ស្វែងយល់ពីការប្រើប្រាស់
១- ថ្នាំ Clotrimazole ព្យាបាលអីខ្លះ?
Clotrimazole ជាថ្នាំសម្រាប់ព្យាបាលការឆ្លងរោគលើស្បែកដូចជា បញ្ហារបកស្បែក (Athlete’s Foot) រមាស់ស្បែកនៅកន្លែងចង្អៀត (Jock Itch) ជំងឺសើស្បែករាងជារង្វង់បង្កដោយផ្សិត (Ringworm) និងជំងឺឆ្លងរោគលើស្បែកផ្សេងៗ។
ក្រៅពីនេះ ថ្នាំ Clotrimazole ត្រូវគេយកទៅប្រើព្យាបាលជំងឺស្បែកមួយចំនួនទៀត មានដូចជា កើតភ្លឺ Pityriasis (Tinea Versicolor) បង្ករពពួកផ្សិតធ្វើឲ្យស្បែកឡើងពណ៌ស ឬខ្មៅខុសធម្មតា នៅត្រង់ ក ទ្រូង ដៃ ឬជើង។ Clotrimazole ជាពពួកថ្នាំប្រឆាំងមេរោគផ្សិត មាននាទីទប់ស្កាត់មិនឲ្យពពួកផ្សិតលូតលាស់បាន។
២- គេប្រើថ្នាំនេះយ៉ាងម៉េច?
អាចប្រើថ្នាំនេះនៅតែលើស្បែកមួយមុខគត់ ដោយត្រូវសម្អាតកន្លែងលាបថ្នាំជាមុន យកថ្នាំលាបលើស្បែកឆ្លងរោគ ហើយជាទូទៅ ត្រូវលាប ២ ដងក្នុងថ្ងៃ ឬតាមការណែនាំរបស់គ្រូពេទ្យអ្នក។ មិនត្រូវប្រើថ្នាំនេះ លើសពីការកំណត់របស់គ្រូពេទ្យទេ ព្រោះមិនត្រឹមតែ មិនអាចជួយឲ្យឆាប់ជាសះស្បើយនោះទេ ផ្ទុយទៅវិញបង្កជាផលរំខានកាន់តែច្រើន។
យើងអាចលាបថ្នាំនេះលើស្បែកមានមេរោគ និងនៅជុំវិញបន្តិចបន្តួចតែប៉ុណ្ណោះ។ បន្ទាប់ពីលាបថ្នាំនេះរួច ត្រូវលាងដៃឲ្យស្អាត មិនត្រូវយកអ្វីមករុំលើមុខរបួស លុះត្រាតែមានការណែនាំឲ្យធ្វើបែបនេះ។ មិនត្រូវយកថ្នាំ Clotrimazole មកលាបលើភ្នែក ច្រមុះ មាត់ ឬប្រដាប់ភេទឡើយ។
ត្រូវប្រើថ្នាំនេះឲ្យគ្រប់កម្រិតតាមវេជ្ជបញ្ជា និងលាបឲ្យបានទៀងពេលវេលាប្រចាំថ្ងៃ ដើម្បីទទួលប្រសិទ្ធភាពព្យាបាលខ្ពស់។
ត្រូវប្រើថ្នាំ Clotrimazole ឲ្យគ្រប់រយៈពេលកំណត់ ទោះបីជារោគសញ្ញាបានធូរស្រាលក៏ដោយ។ បើឈប់ប្រើមុនកំណត់ មេរោគនៅអាចបន្តលូតលាស់ ធ្វើឲ្យយើងមានជំងឺម្តងទៀត។
ប្រាប់ទៅគ្រូពេទ្យបើអាការៈជំងឺនៅដដែល ឬកាន់តែធ្ងន់ធ្ងរ។
៣- រក្សាទុកដោយវិធីណា?
