បើក្មេងលង់ទឹក នេះជាវិធីសង្គ្រោះបឋមជួយបានភ្លាមៗ

ករណីលង់ទឹក ងាយនឹងកើតលើក្មេងៗណាស់ ទោះទឹករាក់ក៏ដោយ ក៏អាចលង់ដែរ។ ប៉ាម៉ាក់គួរស្វែងយល់ពីអាការៈ និងវិធីសង្គ្រោះបឋម ដើម្បីជួយក្មេងឲ្យបានទាន់ពេល។

១- អ្វីជាសញ្ញាលង់ទឹក?

លង់ទឹក សំដៅនៅពេលសួតពេញដោយទឹក ធ្វើឲ្យជនរងគ្រោះសន្លប់បាត់ស្មារតី មិនកម្រើក មិនមានសកម្មភាពនៅក្នុងទឹក។ ពេលខ្លះ ករណីលង់ទឹក ជាហេតុការណ៍កើតឡើងយ៉ាងស្ងៀមស្ងាត់ ជនរងគ្រោះអាចមានអាការៈល្ហិតល្ហៃ អណ្ដែត ឬលិចក្នុងទឹក ទាំងមិនដឹងខ្លួន។

មនុស្សលង់ទឹក ជាទូទៅក្បាលនឹងលេចចេញលឹមៗនៅលើផ្ទៃទឹក ហើយមាត់របស់គេច្រើនបើកធំ។ ជនរងគ្រោះច្រើនតែព្យាយាមដើម្បីផ្ងារឡើង ការដកដង្ហើមរបស់ជនរងគ្រោះលឿនៗ តែខ្លីៗ ហើយភ្នែកបើកធំៗ និងមានអារម្មណ៍ភ័យខ្លាច។ បើសិនគេនៅតែបង្ខំហែលទឹក នោះកម្លាំងគេនឹងចុះខ្សោយ ធ្វើឲ្យមិនអាចហែលបាន ឬហែលផុតគ្រោះថ្នាក់នោះឡើយ។

២- វិធីសង្គ្រោះ ពេលមនុស្សលង់ទឹក

– វិធីសង្គ្រោះ៖ ត្រូវចាប់ផ្ដើមបញ្ចូលដង្ហើមតាមមាត់ និងមាត់ភ្លាមៗ កាន់តែលឿនកាន់តែល្អ សង្កត់បេះដូង ដើម្បីឲ្យចលនាឈាមរត់ទៅកាន់ខួរក្បាល ដើម្បីខួរក្បាលទទួលបានអុកស៊ីហ្សែន។ ត្រូវសង្កត់បេះដូង ៣០ ដង ទើបបញ្ចូលដង្ហើមតាមមាត់ ២ ដង ដោយវិធីនេះត្រូវធ្វើភ្លាមៗ ទោះជានៅលើទូក កំពុងពាក់អាវសង្គ្រោះក៏ដោយ ឬនៅពេលយើងបានជួយយកជនរងគ្រោះមកដល់កន្លែងគោក ឬមានទឹករាក់។ ប្រសិនបើជនរងគ្រោះជាក្មេង វិធីសង្គ្រោះនេះ គួរធ្វើរហូតទាល់តែទៅដល់មន្ទីរពេទ្យ ជាពិសេស បើក្មេងនៅក្នុងទឹកយូរ (ពិសេសទឹកត្រជាក់ខ្លាំង)។

– របួសក៖ បើជនរងគ្រោះមានរបួសក (ឧទាហរណ៍របួសក ដោយសារគ្រោះថ្នាក់ហក់ចូលទឹក) ត្រូវការពារផ្នែកក កុំឲ្យបត់ ឬបង្វិល។ តែបើជនរងគ្រោះជាក្មេងវិញ និងនៅក្នុងទឹកនៅឡើយ គួរជួយឲ្យគាត់បណ្ដែតខ្លួនលើទឹក រហូតទាល់តែដាក់ក្ដារជំនួយឆ្អឹងខ្នង (Spine board) ឬត្រូវចាំរហូតទាល់តែមានមនុស្សមកជួយយកគាត់ ដោយទ្រក្បាល និងខ្នង។

