ការប្រៀបធៀបកូនជាមួយក្មេងដទៃ ជាវិធីសាស្ត្រចិញ្ចឹមកូនទូទៅមួយ ដើម្បីបញ្ជាក់ពីការអនុវត្តរបស់ក្មេង ដែលម៉ាក់ប៉ាមួយចំនួនចូលចិត្តនិយាយឲ្យកូនឮ។ “មើលកូនគេរៀនបានសុទ្ធតែលេខមួយ កូនឯងគ្រាន់តែរៀនសោះក៏ពិបាកដែរ” នៅមានពាក្យច្រើនផ្សេងៗទៀត ដែលម៉ាក់ប៉ាខ្លះនិយមប្រើពេលប្រៀបធៀបកូនជាមួយអ្នកដទៃ ព្រោះតែចង់ឲ្យកូនធ្វើកិច្ចការបានល្អដូចកូនគេ។
ហេតុផល ៥យ៉ាង ម៉ាក់ប៉ាល្មមឈប់ប្រៀបធៀបកូនជាមួយក្មេងដទៃ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ប៉ុន្តែ ការអប់រំកូនបែបនេះ ប៉ះពាល់ខ្លាំងណាស់ទៅលើការលូតលាស់របស់កូន ពិសេសបញ្ហាផ្លូវអារម្មណ៍ ហេតុនេះហើយ ម៉ាក់ប៉ាគួរកែទម្លាប់ ឬបញ្ឈប់ការប្រៀបធៀបនេះ។
ហេតុផលមិនល្អនៃការប្រៀបធៀបកូនជាមួយអ្នកដទៃ
១. ភាពតានតឹង ស្ត្រេស
នៅពេលប៉ាម៉ាក់ប្រៀបធៀបកូនខ្លួនជាមួយអ្នកដទៃ អាអូននឹងមានអារម្មណ៍ថាទទួលសម្ពាធពីខាងក្នុងគ្រួសារ។ តួនាទីរបស់យើងមិនមែនដាក់សម្ពាធ បណ្ដាលឲ្យកូនកើតថប់បារម្ភ ឬគេងមិនលក់ទេ។ យើងគួរអង្គុយស្ដាប់ហេតុផលកូនថា តើអ្វីដែលរំខានដល់កូនធ្វើកិច្ចការមិនបានល្អ រួចរកដំណោះស្រាយជាមួយគ្នា។
២. ជំនឿទុកចិត្តលើខ្លួនធ្លាក់ចុះ
មួយថ្ងៃៗឮតែពាក្យពីម៉ាក់ប៉ាថា ខ្លួនមិនល្អដូចកូនគេ អាអូននឹងចាប់ផ្ដើមជឿថាខ្លួនឯងអន់ជាងគេ ធ្វើកិច្ចការមិនល្អទៅតាមការរំពឹងទុករបស់ម៉ាក់ប៉ាខ្លួន។ ជួនកាល អាអូនខំប្រឹងហើយ តែសមត្ថភាពកូនធ្វើបានតែប៉ុណ្ណឹង ហើយត្រូវមកឮពាក្យស្ដីបន្ទោសទៀត ធ្វើឲ្យបាត់បង់ទំនុកលើខ្លួន។ អារម្មណ៍នេះប៉ះពាល់ខ្លាំងទៅដល់ការលូតលាស់ផ្ទាល់ខ្លួន និងការសិក្សារបស់កូន។
៣. បំបាត់ទេពកោសល្យ
ម៉ាក់ប៉ាដែលប្រៀបធៀបកូនខ្លួនជាមួយក្មេងដទៃ ជាទូទៅមើលមិនឃើញពីសមត្ថភាពពិត ឬទេពកោសល្យរបស់កូនខ្លួនទេ។ ឧ. កូនយើងមានទេពកោសល្យផ្នែកនិពន្ធ តែម៉ាក់ប៉ាចង់ឲ្យកូនធ្វើពេទ្យ ត្រូវឲ្យកូនខំរៀនមុខវិទ្យាផ្នែកពេទ្យទាំងដែលកូនមិនស្រលាញ់។ នេះបណ្ដាលឲ្យទេពកោសល្យដែលកូនមាន ពោលគឺដុងដែលកូនមានត្រូវបាត់បង់ទទេ។
៤. បាត់បង់ទំនាក់ទំនងល្អក្នុងគ្រួសារ
ពេលឮតែពាក្យមិនល្អពីមាត់ម៉ាក់ប៉ាខ្លួនឯង វាបញ្ជាក់ច្បាស់ៗថា ម៉ាក់ប៉ាមិនសូវសប្បាយចិត្តពេលយើងនៅក្បែរទេ ព្រោះឃើញមុខដឹងតែ នឹកឃើញរឿងកូនធ្វើមិនបានល្អដូចកូនគេ។ ដូចនេះហើយ វាធ្វើឲ្យកូនបាត់ភាពជឿជាក់លើម៉ាក់ប៉ា ដែលអាចបណ្ដាលឲ្យមានបញ្ហាអភិវឌ្ឍន៍ ឬអាកប្បកិរិយាមិនសមរម្យពេលកូនពេញវ័យ។
៥. បង្កើតអាកប្បកិរិយាមិនល្អ
ប្រសិនបើការខំប្រឹងប្រែងអស់ពីសមត្ថភាពរបស់កូន ត្រូវបានមើលរំលងពីម៉ាក់ប៉ាខ្លួនម្ដងហើយម្ដងទៀត ភាគរយខ្ពស់ណាស់ដែលកូនលែងខ្វល់ខ្វាយនឹងផ្គាប់ចិត្តម៉ាក់ប៉ាតទៅទៀត ជាហេតុអាចបណ្ដាលឲ្យអាអូនមានចរិតមិនល្អ លែងខំប្រឹងប្រែងរៀនសូត្រទៀត និងងាកទៅធ្វើរឿងដែលម៉ាក់ប៉ាមិនចូលចិត្តកាន់តែច្រើន។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម