ម៉ាក់ៗណាដែលទើបមានកូនដំបូង ហើយដោះគ្មានក្បាល ឬហៅថាដោះខ្វាក់ ពិតជាពិបាកក្នុងការបំបៅកូនហើយ។ ក្នុងករណីនេះ ទោះម៉ាក់ៗសម្បូរទឹកដោះយ៉ាងណាក៏ ពិបាកក្នុងការបំបៅដែរ កូនមិនព្រមបឺតជញ្ជក់ ព្រោះគ្មានក្បាលដោះ។
ដើម្បីជាការចែករំលែកអ្នកនាង សៀវ សាវឌី អ្នករស់នៅភ្នំពេញបានឲ្យដឹងពីវិធីបូមដោះឲ្យមានក្បាល ដោយគ្រាន់តែទិញសឺរ៉ាំងចាក់ថ្នាំលេខ ២០ ហើយកាត់ក្បាលសឺរ៉ាំងនោះចោល។ បុគ្គលិកផ្នែកគ្រប់គ្រងនៅផ្សារទំនើបរូបនោះបានបន្ថែមទៀតថា ត្រូវកាត់ក្បាលសឺរ៉ាំងឲ្យឃើញប្រហោងធំ រួចយកដងសារាងមកដាក់ខាងកាត់ បន្ទាប់មកយកគូទសឺរ៉ាំងទៅបូមនឹងក្បាលដោះ ដើម្បីកុំឲ្យវាលឹបពេក។ ការដែលយើងឆ្លាស់ដងមកវាងក្បាលវិញ ព្រោះខ្លាចមុខកាត់នោះមិនស្មើ អាចបណ្ដាលឲ្យដោះមានរបួស។
អ្នកនាងបន្តថា ក្រោយសម្រាលកូនរួច ប្រសិនបើជួបបញ្ហាដោះខ្វាក់នេះ ហើយកូនពិបាកបៅ គួរតែសាកធ្វើបែបនេះ ព្រោះគាត់ធ្វើទៅទទួលបានលទ្ធផលប្រសើរ ហើយបូករួមនឹងឲ្យកូនព្យាយាមបៅឲ្យបានច្រើន ទើបមានក្បាលដោះឲ្យកូនបៅធម្មតាបាន។
អត្ថបទពាក់ព័ន្ធ៖ វិធីបំបៅកូនដោយទឹកដោះ ម៉ាក់ៗថ្មីថ្មោងគួរតែចេះ
តែម៉ាក់ៗខាងលើបានណែនាំថា ការធ្វើបែបនេះមានអាការៈឈឺចាប់បន្តិចហើយ ប្រសិនបើគ្មានការអត់ទ្រាំទេនោះ មិនអាចទទួលបានផលឡើយ។ វិធីមួយនេះមានប្រសិទ្ធភាពខ្ពស់ ចំណាយអស់តិច ហើយមិនប៉ះពាល់ចំពោះសុខភាពទៀតផង។
ប្រធានផ្នែកសម្ភព និងរោគស្រ្តី នៃមន្ទីរពេទ្យបង្អែកមិត្តភាពកម្ពុជា-ចិន សែន សុខ លោកវេជ្ជបណ្ឌិត ចាន់ ស៊ីណេត បានឯកភាពតាមបទពិសោធរបស់ម៉ាក់ៗខាងលើ ហើយលោកថា នៅមានវិធីមួយដែលអាចជួយឲ្យក្បាលដោះម៉ាក់ៗមិនលឹបនោះ គឺត្រូវឧស្សាហ៍ម៉ាស្សាដោះ ដើម្បីឲ្យសាច់ដុំដោះរីកប៉ោងជាងមុន។
ក្នុងករណីមានសំណួរ ឬមន្ទិលសង្ស័យជុំវិញបញ្ហាសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
