បើរវល់ ហើយចង់រក្សាអត្ថបទទុកអានពេលក្រោយច្រើនប៉ុណ្ណាក៏បាន គ្រាន់តែ Login ហើយចូលទៅកាន់ សុខភាពខ្ញុំ ឥឡូវនេះ!

មាតិកា

រង្វាស់សុខភាព

ចែករំលែក

ខែទី ១៥៖ គេសប្បាយចិត្តគេ ដល់ពេលដើរដួលៗហើយ

ការលូតលាស់ និងអាកប្បកិរិយា

១- កូនចេះអីខ្លះ?

ក្នុងខែទី១៥ នេះអាអូនអាចចេះដើរតិចៗហើយ។ គេកំពុងសប្បាយចិត្តនឹងការសាកល្បង ឬសមត្ថភាពថ្មីដែលមាន តែអត់អីទេ បណ្ដោយគេទៅ។ ទោះបីជាដួលបន្តិចបន្តួចក៏មិនអីដែរ។ ជួយកូន បង្រៀនកូនឲ្យដើរបន្ថែម ឬ អាចរកជំនួយដូចជាដាក់រទេះ ដើម្បីឲ្យកូនទប់ខ្លួន ពង្រឹងជំហរដើរជាដើម។

ខែទី ១៥៖ គេសប្បាយចិត្តគេ ដល់ពេលដើរដួលៗហើយ

កូនចង់បានឯករាជ្យជាងមុន។ កូនចាប់ផ្តើមចង់ចូលរួមអង្គុយញ៉ាំអាហារដោយខ្លួនឯងជាមួយយើង ជាជាងញ៉ាំម្នាក់ឯង។ ពេលនេះ ម៉ាក់រវល់បំផុតគឺរឿង ដូរខោទឹកនោម និងដុះធ្មេញឲ្យកូន។

ពេលអាយុបាន ១៥ខែកូនយើងអាច៖

– និយាយបានយ៉ាងតិច៣ពាក្យ

– យល់នូវប្រយោគបញ្ជាខ្លះៗ

– ស្គាល់ផ្នែកផ្សេងៗនៃដងខ្លួន

– គូរកុល័រទៀន

– បោះបាល់ រត់ និងវារ

– ដើរបានដោយខ្លួនឯង។

២- បង្រៀនកូនបែបណា?

អាយុប៉ុណ្ណេះ រពឹសចាប់មិនឈ្នះ ប៉ុន្តែបើប៉ាម៉ាក់ អាចរៀបចំឲ្យអាអូន ចាប់ផ្ដើមអានសៀវភៅបាន ជាទម្លាប់ដ៏វិសេសវិសាលបំផុត។ បើគេមិនកាន់សៀវភៅ ក៏គួរអានឲ្យកូនស្ដាប់ ឬចាក់សំឡេង (ដូចជា វីដេអូ យូធូប) ឲ្យកូនស្ដាប់ ព្រោះក្មេងៗចូលចិត្តស្តាប់រឿងនិទានណាស់។

ក្មេងខ្លះអាចមានអត្តចរិតអៀនខ្មាសមិនសូវចេះនិយាយស្តី តែក្មេងខ្លះអៀនតែជាមួយមនុស្សដែលគេទើបជួបដំបូងទេ។

លើសពីនេះទៀតការបំបែកពួកគេចេញពីយើងអាចជាមូលហេតុធ្វើឲ្យប៉ះពាល់ដល់ទំនាក់ទំនងក្នុងសង្គម និងភាពក្លាហានកូនជាមួយក្មេងដទៃទៀត។

ពេលកូនមិនហ៊ានចូលក្នុងសកម្មភាពណាមួយ មិនត្រូវបង្ខំកូនទេ។ គួរទុកពេលឲ្យគេត្រៀមខ្លួន និងនិយាយពីចំណុចល្អៗដែលពួកគេធ្លាប់ចូលលេងជាមួយមិត្តភក្តិពីមុន (សរសើរ ពីរឿងល្អៗដែលកូនមាន)។

