខោអាវតឹងខ្លាំងពេកទេ។
៥- កំណត់ចំណាំសម្រាប់ក្មេងស្រីជំទង់ និងស្រីៗអស់រដូវ
វាជារឿងមិនធម្មតាទេ ដែលក្មេងស្រីមិនទាន់ពេញវ័យ មានបញ្ហាធ្លាក់សខុសពីប្រក្រតី។ ត្រូវប្រញាប់ទៅជួបគ្រូពេទ្យឲ្យបានរហ័ស បើមានបញ្ហានេះកើតឡើង ដោយសារតែសបែបនេះ អាចកើតឡើងបណ្ដាលមកពីរលាកកនៅមាត់ទ្វារមាស បង្កដោយសារពពួកបាក់តេរី Streptococcal។
សម្រាប់ស្រីៗវ័យចំណាស់ ក៏មិនងាយជួបបញ្ហាធ្លាក់សខុសប្រក្រតីដូចគ្នា ហេតុនេះត្រូវប្រញ៉ាប់ទៅជួបជាមួយគ្រូពេទ្យ បើអស់រដូវហើយមានបញ្ហាធ្លាក់សខុសធម្មតា ឬមានធ្លាក់ឈាមតាមទ្វារមាស។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបលផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-ovulation]
