ជំងឺអូទីស្សឹម កំពុងកើតឡើងច្រើនណាស់ចំពោះក្មេងៗ បើមានជំងឺនេះហើយ ក្មេងនឹងត្រូវរស់នៅជាមួយវាអស់មួយជីវិត។ យ៉ាងណា បើព្យាបាលលឿនទាន់ពេល អាចជួយក្មេងមានសុខភាពប្រសើរបាន ហើយដើម្បីគ្រប់គ្រងជំងឺបាន ត្រូវតែធ្វើរោគវិនិច្ឆ័យឲ្យលឿន តាមអាចធ្វើបាន។ ហេតុនេះ “Hello គ្រូពេទ្យ’ នឹងលើកពីវិធីពេទ្យធ្វើរោគវិនិច្ឆ័យជំងឺអូទីស្សឹម ឲ្យគ្នាយើងបានដឹង។
១- ការធ្វើរោគវិនិច្ឆ័យជំងឺអូទីស្សឹមលើក្មេងៗ
ធ្វើរោគវិនិច្ឆ័យជំងឺអូទីស្សឹម អាចមានការលំបាក តែយ៉ាងណា ធ្វើរោគវិនិច្ឆ័យកាន់តែលឿន កាន់តែអាចជួយឲ្យប៉ាម៉ាក់ ដឹងពីតម្រូវការកូនកាន់តែច្បាស់ អាចជួយទំនុកបម្រុង និងថែទាំកូនបានល្អ។ វិធីធ្វើរោគវិនិច្ឆ័យជំងឺអូទីស្សឹមលើក្មេងៗ អាចអនុវត្តតាមវិធីសាស្ត្រដូចជា៖
– និយាយជាមួយគ្រូពេទ្យ៖ បើមានសង្ស័យ ឬកូនយើងកើតជំងឺ អូទីស្សឹម ត្រូវនិយាយប្រាប់គ្រូពេទ្យជាមុនសិន ។ គួរណាត់ជួបគ្រូពេទ្យមានបទពិសោធធ្វើការជាមួយក្មេងមានជំងឺនេះ រួចប្រាប់ពីអាកប្បកិរិយាប្រចាំថ្ងៃរបស់កូនយើង ឲ្យពេទ្យបានដឹង។ ត្រូវចាំថា ត្រូវកត់ចំណាំរាល់អាកប្បកិរិយាកូន ជួយយើងអោយដឹងថា កូនមានជំងឺអូទីស្សឹម ឬក៏អត់បាន។
– ពិនិត្យតាមដាន៖ បើកូនយើងមិនទាន់ចូលសាលានៅឡើយ ពេទ្យអាចនឹងប្រើបញ្ជីតាមដានមួយឈ្មោះ M-Chat ។ គ្រូពេទ្យនឹងពិនិត្យមើលអាកប្បកិរិយា និងការលូតលាស់របស់ក្មេង ហើយអាចសួរនាំសំណួរខ្លះៗ ឬនិយាយ និងលេងជាមួយកូនយើង ដើម្បីពិនិត្យមើល ពីការនិយាយ សកម្មភាព ប្រតិកម្ម អាកប្បកិរិយា និងការរៀន របស់កូនយើង យ៉ាងម៉េចខ្លះ។
ក្មេងសង្ស័យមានជំងឺនេះ គួរត្រួតពិនិត្យតាមដំណាក់កាល នៅពេលដល់វ័យ ៩ខែ ១៨ខែ ២៤ខែ និង ៣០ខែ។ ពេលខ្លះតេស្តមួយចំនួនទៀត អាចត្រូវធ្វើ បើសិនគ្រូពេទ្យគិតថាចាំបាច់។ បើពេទ្យសម្គាល់ឃើញសញ្ញាមានបញ្ហាទៅលើកូនយើង ពេទ្យនឹងធ្វើការវាយតម្លៃមួយភ្លាម។
– ការវាយតម្លៃ៖ គ្រូពេទ្យឯកទេស ជំនាញលើការវិវត្តផ្លូវចិត្តក្មេងៗ ឯកទេសសរសៃប្រសាទកុមារ គ្រូពេទ្យចិត្តសាស្ត្រ ឬពេទ្យផ្លូវចិត្ត នឹងសួរសំណួរមួយចំនួន ពាក់ព័ន្ធសុខភាពកូនយើង អាកប្បកិរិយា និងសុខភាពផ្ទាល់។ ពេទ្យ ក៏នឹងពិនិត្យមើល ពីការស្ដាប់ និងគំហើញរបស់ក្មេងដូចគ្នា។ ការធ្វើតេស្តលើប្រព័ន្ធប្រសាទ តេស្តហ្សែន និងតេស្តវេជ្ជសាស្ត្រផ្សេងទៀត ក៏អាចណែនាំឲ្យធ្វើផងដែរ។ ក្នុងករណីខ្លះ ទាំងប៉ាម៉ាក់ និងកូន អាចនឹងស្នើឲ្យចូលរួមការណាត់ជួប និងសម្ភាសន៍ផ្សេងៗ ពីការលូតលាស់ អាកប្បកិរិយា ជំនាញផ្សេងៗ និងសកម្មភាពក្មេងអាចគ្រប់គ្រងបាន។
អត្ថបទពាក់ព័ន្ធ៖
- កំពុងពពោះ? ត្រូវចេះប្រយ័ត្នប្រយែង តិចអូនៗកើតអូទីស្សឹម
- ស្រីៗខ្វះជាតិដែកពេលពពោះ និងចាក់ថ្នាំស្ពឹកឆ្អឹងខ្នងពេលសម្រាល នាំឲ្យកូនកើតអូទីស្សឹម?