ប្រយ័ត្នមួយទៀត រឿងក្មេងៗឈ្លោះប្រកែក រវាយតបគ្នា ព្រោះដូចដឹងស្រាប់ក្មេងៗចិត្តច្រើន ស្រឡាញ់គ្នាក៏លឿន ត្រូវគ្នាក៏លឿន ហើយឈ្លោះគ្នាក៏លឿនដូចគ្នា។

ក្មេង១ខូប

សុខភាព និងសុវត្ថិភាព

៣- ពិភាក្សាជាមួយពេទ្យរឿងអីខ្លះ?

ពេលទៅជួបពេទ្យ មានសំណួរមួយចំនួនដែលពេទ្យអាចសួរដូចជា៖

– អាអូនញ៉ាំម៉េចដែរ? ញ៉ាំ១ថ្ងៃប៉ុន្មានដង?

– បត់ជើងទៀងទាត់អត់? លាមកមានការផ្លាស់ប្តូរអត់?

-គេងម៉េចដែរ? ហើយគេង១ថ្ងៃប៉ុន្មានដង?

ក្មេងៗអាយុ ១-២ ឆ្នាំ ត្រូវគេង ១៣-១៤ម៉ោង/ថ្ងៃ។

សំណួរទាំងអស់នេះអាចឲ្យគ្រូពេទ្យដឹងពីការវិវត្តរបស់កូន ហើយបើមានចម្ងល់អ្វីបន្ថែមសូមពិគ្រោះជាមួយគ្រូពេទ្យ។

៤- ត្រូវដឹងពីអីខ្លះ?

ក្នុងខែនេះអាអូនលូតលាស់ខ្លាំងណាស់។

-ទម្ងន់៖ ៩,២-១៣,៦គីឡូក្រាម (ប្រុស) និង៨,៦-១២,៥ គីឡូក្រាម (ស្រី)

-កម្ពស់៖ ៧៥-៨៤ សង់ទីម៉ែត្រ (ប្រុស) និង ៧៣-៨៣ សង់ទីម៉ែត្រ (ស្រី)

-ទំហំក្បាល៖ ៤៥-៥០ សង់ទីម៉ែត្រ(ប្រុស) និង ៤៤-៤៨ សង់ទីម៉ែត្រ(ស្រី)។

តារាងលូតលាស់អាចឲ្យយើងដឹងពីការលូតលាស់អាអូន។ គ្រូពេទ្យវាស់ទំហំទាំងនេះ ដើម្បីឲ្យប្រាកដថាអាអូនពិតជាលូតលាស់ល្អ និងដើម្បីប្រៀបធៀបជាមួយការលូតលាស់របស់ក្មេងដទៃទៀត។

ការព្រួយបារម្ភ

៥- រឿងអីខ្លះគួរបារម្ភ?

ដុះធ្មេញហើយ ចិត្តច្រើន រករឿងច្រើន។ បើលេងជាមួយក្មេងផ្សេង អាចខាំបើអត់ពេញចិត្ត។ នេះមិនមែនជាទម្លាប់ល្អទេ បើបណ្ដោយ។ ត្រូវពន្យល់ និងចាប់ផ្ដើមបង្រៀនកូន ថាធ្វើបែបនេះអត់ល្អ ហើយចាប់ផ្ដើមគិតដល់រឿងវិន័យ ដែលនិយាយគ្នាថា តើកូនអត់ស្ដាប់ម៉ាក់ ឬប៉ា ទទួលពិន័យអីឡើងវិញ។

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ Duk Panharat · កែ 19/03/2021

ខែទី ១៥៖ គេ​សប្បាយ​ចិត្ត​គេ ដល់​ពេល​ដើរដួលៗហើយ

ការ​លូត​លាស់ និង​អាកប្បកិរិយា