ថ្នាំ Clotrimazole អាចរក្សាទុកបានល្អក្នុងបន្ទប់សីតុណ្ហភាពល្មម ចៀសឆ្ងាយពីពន្លឺថ្ងៃ និងសំណើម។ រក្សាថ្នាំកុំឲ្យខូច មិនត្រូវទុកនៅក្នុងបន្ទប់ទឹក ឬទូទឹកកកទេ។ លើទីផ្សារប្រហែលជាមានថ្នាំម៉ាក Clotrimazole ផ្សេងគ្នា ហើយការរក្សាទុកក៏ខុសគ្នា។ ហេតុនេះសំខាន់ណាស់ ត្រូវពិនិត្យមើលក្រដាសណែនាំផលិតផលពីការរក្សាទុក ឬសួរឱសថការី។ ដើម្បីសុវត្ថិភាពគួរថែរក្សាទុកថ្នាំគ្រប់ប្រភេទឲ្យឆ្ងាយពីដៃក្មេង និងសត្វចិញ្ចឹម។
ពុំគួរចោលថ្នាំតាមបង្គន់ ឬតាមលូបង្ហូរទឹកទេ លើកលែងតែមានការណែនាំពីគ្រូពេទ្យ។ សំខាន់ណាស់ត្រូវកម្ទេចថ្នាំប្រភេទនេះឲ្យបានត្រឹមត្រូវ ពេលហួតកាលកំណត់ ឬលែងប្រើ។ ពិភាក្សាជាមួយឱសថការី សម្រាប់ព័ត៌មានលម្អិតពីរបៀបកម្ទេចថ្នាំ។
កត្តាគួរប្រុងប្រយ័ត្ន
៤- ត្រូវដឹងអ្វីខ្លះមុនប្រើ?
គ្រប់ថ្នាំទាំងអស់សុទ្ធតែមានផលល្អ និងអាក្រក់។ ដូចនេះការសម្រេចចិត្តប្រើប្រាស់ថ្នាំ អាចជារឿងពិបាក ហើយអាចនឹងជួបប្រទះក្រោយប្រើថ្នាំនេះមានដូចជា៖
– ប្រតិកម្មអាលែកហ្ស៊ី៖ ត្រូវប្រាប់គ្រូពេទ្យបើធ្លាប់មានអាការៈមិនស្រួល ឬធ្លាប់មានប្រតិកម្មជាមួយថ្នាំនេះ ឬថ្នាំដទៃ។ ប្រាប់គ្រូពេទ្យបើមានប្រតិកម្មផ្សេងៗ ដូចជា ប្រតិកម្មជាមួយអាហារ ជាតិពណ៌ សាធាតុរក្សាគុណភាពអាហារបានយូរ ឬមានប្រតិកម្មជាមួយសត្វ។ សម្រាប់ថ្នាំ គ្មានវេជ្ជបញ្ជាត្រូវអានក្រដាសណែនាំ ឬពិនិត្យរកមើលគ្រឿងផ្សំរបស់ថ្នាំជាមុន។
– សម្រាប់ក្មេង៖ ថ្នាំនេះត្រូវបានគេធ្វើតេស្តលើកូនក្មេង ក្នុងកម្រិតថ្នាំសម្រាប់ព្យាបាល។ ប៉ុន្តែការធ្វើតេស្តមិនបានបង្ហាញអំពីផលរំខាន ឬបញ្ហាអ្វីធំដុំលើសផលរំខានមានចំពោះមនុស្សធំនោះទេ។
– សម្រាប់មនុស្សចាស់៖ មានថ្នាំជាច្រើន មិនបានសិក្សាលើមនុស្សចាស់ ហេតុនេះទើបមិនអាចដឹងថា ថ្នាំទាំងនោះដំណើរបានល្អលើមនុស្សចាស់ ដូចមនុស្សពេញវ័យដែរអត់។ ទោះយ៉ាងណា មិនមានព័ត៌មានណាមួយ បញ្ជាក់ពីផលរំខានផ្សេងៗ លើមនុស្សពេញចាស់ ក្រោយប្រើថ្នាំនេះនៅឡើយទេ។ ក្រុមអ្នកជំនាញគិតថា ថ្នាំនេះមិនអាចផ្តល់ផលរំខានលើមនុស្សចាស់ ច្រើនជាងមនុស្សពេញវ័យដូចគ្នា។
៥- មានសុវត្ថិភាពចំពោះស្រ្តីមានផ្ទៃពោះ និងបំបៅដោះកូនទេ?
