រឿងលាបក្រែមគ្មានប្រុសៗណាធ្វើទេ អ៊ីចឹងអត្ថបទនេះ ច្បាស់ជាសម្រាប់ស្រីៗគ្នាយើងហើយ។ ធ្លាប់ឃើញតារាលាបក្រែមមើលទៅឡើង Cute ដល់ពេលខ្លួនឯង ខំរើសក្រែមថ្លៃប៉ុនណា ពណ៌យ៉ាងម៉េចនៅតែមិនពេញចិត្ត។ យ៉ាងណា គួរគិតសុខភាពផង “Hello គ្រូពេទ្យ’ ចង់ណែនាំគ្នាយើងខ្លះៗពាក់ព័ន្ធក្រែមលាបមាត់ និងវិធីជ្រើសក្រែមគួរប្រើ។

១- ក្រែមលាបមាត់អាចធ្វើឲ្យគ្រោះថ្នាក់អត់?

ក្រែមលាបមាត់ ជារឿងដ៏ចម្រូងចម្រាសច្រើនឆ្នាំមកហើយ ដោយទស្សនៈមួយចំនួន លើកឡើងថាវាមានជាតិសំណ អាចគ្រោះថ្នាក់ចំពោះសុខភាព ខណៈខ្លះទៀតលើកឡើងថា អាហារយើងញ៉ាំរាល់ថ្ងៃ ក៏មិនស្អាតទាំងស្រុងដូចគ្នាដែរ។

រដ្ឋបាលចំណីអាហារ និងឱសថអាមេរិក បានធ្វើការស្រាវជ្រាវមួយ លើក្រែមលាបមាត់សរុប ៤០០ ប្រភេទ ដោយលទ្ធផលរកឃើញថា ក្រែមលាបមាត់ទាំងនោះ មានផ្ទុកជាតិសំណចន្លោះពី ០,៩-៣,០៦ PPM (មួយក្នុងមួយលាន) មានន័យថា សំណ គឺមានវត្តមានស្ទើរតែគ្រប់ក្រែមលាបមាត់ដែលកំពុងចរាចរលើទីផ្សារ។

ទោះជាបែបនេះក្តី ស្រីៗជាច្រើន នៅតែយល់ថាក្រែមលាបមាត់ ជួយលើកសម្រស់ឲ្យបានស្អាត និងមិនអាចខ្វះបានក្នុងជីវិត។ យោងទៅលើការសិក្សារបស់សកលវិទ្យាល័យ University of California ចន្លោះពេលពី ២-១៤ ម៉ោង ជាវេលាមធ្យមស្រីប្រើក្រែមលាបមាត់ដែលផ្ទុកជាតិសំណ គឺគ្រោះថ្នាក់ធ្ងន់ធ្ងរចំពោះសុខភាព។ ហេតុនេះ ប្រុសៗនៅចង់ថើបបបូរមាត់ស្រីៗទៀតអត់?

ម៉្យាងទៀត ជាតិសំណ បង្កឲ្យមានជាតិពុលក្នុងខួរក្បាល ហើយកាន់តែធ្ងន់ធ្ងរ ស្រីៗមានពពោះ អាចប៉ះពាល់ដល់គភ៌ក្នុងផ្ទៃ ទទួលយកកម្រិតជាតិពុលខ្ពស់ពីម៉ាក់ៗបាន។ អ្វីគួរឲ្យបារម្ភ រាងកាយមិនអាចបញ្ចេញចោលនូវជាតិសំណបានទេ គឺមានតែបង្កើនបន្ថែមពីមួយថ្ងៃទៅមួយថ្ងៃ។

អត្ថបទពាក់ព័ន្ធ៖

ប្រេងដូងមានប្រយោជន៍មែន ជួយទាំងសុខភាព ទាំងសម្រស់មួយចប់
ឧស្សាហ៍លាបសក់ តិចនិកទាំងនេះអាចជួយកុំឲ្យសក់ខូច និងបែកចុង

២- គួរជ្រើសរើសយកក្រែមលាបមាត់បែបណា?

មានការពិបាក ថាតើក្រែមលាបមាត់ប្រភេទណាមានជាតិសំណតិច ឬច្រើន។ តាមការសិក្សាមួយបង្ហាញថា ក្រែមលាបមាត់ពណ៌ក្រហមផ្ទុកជាតិសំណខ្ពស់បំផុត ប៉ុន្តែដោយសារតែភាពចង់ស្អាត ធ្វើឲ្យស្រីៗភាគច្រើនប្រើក្រែមលាបមាត់ពណ៌ក្រហម ទាំងមិនខ្វាយខ្វល់ពីហានិភ័យ។

យ៉ាងណា បើមិនអាចខ្វះបាន ស្រីៗគួរចេញជ្រើសរើសក្រែមដែលមិនសូវបង្កផលប៉ះពាល់ ដូចជាពិនិត្យលើគុណភាព ពណ៌ កាលបរិច្ឆេទជាដើម។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ប្រើ​ក្រែម​លាប​មាត់​ជួយ​ឲ្យ​ស្អាត​ហើយ តែ​ត្រូវ​ដឹង​ប៉ះពាល់​អី​ខ្លះ​ផង!

ប្រើក្រែមលាបមាត់ជួយឲ្យស្អាតហើយ តែត្រូវដឹងប៉ះពាល់អីខ្លះផង!