ការភ្លេចភ្លាំងគឺជារឿងធម្មតាសម្រាប់មនុស្សយើងគ្រប់រូប នៅពេលដែលជីវិតប្រចាំថ្ងៃកាន់តែមានភាពមមាញឹកច្រើន។ ប៉ុន្តែប្រសិនបើអាការៈនេះកើតឡើងញឹកញាប់ពេក នឹងជះឥទ្ធិពលមិនល្អដល់យើង និងអ្នកនៅជុំវិញខ្លួន។ ការភ្លេចភ្លាំងអាចកើតឡើង ដោយសារតែតំណពូជ និងកត្តាជាច្រើនទៀត។
យ៉ាងណាមិញ តាមការស្រាវជ្រាវបានបង្ហាញថា របបអាហារ និងបែបបទក្នុងការរស់នៅ ក៏ប៉ះពាល់យ៉ាងខ្លាំងដល់ការចងចាំផងដែរ។
ហេតុដូច្នេះហើយ ដើម្បីបង្កើនការចងចាំឲ្យកាន់តែប្រសើរឡើង យើងអាចសាកល្បងអនុវត្តវិធីសាស្ត្រងាយៗទាំង៥យ៉ាងនេះ។
១. ញ៉ាំស្ករតិចតួច
ការញ៉ាំស្ករច្រើនពេក នឹងធ្វើឲ្យយើងប្រឈមមុខនឹងបញ្ហាសុខភាព និងជំងឺរ៉ាំរ៉ៃជាច្រើន។ មិនតែប៉ុណ្ណោះ វាក៏ជំរុញឲ្យការចងចាំយើងចុះខ្សោយផងដែរ។ យោងតាមការសិក្សាមួយទៅលើមនុស្សចំនួន៤ពាន់នាក់ បានបង្ហាញថា ការញ៉ាំភេសជ្ជៈដែលមានជាតិស្ករច្រើន នឹងធ្វើឲ្យថាមពលខួរក្បាលថយចុះ ក៏ដូចជាការចងចាំចុះខ្សោយ។
២. ខ្លាញ់ត្រី
ខ្លាញ់ត្រីសម្បូរទៅដោយអាស៊ីដខ្លាញ់អូមេហ្គា៣ អាស៊ីដអ៊ីកូសាផេនតេនិច (EPA) និងអាស៊ីដដូកូសាហេហ្សៀនិច (DHA)។ ជាតិខ្លាញ់ទាំងនេះ មានសារប្រយោជន៍ដល់សុខភាពរាងកាយយ៉ាងខ្លាំង ដែលអាចជួយកាត់បន្ថយអត្រាកើតជំងឺបេះដូង កាត់បន្ថយការរលាក ស្ត្រេស និងការថប់បារម្ភជាដើម។
៣. ធ្វើសមាធិ
ការធ្វើសមាធិផ្ដល់ផលវិជ្ជមានដល់សុខភាពយើងដ៏សម្បើម។ វាមិនត្រឹមតែធ្វើឲ្យយើងមានអារម្មណ៍ធូរស្រាល និងស្ងប់ចិត្តប៉ុណ្ណោះទេ ប៉ុន្តែនៅជួយកាត់បន្ថយស្ត្រេស ការឈឺចាប់ ធ្វើឲ្យសម្ពាធឈាមទាប ព្រមទាំងជួយបង្កើនការចងចាំផងដែរ។
៤. រក្សាទម្ងន់ខ្លួនសមស្រប
ទម្ងន់ខ្លួនសមស្រប មានប្រយោជន៍យ៉ាងខ្លាំងដល់សុខុមាលភាព ហើយក៏ជាវិធីសាស្ត្រដ៏ល្អបំផុតក្នុងការថែទាំរូបរាងកាយ ក៏ដូចជាចិត្តគំនិតឲ្យស្ថិតក្នុងលក្ខខ័ណ្ឌកំពូលផងដែរ។ តាមការសិក្សាមួយចំនួនបានបង្ហាញថា ការធាត់ជ្រុល គឺមានហានិភ័យខ្ពស់ក្នុងការថយចុះនៃការចងចាំ។
៥. គេងគ្រប់គ្រាន់
នៅពេលដែលយើងគេងមិនបានគ្រប់គ្រាន់ ការចងចាំរបស់យើងក៏ចាប់ផ្ដើមចុះខ្សោយជាលំដាប់ ដែលធ្វើឲ្យយើងឆាប់ភ្លេចភ្លាំង ទោះបីជារឿងរ៉ាវនោះទើបនឹងកើតឡើងក៏ដោយ។ បើមិនចង់ឲ្យបញ្ហានេះ ប៉ះពាល់ដល់សមត្ថភាពខួរក្បាលទេ យើងគួរចាប់ផ្ដើមកែប្រែទម្លាប់ចូលគេងយប់ជ្រៅពេកដោយងាកមកគេងត្រឹមម៉ោង១០យប់ជំនួសវិញ។
ការធ្វើបែបនេះ មិនត្រឹមតែធ្វើឲ្យខួរក្បាលរបស់យើងកាន់តែចងចាំបានល្អនោះទេ សូម្បីតែសម្រស់ក៏កាន់តែក្មេងជាងវ័យមួយកម្រិតដែរ។ អ្នកជំនាញសុខភាពបានណែនាំឲ្យមនុស្សពេញវ័យគេងឲ្យបានចាប់ពី៧ម៉ោង ទៅ៩ម៉ោងក្នុងមួយថ្ងៃ។
[embed-health-tool-bmi]
