ការលូតលាស់ និងអាកប្បកិរិយា
១- កូនចេះអីខ្លះ?
ក្រៅពីមានការរីកចម្រើនខាងភាសា កូននៅពេលនេះកំពុងចេញចរិតមួយគឺចង់បញ្ជា ហើយត្រួតត្រាគេ។ ពេលខ្លះអាអូនអាចនិយាយមកយើងថា “ម៉ាក់មកនេះ! ប៉ាមកអង្គុយនៅនេះ! ពាក់អាវឲ្យអូន!’ ឬបញ្ជាឲ្យយកនេះយកនោះជាដើម។ អំឡុងនេះក្មេងកំពុងគិតថាខ្លួនមានអំណាចជាងគេហើយជឿថាគេគ្រប់គ្នានឹងធ្វើតាមគេ។
មិនត្រឹមតែប៉ុណ្ណោះ ម៉ាក់ប៉ានឹងឃើញកូនធ្វើរឿងកំប្លែងៗ ដូចជាសម្តីលេងសើចច្រើន សំឡេង និងមុខកំប្លែងៗ។
២- ជួយកូនបែបណា?
ទោះជាពេលនេះពិបាក ប្រកែកជាមួយកូនដែលកំពុងលូតលាស់នេះក៏ដោយ តែយើងអាចបង្រៀនគេឲ្យចេះប្រើភាសាទន់ភ្លន់ ប្រើពាក្យ “សុំ’ ពេលដែលគេចង់បានអ្វីមួយ។ ប្រសិនជាប៉ាម៉ាក់មានអារម្មណ៍ថាកំពុងពិបាកយកឈ្នះភាពមានះរបស់កូន ចូរប្រើសំឡេងដូចកូនក្មេង កំប្លែងៗនិយាយជាមួយគេ ឬនៅពេលអានរឿងឲ្យកូនស្តាប់។
បើមិនទាន់បានបង្រៀនកូនប្រើកន្ថោរ ឬបង្រៀនដែរតែមិនបានសម្រេច ពេលនេះជាពេលដ៏ល្អដើម្បីចាប់ផ្តើមម្តងទៀត។ កូនយើងពេលនេះកំពុងចង់បានឯករាជ្យ ហើយគេអាចដើរទៅបន្ទប់ទឹកខ្លួនឯងបាន។ ពេលខ្លះគេនៅភ័យខ្លាចនៅឡើយ ដូច្នេះហើយបានជាម៉ាក់ប៉ា ត្រូវបង្រៀនគេជាមុន។
ត្រូវពន្យល់ និងបង្រៀនកូនពីរបៀបប្រើបង្គន់ ដូចជារបៀបអង្គុយលើបង្គន់ របៀបចាក់ទឹក ឬចុចទឹក ឬបិទគម្របចានបង្គន់ជាដើម។
គួរជូនអាអូនទៅបង្គន់រៀងរាល់ ២-៣ម៉ោងម្តង ដើម្បីកុំឲ្យគេជុះនោម ឬបត់ជើងធំដោយចៃដន្យ។ សូមបង្កើតវាជាទម្លាប់ ឧទាហរណ៍ រម្លឹកកូនឲ្យទៅបន្ទប់ទឹកពេលព្រឹក មុនគេងថ្ងៃ និងពេលគេងយប់។ បន្ទាប់ពីប្រើបង្គន់ហើយ ឲ្យកូនរៀនចុចទឹកបង្គន់ដោយខ្លួនឯងហើយលាងដៃ។
សុខភាព និងសុវត្ថិភាព
៣- ពិភាក្សាជាមួយពេទ្យរឿងអីខ្លះ?
ជួនកាលក្មេងអាយុ ២ឆ្នាំ អាចខ្លាចច្រើនពេកបើតាមស្មាន ប៉ុន្តែជាទូទៅវាជារឿងធម្មតាទេ។ យ៉ាងណាមិញបើភាពភ័យខ្លាចរបស់គេធ្វើឲ្យប៉ះពាល់ដល់សកម្មភាពគ្រួសារ ក្លាយជាលេសមិនទៅសាលា រំខានដំណេករបស់គេ និងបង្កបញ្ហាដល់អាកប្បកិរិយា សូមទៅពិគ្រោះជាមួយគ្រូពេទ្យ ហើយបើចាំបាច់យើងគួរជួបជាមួយគ្រូពេទ្យឯកទេសផ្លូវចិត្ត។
ការព្រួយបារម្ភ
៤- រឿងអីខ្លះគួរបារម្ភ?
ក្មេងដែលមានជំងឺ Autism មិនអាចប្រាស្រ័យទាក់ទងល្អជាមួយអ្នកដទៃនោះទេ។ ភាគច្រើនគេមិនមានទំនាក់ទំនងរាងកាយជាមួយឪពុកម្តាយ ចូលចិត្តសំឡឹងអ្នកផ្សេងជាប់ភ្នែក មិនមើលមុខគេ -ល-។ បើសិនជាសង្កេតឃើញកូនបាត់បង់សមត្ថភាពរាងកាយ ភាសា និងជំនាញដែលគេគួរចេះ ឬក៏គេចាប់ផ្តើមដកខ្លួនចេញពីសកម្មភាពផ្សេងៗ មិនមានការរីកចចម្រើន ឬលូតលាស់យឺតយ៉ាវ ទាំងនេះជារឿងដែលយើងត្រូវតែទៅរកគ្រូពេទ្យឲ្យបានឆាប់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