២- រោគវិនិច្ឆ័យជំងឺអូទីស្សឹមលើសមនុស្សពេញវ័យ
ធ្លាប់គិតអត់ ខ្លួនយើងមានជំងឺអូទីស្សឹម? បើសង្ស័យខ្លួនយើងមានជំងឺនេះ តេស្តតាមប្រព័ន្ធអនឡាញជាច្រើន អាចបកស្រាយមន្ទិលសង្ស័យយើងបាន ប៉ុន្តែលទ្ធផលតេស្តទាំងនោះ មិនអាចត្រឹមត្រូវទាំងស្រុងទេ។ យើងត្រូវទៅជួបគ្រូពេទ្យ ដើម្បីដឹងពីជំងឺនេះកាន់តែច្បាស់។
ការធ្វើរោគវិនិច្ឆ័យ អាចជួយយើងយល់ច្បាស់ពីបទពិសោធលំបាកផ្សេងៗយើងធ្លាប់ឆ្លងកាត់ និងតើអាចដោះស្រាយដោយវិធីណា? តើយើងអាចទទួលបានជំនួយ និងថែទាំត្រឹមត្រូវម៉េចខ្លះ? ខណៈវិធីធ្វើរោគវិនិច្ឆ័យយើងចាំបាច់ត្រូវធ្វើ មានដូចជា៖
– និយាយជាមួយគ្រូពេទ្យ៖ បើសង្ស័យយើងខ្លួនឯង ឬសមាជិកគ្រួសារ មិត្តភក្តិ កើតជំងឺអូទីស្សឹម ត្រូវស្វែងរកការពិគ្រោះជាមួយពេទ្យមានបទពិសោធ និងអាចទុកចិត្តបាន ពិសេសធ្លាប់ព្យាបាលជំងឺប្រភេទនេះ។ យើង អាចនឹងមានការសម្ភាសន៍ខ្លីមួយជាមួយគ្រូពេទ្យ អំឡុងពេលនោះ ត្រូវពន្យល់ពេទ្យ ហេតុអីបានជាយើងគិតថាខ្លួនឯង ឬនរណាម្នាក់ មានជំងឺអូទីស្សឹម។ សាកស្រមៃថា យើងមានផលវិបាកក្នុងការបង្ហាញអារម្មណ៍ និងការគិត ពិបាកទំនាក់ទំនងជាមួយអ្នកដទៃ ឬអត់។
– ការវាយតម្លៃ៖ អំឡុងពេលវាយតម្លៃ គ្រូពេទ្យ នឹងពិនិត្យមើលថា យើងមានឥរិយាបថ ក្នុងសង្គម ប្រវត្តិពីកុមារ និងប្រវត្តិវេជ្ជសាស្ត្រ ក៏ដូចជាថា ជីវិតនិងការងារយើង យ៉ាងម៉េចខ្លះ។ បន្ទាប់ពីវាយតម្លៃរួច បើរោគវិនិច្ឆ័យបញ្ជាក់ថា យើងមានជំងឺអូទីស្សឹម ពេទ្យនឹងផ្ដល់ដំបូន្មានឲ្យយើងមកជួបនៅពេលក្រោយៗ ដើម្បីរៀបចំសម្រាប់ជំហានបន្ទាប់។
ធ្វើរោគវិនិច្ឆ័យជំងឺបានលឿន អាចជួយឲ្យក្មេងមានជំងឺអូទីស្សឹម ទទួលបានការព្យាបាលត្រឹមត្រូវ និងទាន់ពេលវេលា។ មានការថែទាំត្រឹមត្រូវ ក្មេងមានជំងឺនេះ អាចរៀនជំនាញថ្មីៗ និងបង្កើនសមត្ថភាពខ្លួន ដើម្បីដោះស្រាយបញ្ហាដោយខ្លួនឯង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