មិនមានព័ត៌មានពីសុវត្ថិភាពការប្រើថ្នាំនេះ ទាំងអំឡុងពេលមានផ្ទៃពោះ និងបំបៅដោះបេប៊ីនៅឡើយទេ។ ហេតុនេះពិភាក្សាជាមួយវេជ្ជបណ្ឌិត ពីគុណប្រយោជន៍ និងហានិភ័យមុនពេលប្រើ គឺជារឿងចាំបាច់។ យោងតាមរដ្ឋបាលចំណីអាហារ និងឱសថ នៅអាមេរិក (FDA) ថ្នាំនេះត្រូវបានចាត់ថ្នាក់ក្នុងបញ្ជីថ្នាំគ្រោះថ្នាក់កម្រិត C សម្រាប់ស្ត្រីមានផ្ទៃពោះ។
ចំណាត់ថ្នាក់កម្រិតគ្រោះថ្នាក់នៃថ្នាំទៅលើស្ត្រីមានផ្ទៃពោះរបស់ FDA មានដូចខាងក្រោម៖
– A = គ្មានគ្រោះថ្នាក់
– B = គ្មានគ្រោះថ្នាក់ ក្នុងការសិក្សាមួយចំនួនឮ
– C = អាចមានគ្រោះថ្នាក់ខ្លះៗ
– D = មានភស្តុតាងជាវិជ្ជមានថាមានគ្រោះថ្នាក់
– X = ហាមប្រើ
– N = មិនមានព័ត៌មាន។
ស្វែងយល់ពីផលរំខាន
៦- ផលរំខានមានអ្វីខ្លះ?
ត្រូវបញ្ឈប់ប្រើថ្នាំ Clotrimazole ភ្លាម ហើយប្រញាប់ទាក់ទងទៅគ្រូពេទ្យជាបន្ទាន់ បើប្រទះរោគសញ្ញាប្រតិកម្មថ្នាំ ដូចជា ពិបាកដកដង្ហើម បំពង់ករួមតូច ហើមបបូរមាត់ អណ្តាត មុខ ឬកន្ទួលរមាស់។
ផលរំខានរបស់ថ្នាំនេះ មិនសូវមានឃើញកើតឡើងច្រើនទេ។ យើងអាចបន្តប្រើប្រាស់ថ្នាំ និងត្រូវពិភាក្សាជាមួយគ្រូពេទ្យ បើអ្នកមានបញ្ហាដូចជា៖
– ចង្អោរ ឬឈឺក្រពះ
– ក្អួត
– រមាស់
– មានអារម្មណ៍មិនស្រួលក្នុងមាត់
មនុស្សគ្រប់គ្នា មិនប្រាកដថាមានរោគសញ្ញាដូចគ្នាទាំងអស់ទេ នៅអាចមានរោគសញ្ញាផ្សេងទៀត ហេតុនេះបើមានចម្ងល់ អាចពិភាក្សាជាមួយគ្រូពេទ្យ ឬឱសថការីបន្ថែម។
ស្វែងយល់ពីអន្តរកម្មថ្នាំ
៧- អន្តរកម្មថ្នាំ
ថ្នាំយើងកំពុងប្រើមួយចំនួន អាចធ្វើឲ្យប៉ះពាល់ប្រសិទ្ធភាពថ្នាំ Clotrimazole ឬបង្កើនផលប៉ះពាល់នៃថ្នាំកាន់តែច្រើន។ ដើម្បីចៀសវាងអន្តរកម្មពីថ្នាំនេះ គួររក្សាទុកបញ្ជីឈ្មោះថ្នាំទាំងអស់យើងកំពុងប្រើ ទាំងមាន ឬគ្មានវេជ្ជបញ្ជា និងផលិតផលពីរុក្ខជាតិ យកបញ្ជីនោះទៅឲ្យវេជ្ជបណ្ឌិត ឬឱសថការីពិនិត្យមើល។ ដើម្បីសុវត្ថិភាព កុំចាប់ផ្ដើមប្រើ ឬឈប់ប្រើ ផ្លាស់ប្ដូរកម្រិតថ្នាំដោយគ្មានការណែនាំ និងយល់ព្រមពីវេជ្ជបណ្ឌិតឲ្យសោះ។
ប្រើប្រាស់ Clotrimazole ជាមួយថ្នាំដទៃទៀត ពិសេសថ្នាំ Fentanyl, Tacrolimus, Trimetrexate អាចបណ្តាលឲ្យផលរំខានកាន់តែច្រើន ប៉ុន្តែពេលខ្លះការប្រើប្រាស់ថ្នាំពីរមុខចូលគ្នា ជាជម្រើសល្អសម្រាប់ព្យាបាលជំងឺ ហេតុនេះគ្រូពេទ្យអាចសម្រេចធ្វើការកាត់បន្ថយកម្រិតថ្នាំឲ្យទាប ឬកាត់បន្ថយកុំឲ្យប្រើប្រាស់ថ្នាំញឹកញាប់ពេក។
