ម៉ាក់ប៉ាច្បាស់ជាធ្លាប់ឮពាក្យ Prebiotics តាមការផ្សព្វផ្សាយពាណិជ្ជកម្មម្សៅទឹកដោះជាញឹកញាប់។ ចុះមានឆ្ងល់អត់ អីទៅជា Prebiotics? Prebiotics សំខាន់យ៉ាងចំពោះទារក ពិសេសកូនទើបចេះដើរ?
១- អ្វីទៅជា Prebiotics?
Prebiotics គឺជាបណ្តុំអាហារសរសៃពិសេសមួយ (កាបូអ៊ីដ្រាត) សម្រាប់ជំរុញឲ្យមានការលូតលាស់ Probiotics ដែលជាបាក់តេរីល្អជួយទ្រទ្រង់រាងកាយ និងប្រយុទ្ធប្រឆាំងការរីកលូតលាស់នៃបាក់តេរីអាក្រក់នៅក្នុងពោះវៀនមនុស្ស។ បើគ្មាន Prebiotics ទេ នោះ Probiotics ក៏មិនអាចរស់រានបានដែរ ដោយសារតែគ្មានថាមពល និងអាហារបំប៉នគ្រប់គ្រាន់។
២- អ្នកណាខ្លះត្រូវការ Prebiotics ជាចាំបាច់?
មនុស្សគ្រប់វ័យត្រូវការ Prebiotics ប៉ុន្តែអ្នកត្រូវការ Prebiotics ជាចាំបាច់នោះ គឺទារកទើបកើត ពិសេសកូនក្មេងដែលទើបចេះដើរតេះតះ អាយុចាប់ពី ១-២ឆ្នាំ។
ហេតុអីពេលកូនទើបចេះដើរ ត្រូវការ Prebiotics ចាំបាច់បំផុត? លោកវេជ្ជបណ្ឌិត ចាន់ ស៊ីណេត បកស្រាយថា៖
ទី១ កូនក្មេងមានប្រព័ន្ធការពារខ្សោយ ពោះវៀនក៏នៅខ្ចី ងាយរងការវាយប្រហារដោយមេរោគអាក្រក់ផ្សេងៗដែលបង្កឲ្យឆ្លង ឬកើតជំងឺផ្សេងៗ។ ផ្ទុយមកវិញ កាលណាពួកគេទទួលបាន Prebiotics គ្រប់គ្រាន់ នាំឲ្យសម្បូរបាក់តេរីល្អក្នុងពោះវៀន រារាំងនូវការកើតជំងឺផ្សេងៗ ទោះជាប្រព័ន្ធភាពស៊ាំរបស់ក្មេងនៅខ្សោយក្តី។
ទី២ កូនក្មេងទើបចេះដើរ រពឹសខ្លាំងណាស់ ដើរផង វារផង ចាប់ទាញ ឬប៉ះរបស់ផ្សេងៗ ពិសេសរបស់កខ្វក់ ធ្វើឲ្យងាយឆ្លងមេរោគ បង្កទៅរាករូស។
ទី៣ ពោះវៀនកូនក្មេងនៅខ្សោយ ពិបាករំលាយអាហារ ញ៉ាំអីផ្តេសផ្តាស ឬក៏ញ៉ាំប៉ះចំអាហារមិនមានអនាម័យ ទៅជាក្តៀនលាមក ឬរាករូស។
ករណីទី២ និងទី៣នេះ ដូចគ្នាទៅនឹងករណីទី១ បើកូនក្មេងមានបាក់តេរីល្អក្នុងពោះវៀន អាចជួយសម្រួលការរំលាយអាហារ ការពារជំងឺរាករូស និងជួយការពារកុំឲ្យបាក់តេរីល្អក្នុងពោះវៀនមិនឲ្យបាត់បង់ច្រើន។
អត្ថបទពាក់ព័ន្ធ៖
- មិនមែនសុទ្ធតែអាក្រក់ទេ បាក់តេរី ២ប្រភេទល្អ មានប្រយោជន៍ខ្លាំងសម្រាប់អូនៗ
- ក្មេងតូចទើបចេះដើរ គួរផឹកទឹកមួយថ្ងៃប៉ុន្មានទើបល្អ?
៣- Prebiotics មាននៅក្នុងអីខ្លះ?
Prebiotics មានច្រើនប្រភេទ ក្រៅពីមាននៅក្នុងអាហារបំប៉ន ពិសេសម្សៅទឹកដោះគោ Prebiotics ក៏មានក្នុងចំណីអាហារ មាន បន្លែ ផ្លែឈើ និងគ្រាប់ធញ្ញជាតិ ដែលសម្បូរដោយជាតិកាកសរសៃ ដែលមនុស្សមិនអាចរំលាយបាន តែបាក់តេរីល្អនៅក្នុងពោះវៀនអាចរំលាយបាន។
បន្លែ៖ ខ្ទឹមស ខ្ទឹមបារាំង ដើមខ្ទឹម ទំពាំងបារាំង សារាយសមុទ្រ សណ្តែកខៀវ សណ្តែកហោឡាំតាវ។
ផ្លែឈើ៖ ផ្លែប៊ើរី ផ្លែចេក។
គ្រាប់ធញ្ញជាតិគ្រប់ប្រភេទ និងយ៉ាអួ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