– ក្អួត៖ អាការក្អួត តែងកើតឡើងធម្មតា នៅពេលពោះយើងពេញដោយទឹក ដែលយើងបានផឹកអំឡុងពេលកំពុងលង់។ បើក្អួត ត្រូវប្រញាប់បង្វែរក្មេងទៅផ្នែកម្ខាង ឬឲ្យឱនមុខចុះក្រោម និងព្យាយាមការពារកុំឲ្យទឹកចូលក្នុងសួត។ សួត ជាទូទៅ គឺមិនមានទឹកទេ ដោយសារការការពារពីសន្ទះបំពង់សំឡេង។ ត្រូវចៀសវាងការដាក់សម្ពាធទៅលើពោះអំឡុងពេលកំពុងសង្គ្រោះ ព្រោះវាអាចធ្វើឲ្យកើតជំងឺក្អួតបាន។

លង់ទឹក Hello គ្រូពេទ្យ

អត្ថបទពាក់ព័ន្ធ៖

ក្មេងអាយុប៉ុន្មានទើបអាចលេបថ្នាំគ្រាប់បាន?
បើអូនៗរបួសដោយសារឆក់ខ្សែភ្លើង ប៉ាម៉ាក់ត្រូវធ្វើម៉េច?

៣- ត្រូវធ្វើម៉េច ដើម្បីចៀសវាងពីការលង់ទឹក?

– មិនត្រូវបណ្ដោយក្មេងក្រោមអាយុ ៣ ឆ្នាំ លេងទឹកដោយគ្មានមនុស្សធំនៅក្បែរជាដាច់ខាត។ ក្មេងតូចៗទើបចេះដើរ ក៏អាចលង់ទឹក ទោះទឹកមានជម្រៅត្រឹម ៥ សង់ទីម៉ែត្រក៏ដោយ។

– មិនត្រូវទុកឲ្យក្មេងទើបចេះដើរ នៅជិតធុងទឹកចំណុះចាប់ពីប្រហែល ១៩ លីត្រ ដោយគ្មានមនុស្សធំនៅជិតឡើយ ព្រោះក្មេងចូលចិត្តអើតមើលអ្វីដែលនៅក្នុងនោះ ហើយបើធ្លាក់ចូល ហើយលង់ទឹកនោះ នឹងពិបាកចាក់ទឹកក្នុងធុងធំបែបនេះចេញណាស់។

– មិនត្រូវទុកក្មេងមិនចេះហែលទឹក ឲ្យនៅជិតអាងទឹកដោយគ្មានមនុស្សធំនៅក្បែរទេ ព្រោះក្មេងភាគច្រើនលង់ទឹកនៅក្នុងអាងទឹកតាមផ្ទះ ច្រើនជាងតាមមាត់សមុទ្រ ឬអាងទឹកសាធារណៈ។

– មិនត្រូវទុកក្មេងឲ្យនៅជិតកន្លែងស៉្បា ឬអាងទឹកក្ដៅដោយគ្មានមនុស្សធំឡើយ។ គ្រោះថ្នាក់អាចមិនត្រឹមតែលង់ទឹកប៉ុណ្ណោះទេ អាចមានក្មេងអាចជាប់ក្នុងបំពង់បង្ហូរខ្យល់ និងមានកម្ដៅក្ដៅខ្លាំងទៀតផង។

– ត្រូវសាកល្បងរៀបចំពេលបង្រៀនកូនឲ្យចេះហែលទឹកមុនអាយុ ៨ ឆ្នាំ (ក្មេងៗទូទៅចាប់ផ្ដើមអាចរៀនបានពីអាយុ ៤ឆ្នាំ)។

– ត្រូវប្រយ័ត្នចំពោះក្មេងគ្រប់វ័យ ដោយពិនិត្យមើលជម្រៅទឹក មុននឹងឲ្យពួកគេលេង និងចៀសវាងកុំឲ្យពួកក្មេងមុជចូលទៅក្នុងបាតអាងទឹក។

– ត្រូវប្រយ័ត្នចំពោះក្មេង កុំឲ្យពួកគេទប់ដង្ហើម ហើយនៅក្រោមទឹកយូរពេក ធ្វើបែបនេះ អាចនាំឲ្យគេសន្លប់នៅក្រោមទឹកបាន។

– ត្រូវប្រយ័ត្ន ទើបចេះហែលទឹកថ្មីៗ កុំឲ្យហែលទឹកតែម្នាក់ឯង ត្រូវមានគ្នាហែលជាមួយ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ គឹម កាណែល · កែ 06/02/2020

បើ​ក្មេង​លង់​ទឹក នេះជា​វិធី​សង្គ្រោះ​បឋម​ជួយ​បាន​ភ្លាមៗ

បើក្មេងលង់ទឹក នេះជាវិធីសង្គ្រោះបឋមជួយបានភ្លាមៗ