៨- អន្តរកម្មជាមួយអាហារ ឬគ្រឿងស្រវឹង
អាហារ និងគ្រឿងស្រវឹងអាចធ្វើឲ្យដំណើរការរបស់ថ្នាំ មានការប្រែប្រួល អាចធ្វើឲ្យមានគ្រោះថ្នាក់ ឬផលប៉ះពាល់កាន់តែធ្ងន់ធ្ងរ។ ត្រូវពិភាក្សាជាមួយគ្រូពេទ្យ ឬឱសថការីដើម្បីដឹងពីប្រភេទអាហារ និងគ្រឿងស្រវឹងទាំងនោះ មុនពេលចាប់ផ្តើមប្រើប្រាស់ថ្នាំ។
៩- អន្តរកម្មជាមួយសុខភាព
ថ្នាំ Clotrimazole អាចមានអន្តរកម្មជាមួយបញ្ហាសុខភាពមួយចំនួនធ្វើឲ្យស្ថានភាពសុខភាពកាន់តែធ្ងន់ធ្ងរ ឬប្រសិទ្ធភាពថ្នាំធ្លាក់ចុះ។ សំខាន់បំផុត ត្រូវប្រាប់គ្រូពេទ្យគ្រាប់បញ្ហាសុខភាពយើងកំពុងមានបច្ចុប្បន្ន។
ស្វែងយល់ពីកម្រិតថ្នាំ
ព័ត៌មានទាំងនេះ មិនបានរាប់ជាការណែនាំរបស់គ្រូពេទ្យនោះទេ។ ត្រូវតែពិភាក្សាជាមួយគ្រូពេទ្យ ឬឱសថការី មុនពេលចាប់ផ្តើមប្រើប្រាស់ថ្នាំប្រភេទនេះ។
១០- មនុស្សពេញវ័យត្រូវប្រើថ្នាំកម្រិតណា?
– ព្យាបាលជំងឺ Tinea Corporis៖ លាបថ្នាំ Clotrimazole ឲ្យបានសព្វលើស្បែកដែលឆ្លងរោគ និងតំបន់ជុំវិញនោះឲ្យបានលឿន លាប ២ ដង/ថ្ងៃ រយៈពេល ៤ សប្តាហ៍ (អាស្រ័យទៅតាមស្ថានភាព និងប្រភេទមេរោគនៅលើស្បែក)។
– ព្យាបាលជំងឺ Tinea Cruris៖ លាបថ្នាំ Clotrimazole ឲ្យបានសព្វលើស្បែកដែលឆ្លងរោគ និងតំបន់ជុំវិញនោះឲ្យបានលឿន លាប ២ ដង/ថ្ងៃ រយៈពេល ២ សប្តាហ៍ (អាស្រ័យទៅតាមស្ថានភាព និងប្រភេទមេរោគនៅលើស្បែក)។
– ព្យាបាលទឹកស៊ីជើង Tinea Pedis៖ លាបថ្នាំ Clotrimazole ឲ្យបានសព្វលើស្បែកដែលឆ្លងរោគ និងតំបន់ជុំវិញនោះឲ្យបានលឿន លាប ២ ដង/ថ្ងៃ រយៈពេល ៤-៨ សប្តាហ៍ (អាស្រ័យទៅតាមស្ថានភាព និងប្រភេទមេរោគនៅលើស្បែក)។
– ព្យាបាលជំងឺ Cutaneous Candidiasis៖ លាបថ្នាំ Clotrimazole ឲ្យបានសព្វលើស្បែកដែលឆ្លងរោគ និងតំបន់ជុំវិញនោះឲ្យបានលឿន លាប ២ ដងក្នុងមួយថ្ងៃ រយៈពេល ២-៤ សប្តាហ៍ (អាស្រ័យទៅតាមស្ថានភាព និងប្រភេទមេរោគនៅលើស្បែក)។
– ព្យាបាលជំងឺ Tinea Versicolor៖ លាបថ្នាំ Clotrimazole ឲ្យបានសព្វលើស្បែកដែលឆ្លងរោគ និងតំបន់ជុំវិញនោះឲ្យបានលឿន លាប ២ ដងក្នុងមួយថ្ងៃ រយៈពេល ២-៤ សប្តាហ៍ (អាស្រ័យទៅតាមស្ថានភាព និងប្រភេទមេរោគនៅលើស្បែក)។
១១- ក្មេងត្រូវប្រើកម្រិតណា?
– ព្យាបាលជំងឺ Tinea Corporis លើក្មេងអាយុ ៣ ឆ្នាំឡើង៖ លាបថ្នាំ Clotrimazole ឲ្យបានសព្វលើស្បែកដែលឆ្លងរោគ និងតំបន់ជុំវិញនោះឲ្យបានលឿន លាប ២ ដង/ថ្ងៃ រយៈពេល ៤ សប្តាហ៍ (អាស្រ័យទៅតាមស្ថានភាព និងប្រភេទមេរោគនៅលើស្បែក)។
– ព្យាបាលជំងឺ Tinea Cruris លើក្មេងអាយុ ៣ ឆ្នាំឡើង៖ លាបថ្នាំ Clotrimazole ឲ្យបានសព្វលើស្បែកដែលឆ្លងរោគ និងតំបន់ជុំវិញនោះឲ្យបានលឿន លាប ២ ដងក្នុងមួយ/ថ្ងៃ រយៈពេល ២ សប្តាហ៍ (អាស្រ័យទៅតាមស្ថានភាព និងប្រភេទមេរោគនៅលើស្បែក)។
-ព្យាបាលទឹកស៊ីជើង (Tinea Pedis) លើក្មេងអាយុ ៣ ឆ្នាំឡើង៖ លាបថ្នាំ Clotrimazole ឲ្យបានសព្វលើស្បែកដែលឆ្លងរោគ និងតំបន់ជុំវិញនោះឲ្យបានលឿន លាប ២ ដង/ថ្ងៃ រយៈពេល ៤-៨ សប្តាហ៍ (អាស្រ័យទៅតាមស្ថានភាព និងប្រភេទមេរោគនៅលើស្បែក)។
-ព្យាបាលជំងឺ Cutaneous Candidiasis លើក្មេងអាយុ ៣ ឆ្នាំឡើង៖ លាបថ្នាំ Clotrimazole ឲ្យបានសព្វលើស្បែកដែលឆ្លងរោគ និងតំបន់ជុំវិញនោះឲ្យបានលឿនលាប ២ ដង/ថ្ងៃ រយៈពេល ២-៤ សប្តាហ៍ (អាស្រ័យទៅតាមស្ថានភាព និងប្រភេទមេរោគនៅលើស្បែក)។
-ព្យាបាលជំងឺ Tinea Versicolor លើក្មេងក្មេងអាយុ ៣ ឆ្នាំឡើង៖ លាបថ្នាំ Clotrimazole ឲ្យបានសព្វលើស្បែកដែលឆ្លងរោគ និងតំបន់ជុំវិញនោះឲ្យបានលឿន លាប ២ ដង/ថ្ងៃ រយៈពេល ២-៤ សប្តាហ៍ (អាស្រ័យទៅតាមស្ថានភាព និងប្រភេទមេរោគនៅលើស្បែក)។
១២- មានទម្រង់បែបណាខ្លះ?
ថ្នាំ Clotrimazole មានក្នុងកម្រិត និងទម្រង់ដូចខាងក្រោម៖
– ថ្នាំលាបប្រភេទជែល កម្រិត ១ភាគរយ
– ថ្នាំគ្រាប់សុលតាមទ្វារមាស ១០០មិល្លីក្រាម និង ៥០០មិល្លីក្រាម
– ថ្នាំលាបលើស្បែក កម្រិត ១ភាគរយ។
១៣- ករណីបន្ទាន់ ឬប្រើថ្នាំលើសកម្រិត
សូមទូរសព្ទទៅផ្នែកសង្គ្រោះបន្ទាន់ ១១៩ ឬប្រញាប់ទៅមន្ទីរពេទ្យនៅជិតបំផុត។
១៤- ករណីភ្លេចប្រើថ្នាំ
បើភ្លេចលាបថ្នាំ សូមលាបវិញភ្លាម ប៉ុន្តែបើកៀកពេលត្រូវប្រើថ្នាំបន្ទាប់ ត្រូវរំលងថ្នាំភ្លេចនោះ ប្រើថ្នាំតាមពេលត្រូវប្រើបន្តបានហើយ កុំលាបថ្នាំពីរកម្រិតក្នុងពេលតែមួយ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នកជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
