ទារក និងកុមារតូចៗ តែងឆ្ងល់ច្រើនពីរបស់អ្វីក៏ដោយដែលបានឃើញ ហើយក្មេងភាគច្រើនតែងដាក់របស់តូចៗ ដែលឆ្ងល់ដាក់ចូលមាត់ ពិសេសក្មេងអាយុក្រោម ៥ ឆ្នាំ។ ករណីតែងជួបប្រទះភាគច្រើន គឺនាំឲ្យក្មេងស្លាក់ និងស្ទះបំពង់ខ្យល់ ហើយគ្រោះថ្នាក់បំផុតសម្រាប់កូនយើង ព្រោះបណ្តាលឲ្យខ្វះអុកស៊ីហ្សែនទៅចិញ្ចឹមខួរក្បាល។ “Hello គ្រូពេទ្យ’ នឹងប្រាប់ពីវិធីសង្គ្រោះបឋម ពេលប្រទះឃើញក្មេង ឬទារកតូចៗស្លាក់អ្វីមួយក្នុងមាត់។
១- អ្វីជាការស្លាក់ចំពោះក្មេងៗ?
ការស្លាក់កើតឡើងនៅពេលវត្ថុមួយ ដូចជា គ្រាប់ឃ្លី គ្រាប់ចិញ្ចៀន និងថ្មពិលតូច (button batteries) ឬវត្ថុតូចៗផ្សេងទៀត ស្ទះជាប់បំពង់ក ឬបំពង់ខ្យល់ ជាហេតុធ្វើឲ្យស្ទះចរន្តខ្យល់ មិនអាចដកដង្ហើមបាន។
២- ស្លាក់មានចេញរោគសញ្ញាអ្វីខ្លះ?
ក្មេងស្លាក់ អាចនឹងបង្ហាញសញ្ញា និងរោគសញ្ញាគ្រោះថ្នាក់ ដូចជា មិនអាចដកដង្ហើមបាន ដង្ហក់ ដកដង្ហើមឮសំឡេង មិនអាចស្រែក ឬធ្វើមានសំឡេងបាន។ មុខឡើងខៀវ ហើយចាប់កាន់បំពង់ក និងគ្រវីដៃ មើលទៅកំពុងស្លន់ស្លោរ និងបាត់បង់ស្មារតី។ អំឡុងពេលកំពុងស្លន់ បង្ហាញអាការពិបាកក្នុងខ្លួន ឬមិនអាចនិយាយចេញជាឃ្លាត្រឹមត្រូវបាន ឬមិនអាចបញ្ចេញសំឡេងឲ្យឮគ្រប់គ្រាន់ អាចនឹងក្អកញាប់ និងហូរទឹកភ្នែក។
អត្ថបទពាក់ព័ន្ធ៖
- វិធីជួយសង្គ្រោះអ្នកត្រូវពស់ចឹក មិនឲ្យគ្រោះថ្នាក់ដល់ជីវិត
- បើក្មេងលង់ទឹក នេះជាវិធីសង្គ្រោះបឋមជួយបានភ្លាមៗ
៣- ត្រូវធ្វើដូចម្ដេច ពេលក្មេងស្លាក់?
បើក្មេងនៅអាយុក្រោម ១ ឆ្នាំ សូមដាក់គេផ្កាប់នៅលើកំភួនដៃ ឬនៅលើភ្លៅ បើកំភួនដៃមិនអាចដាក់គេមានលំនឹងបាន។ បន្ទាប់មកកាន់ថ្គាម និងទ្រក្បាល ដោយដៃម្ខាង និងដាក់ឲ្យទាបជាងទ្រូងក្មេង។ ប្រើថ្លើមដៃម្ខាងទៀត ទះខ្នងក្មេង (ផ្នែកចន្លោះឆ្អឹងស្លាបប្រចៀវទាំងពីរ) ចំនួន ៥ ដងឲ្យលឿន។ បើក្មេងនៅតែមិនដកដង្ហើម ព្យាយាមសង្កត់ទ្រូង ដោយផ្ងារក្មេងឡើងក្នុងស្ថានភាពក្បាលទាបជាងទ្រូង រួចដាក់ម្រាមដៃពីរនៅកណ្ដាលទ្រូង ហើយសង្កត់ ៥ ដង។ ត្រូវធ្វើរបៀបនេះម្ដងហើយម្ដងទៀត (ទាំងផ្កាប់ហើយទះខ្នង និងសង្កត់ទ្រូង) រហូតទាល់តែរបស់នោះអាចមើលឃើញ និងយកចេញផុត។
បើក្មេងអាយុលើស ១ ឆ្នាំ ត្រូវឈរនៅក្រោយខ្នងក្មេង ដោយដាក់ដៃទាំងពីរជុំវិញចង្កេះ ដៃម្ខាងក្ដាប់ ហើយតម្រង់មេដៃចំចុងដង្ហើមក្មេង ដៃម្ខាងទៀតត្រូវដាក់ពីលើ បន្ទាប់មកសង្កត់ចូលក្នុង រួចរុញឡើងលើ។ អង្គការកាកបាតក្រហម បានណែនាំឲ្យជំនួសការសង្កត់ពោះ ទៅជាការទះខ្នងវិញ ដើម្បីព្យាយាមយករបស់ដែលស្ទះនោះចេញ។ បើក្មេងសន្លប់ ត្រូវធ្វើវីធីសង្គ្រោះបន្ទាន់ CPR (Cardiopulmonary resuscitation) ភ្លាម។
បើក្មេងទើបចេះដើរ ឬក្មេងធំ ត្រូវប្រាប់ឲ្យក្អក ដើម្បីឲ្យវត្ថុដែលស្ទះធ្លាក់ចេញមកក្រៅ។ មិនត្រូវព្យាយាមយករបស់ដែលស្ទះនោះចេញឡើយ លើកលែងយើងមើលវាឃើញ ព្រោះអាចរុញវាឲ្យចូលកាន់តែជ្រៅទៅក្នុងបំពង់ខ្យល់។ ត្រូវសួរ “តើកូនកំពុងស្លាក់មែនទេ?’ បើក្មេងងក់ក្បាល មានន័យថាពិតហើយ តែបើគេមិនតប មានន័យថាគេត្រូវការឲ្យជួយហើយ។
ទៅពេទ្យបន្ទាន់ ឬហៅទូរសព្ទទៅលេខ ១១៩ ភ្លាម បើក្មេងសន្លប់ ឬមិនអាចដកដង្ហើមបាន ព្រោះតែមានវត្ថុអ្វីមួយបិទបំពង់ខ្យល់ ឬមានបញ្ហាអ្វីមួយ ធ្វើឲ្យបំពង់ខ្យល់បិទ ឬបើក្មេងដកដង្ហើមឮសំឡេង ដង្ហក់ មិនអាចស្រែក ឬមុខរបស់គេឡើងខៀវ រួចចាប់កាន់ក និងមើលទៅកំពុងស្លន់ស្លោ ភ័យខ្លាច។
ក្មេងតូចងាយនឹងស្លាក់ណាស់ ដូចនេះយើងត្រូវតែរៀបចំខ្លួនបង្ការទុកជាមុន។ ត្រូវរៀនពី វិធីសង្កត់ពោះពេលស្លាក់ (Heimlich maneuver) និងវិធីសង្គ្រោះ CPR ម៉ាក់ប៉ា អ្នកថែទាំក្មេង មេដោះ ត្រូវតែចេះ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបលផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
