home

តើអ្នកបារម្ភពីអ្វី?

close
មិនត្រឹមត្រូវ
ពិបាកយល់
ផ្សេងៗ

ឬ​ចម្លង​តំណភ្ជាប់

កុំចេះតែមិនអី! បារីបំផ្លាញមាត់ធ្មេញសាហាវណាស់

កុំចេះតែមិនអី! បារីបំផ្លាញមាត់ធ្មេញសាហាវណាស់

ដឹងឮច្រើនឆ្នាំថា ជក់បារី និងប្រើថ្នាំជក់ នាំឲ្យខូចសុខភាព ថែមទាំងអាចបណ្ដាលឲ្យមាន បញ្ហាមាត់ធ្មេញ និងបង្កជាជំងឺអញ្ចាញធ្មេញទៀត។

ជក់បារីអាចធ្វើឲ្យបាត់បង់ជាលិកាជុំវិញធ្មេញ និងកាត់ផ្ដាច់មុខងារកោសិការបស់អញ្ចាញធ្មេញ ធ្វើឲ្យងាយឆ្លងជំងឺផ្សេងៗ។ ខូចជាលិកាអញ្ចាញធ្មេញ អាចបង្អាក់ការដឹកនាំចរន្តឈាម មកចិញ្ចឹមអញ្ចាញធ្មេញ និងពន្យឺតការជាសះ។ បញ្ហាទាំងនោះមានអីខ្លះ?

១- #បញ្ហាពីបារីលើមាត់ធ្មេញ

ផ្សែងបារីប្រមូលផ្ដុំដោយជាតិពុលចម្រុះ និងបង្កបញ្ហាផ្សេងៗ បូករួមទាំងមហារីក។ នៅមានផលអាក្រក់ច្រើនណាស់សម្រាប់មាត់ធ្មេញ៖
– ស្រកឆ្អឹងថ្គាម
– មានកំបោរជាប់ជើងធ្មេញ
– ល្បឿនការជាសះចុះខ្សោយ
– ងាយកើតមហារីក (រាប់តែបរិវេណមាត់)
– ងាយមានជំងឺអញ្ចាញធ្មេញ និងធ្មេញរង្គើ
– រលាកជាលិកាក្នុងមាត់ និងមានជំងឺក្រពេញទឹកមាត់
– បើដាក់ធ្មេញ ហើយដាំបង្គោលក្នុងឆ្អឹងថ្គាម អត់សូវជាប់ល្អ
– ងាយកើតជំងឺផ្ទាំងស (leukoplakia) លើអណ្ដាត និងក្នុងមាត់។

២- #ប្រើខ្សៀនិងបារីស៊ីហ្គាមានគ្រោះថ្នាក់ទេ?

ពួកវាមានបញ្ហាដូចគ្នា ហើយជក់ស៊ីហ្គាច្រើន អាចប៉ះពាល់ ធ្វើឲ្យធ្មេញខ្សោយ បាក់ ប្ដូរពណ៌ និងបញ្ហាជាច្រើនទៀត។ ទោះបីជក់ខ្សៀ និងស៊ីហ្គា មិនមានផ្សែងចូលក្នុងសួត ប៉ុន្តែពួកគេនៅតែមានឱកាសកើតបញ្ហាមាត់ធ្មេញ និងមានក្លិនមាត់អាក្រក់ និងធ្មេញប្រែពណ៌។

៣- #ចុះពពួកថ្នាំហិតនិងទំពា?

មិនថាប្រភេទហិត ឬទំពា មានផ្ដុំសារធាតុគីមី ២៨ ប្រភេទ ដែលអាចបណ្ដាលឲ្យមហារីកមាត់ធ្មេញ បំពង់ក និងបំពង់អាហារ។ ម៉្យាងទៀត ថ្នាំទំពាមានកម្រិតជាតិនីកូទីនច្រើនជាងបារី និងឆាប់ញៀនជាង ហើយថ្នាំហិតមួយកំប៉ុង សម្បូរជាតិនីកូទីនច្រើនជាងបារី ៦០ ដើម។

ថ្នាំជក់ដែលគ្មានផ្សែង អាចបណ្ដាលឲ្យរលាក និងស្រកអញ្ចាញធ្មេញមើលឃើញដល់ឫសធ្មេញ ធ្វើឲ្យឆាប់មានរោគពុកធ្មេញ។ ពេលអញ្ចាញស្រកដល់ឫសធ្មេញ ធ្វើឲ្យធ្មេញឆាប់ស្រៀវ។

ម៉្យាងទៀត ជាតិស្ករនៅក្នុងថ្នាំជក់ដែលគ្មានផ្សែង ធ្វើឲ្យឆាប់ពុកធ្មេញ រួមទាំងផលិតផលថ្នាំជក់គ្មានផ្សែងច្រើនទៀត ដែលផ្ទុកនូវកម្ទេចខ្សាច់ និងថ្មធ្វើឲ្យធ្មេញឆាប់សឹក។

៤- #មធ្យោបាយផ្ដាច់បារី

អ្នកធ្លាប់ប្រើថ្នាំជក់រយៈពេលយូរ ហើយសម្រេចចិត្តផ្ដាច់ឥឡូវនេះមិនហួសពេលទេ ថែមទាំងធ្វើឲ្យសុខភាពមាត់ធ្មេញកាន់តែប្រសើរ។

បើមិនអាចផ្ដាច់បានទាំងស្រុង គួរព្យាយាមកាត់បន្ថយការជក់តាមដែលអាចធ្វើទៅបាន ព្រោះតាមការស្រាវជ្រាវបានបង្ហាញថា អ្នកជក់បារីដែលបានកាត់បន្ថយទម្លាប់ការជក់ច្រើន ធ្វើឲ្យមានហានិភ័យបញ្ហាមាត់ធ្មេញទាប។

តែបើនៅតែពិបាកផ្ដាច់ថ្នាំជក់ ឬបារី អ្នកអាចប្រឹក្សាដើម្បីសុំជំនួយពីពេទ្យ ចេញវេជ្ជបញ្ជា ឲ្យប្រើថ្នាំ ឬឲ្យពេទ្យណែនាំកម្មវិធីព្យាបាលក្នុងការផ្ដាច់ថ្នាំជក់។

កុំចេះតែមិនអី ឥទ្ធិពលរបស់ផ្សែងបារី អាក្រក់លើសអ្វីដែល “Hello គ្រូពេទ្យ” បញ្ជាក់!

ក្នុង​ករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត​ សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​ វេជ្ជបញ្ជា មិន​ធ្វើ​រោគ​វិនិច្ឆ័យ ឬ​ការ​ព្យាបាល​ជូន​ទេ៕

Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

ប្រភព

Smoking and Oral Health. http://www.webmd.com/oral-health/guide/smoking-oral-health#1. Accessed May 17, 2017.

រូបថត​របស់​អ្នក​និពន្ធbadge
ដោយ យ៉ានណែត​ នីគែល កែសម្រួល​ចុងក្រោយ 27/11/2019
ត្រួតពិនិត្យដោយ វេជ្ជ. ចាន់ ស៊ីណេត