ចូលចិត្តព័ត៌មាន “Hello គ្រូពេទ្យ” សូមចូលរួមស្ទង់មតិនៅទីនេះ។ មតិអ្នកទាំងអស់គ្នា ពិតជាមានតម្លៃសម្រាប់ “Hello គ្រូពេទ្យ” អាចកែលម្អព័ត៌មានឲ្យកាន់តែប្រសើរ!
ម៉ាក់ប៉ាណាក៍ដូចគ្នាដែរ សុទ្ធតែចង់ឲ្យកូនៗលូតលាស់បានល្អ និងសម្រេចទៅតាមបំណងដែលកូនប្រាថ្នា ជាពិសេសគឺកូនលូតលាស់ពោរពេញដោយក្ដីស្រឡាញ់ និងភាពសប្បាយរីករាយ។ តែបើចង់ឲ្យកូនធំដឹងក្ដីដោយភាពវិជ្ជមាន និងសប្បាយរីករាយ យើងជាម៉ាក់ប៉ាគួរចិញ្ចឹមបីបាច់កូនដោយរបៀបណាទើបល្អ?
ទាក់ទងនឹងការចិញ្ចឹមកូននេះ លោកវេជ្ជបណ្ឌិត សូរ ប៉េង ឯកទេសជំងឺកុមារ បានពន្យល់ឲ្យដឹងថា ចំពោះប៉ាម៉ាក់គ្រប់រូប មាននិយមន័យនៃពាក្យភាពវិជ្ជមានខុសៗគ្នា ហើយរបៀបនៃការចិញ្ចឹមកូនក៏មិនដូចគ្នាទាំងអស់ដែរ។ ប៉ុន្តែ បើយើងចង់ឲ្យកូនធំធាត់ដោយភាពវិជ្ជមាន ឬក្លាយជាក្មេងក្លាហាន ម៉ាក់ប៉ាគួរ៖
ទី១. បណ្ដោយកូនខ្លះ (កុំទម្រើសកូន)
ទី២. កុំឲ្យកូនលេងគ្រឿងអេឡិចត្រូនិចច្រើន
ទី៣. លើកទឹកចិត្តកូន
ទី៤. ឲ្យកូនដោះស្រាយបញ្ហាដោយផ្ទាល់។ល។
លោកបន្តថា ចំពោះភាពវិជ្ជមាននៃការលូតលាស់របស់កូនតូចៗពាក់ព័ន្ធតាំងពីនៅក្នុងផ្ទៃម្ដាយមកម៉្លេះ អ៊ីចឹងហើយទើបយើងត្រូវឧស្សាហ៍និយាយជាមួយកូនក្នុងពោះ ឲ្យម៉ាក់ៗមានអារម្មណ៍ល្អអំឡុងពេលពពោះ ឬឲ្យម៉ាក់ៗចៀសវាងមើលរឿង ឬជួបប្រទះហេតុការណ៍ធ្វើឲ្យភ័យ ឬពិបាកចិត្តជាដើម។
បន្ថែមពីលើអ្វីដែលវេជ្ជបណ្ឌិតជំងឺកុមាររូបនេះបានរៀបរាប់ខាងលើនេះ ម៉ាក់ប៉ាអាចសាកល្បងធ្វើតាមវិធីប៉ុន្មាននេះ ដើម្បីចិញ្ចឹមកូនពោរពេញដោយភាពសប្បាយរីករាយ និងក្លាហានបានដូចជា៖
– ចេះសរសើរ ពេលកូនធ្វើបានល្អ (តែកុំហួសហេតុ)
– ទទួលយកទាំងភាពជោគជ័យ និងបរាជ័យរបស់កូន
– បង្រៀនកូនឲ្យស្គាល់ពីការដឹងគុណ
– បង្រៀនកូនពីទំនួលខុសត្រូវ។ល។
មុននឹងចង់ឲ្យកូនលូតលាស់ដោយក្ដីរីករាយ ម៉ាក់ប៉ាក៏ត្រូវប្រាកដផងដែរថា យើងផ្ដល់ជាគំរូល្អទៅដល់កូន បង្កើតទំនាក់ទំនងល្អជាមួយកូនៗ និងបរិយាកាសនៅក្នុងគ្រួសារមិនអាប់អួ។ល។ ប៉ាម៉ាក់ដែលមានភាពសប្បាយរីករាយច្រើន កូនៗក៏ពោរពេញដោយក្ដីរីករាយ និងភាពវិជ្ជមានតាមហ្នឹងដែរ តែបើមួយថ្ងៃៗម៉ាក់ប៉ាគិតតែឈ្លោះគ្នា ក្នុងផ្ទះមានរឿងក្ដៅក្រហាយ ក្មេងក៏មិនអាចទទួលបានក្ដីរីករាយសប្បាយបានដែរ។
[embed-health-tool-vaccination-tool]
