ម៉ាក់ប៉ាយើងមួយចំនួនឲ្យតែពេលដើរផ្សារទិញអីវ៉ាន់មិនសូវចង់យកកូនទៅតាមទេ ព្រោះអាអូនឃើញរបស់លេងស្អាត ឬការ៉េមមិនបាន ដឹងតែទារទិញហើយ។ បើទារមិនបានដឹងតែស្រែកយំបែកផ្សារ រហូតម៉ាក់ប៉ាទិញឲ្យទាល់តែបាន តែការធ្វើតាមចិត្តកូនបែបនេះមិនល្អក្នុងការចិញ្ចឹមកូនទេ។ ម៉ាក់ប៉ាអាចចាប់ផ្ដើម បដិសេធពេលកូនទារទិញរបស់របរ លើកក្រោយៗបាន ដោយដោះស្រាយតាមក្បួនចិញ្ចឹមកូនសាមញ្ញៗ ខាងក្រោម។
លែងឈឺក្បាលពេលកូនទារទិញរបស់របរ ដោយប្រើក្បាច់បដិសេធប៉ុន្មាននេះ
ត្រួតពិនិត្យដោយ ដេត ធន្នី
១.ឆ្លើយតាមរបៀបកូនសួរ
បើកូនសុំក្នុងរបៀបគួរសម យើងគួរសរសើរកូនសម្រាប់ការចេះនិយាយគួរសម ទោះយើងមិនទិញរបស់ឲ្យកូនក៏ដោយ។ ការដែលធ្វើបែបនេះ អាចជំរុញកូនឲ្យប្រើពាក្យគួរសម និងនិយាយបានត្រឹមត្រូវជាមួយយើង ឬចាស់ៗដទៃ។ តែបើកូនស្រែក ទាររងូវៗ ម៉ាក់ប៉ាអាចឲ្យកូនសុំឲ្យត្រឹមត្រូវ ដោយប្រើពាក្យគួរសម មិនត្រូវសួរកំបុតៗ ឈ្លើយទេ។
២.ឲ្យចម្លើយដល់កូនច្បាស់ៗ
ការដែលម៉ាក់ប៉ាឲ្យចម្លើយកូនមិនច្បាស់ដូចជា “ចាំមើលសិន” ឬ “ប្រហែល” អាចនឹងធ្វើឲ្យក្មេងមានអារម្មណ៍មិនសប្បាយចិត្ត ហើយពេលខ្លះពួកគេនឹងទទូចអង្វរដើម្បីឲ្យម៉ាក់ប៉ាប្ដូរចម្លើយ។ ដូចនេះហើយពេលយើងនិយាយថា “ទេ” គួរនិយាយឲ្យបានម៉ឺងម៉ាត់ ដើម្បីបង្ហាញដល់ពួកគេថាយើងពិតជាមានន័យបែបនេះមែន។
៣. មិនត្រូវប្ដូរចម្លើយ
មិនថាកូនទទូចអង្វរ ឬយំយ៉ាងណាទេ កុំចុះចាញ់ព្រោះការប្តូរចម្លើយទៅយល់ព្រមតាមពួកគេអាចធ្វើឲ្យកូនគិតថាយើងមិនបានប្រាកដនឹងអ្វីដែលបាននិយាយទេ។ ពេលខ្លះម៉ាក់ប៉ាអាចនឹងឮកូនតវ៉ាថាក្មេងដទៃអាចធ្វើរឿងបែបនេះបាន យកល្អម៉ាក់ប៉ាមិនគួរប្តូរចម្លើយទៅយល់ព្រមទេ ប៉ុន្តែគួររម្លឹកដល់កូនថានេះជាច្បាប់របស់យើង និងបញ្ចប់ការសន្ទនានេះដើម្បីចៀសវាងជម្លោះ។
៤.ពន្យល់ហេតុផលបដិសេធ
ការពន្យល់ខ្លីៗថាហេតុអ្វីបានជាយើងបដិសេធ ដែលការពន្យល់នេះអាចធ្វើឲ្យការបដិសេធក្លាយទៅជាបទពិសោធន៍ក្នុងការរៀនសូត្ររបស់កូន។ ប្រសិនជាយើងបដិសេធកូនទៅលើរឿងអ្វីមួយដែលគេចង់ធ្វើដោយមិនប្រាប់ពីមូលហេតុ កូនអាចគិតថាម៉ាក់ប៉ាចិត្តអាក្រក់។ ហេតុនេះហើយ យើងគួរប្រាប់មូលហេតុឲ្យច្បាស់ក្រោយពីបដិសេធកូន ព្រោះនៅពេលកូនយល់ពីមូលហេតុនេះ ពួកគេនឹងមិនធ្វើអ្វីដែលអាចបង្កគ្រោះថ្នាក់នៅពេលម៉ាក់ប៉ាមិនអនុញ្ញាតទេ។
ទឹកចិត្តម៉ាក់ប៉ាចំពោះកូនៗ គឺធំធេងណាស់ អ្វីដែលកូនចង់បាន ប៉ាម៉ាក់គ្រប់រូបច្បាស់ជាចង់ផ្ដល់ឲ្យកូនហើយ ទោះបីពេលខ្លះវាអាចហួសពីសមត្ថភាពខ្លួនក្ដី។ ហើយការនិយាយថា “ទេ” ទៅកាន់កូន អាចពិបាកសម្រាប់យើង ព្រោះខ្លាចកូនអន់ចិត្ត ទូចចិត្តនឹងយើង ប៉ុន្តែ យើងត្រូវដឹងថា ក្មេងៗមិនអាចទារអី បាននឹងទេ ព្រោះវាអាចធ្វើឲ្យកូនធ្លាប់ ឬអាចពិបាកនៅពេលដែលកូនធំឡើង ប្រលូកក្នុងសង្គមពិត។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យដោយ
ដេត ធន្នី
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម