ក្មេងអាយុក្រោម ២ ឆ្នាំជាច្រើនមានសំឡេងដកដង្ហើមខ្សឺតខ្សកពេលគេង ដែលអាការៈខ្លះកើតឡើងបន្ទាប់ជាពីជំងឺរលាកទងសួត ហើយខ្លះទៀតឮកូនដកដង្ហើមឮបែបនេះតាំងពីកើត។ ចំពោះបញ្ហានេះដែរ លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្ត្រី នៃមន្ទីរបង្អែកមិត្តភាពកម្ពុជា-ចិន សែនសុខ បានបកស្រាយថា បើកូនទើបកើតអាចមកពីឈ្លក់ទឹកភ្លោះ ឬទឹកភ្លោះធ្លាក់ចេញមិនអស់។
ដូចនេះហើយបានជាពេទ្យប្រាប់យើងឲ្យដាក់កូនទើបកើត គេងផ្អៀងទៅម្ខាង ដើម្បីឲ្យទឹកភ្លោះហូរចេញមកអស់តាមមាត់ ឬច្រមុះ។ រយៈពេល ១ ខែយ៉ាងយូរ វានឹងអស់ហើយ តែបើកូនមានអាយុ ១ ឆ្នាំហើយ ពេលគេងនៅតែឮសំឡេងទៀត ហើយបើពិនិត្យទៅមិនមានរោគសញ្ញារលាកទងសួតអ្វីទេ នោះជារឿងធម្មតាប៉ុណ្ណោះ។
តែការឮសំឡេងខ្សឺតខ្សកនោះ អាចមកពីបំពង់ទងសួតកូនត្បៀតតិចតួច តែនៅពេលធំឡើងលែងបញ្ចេញសំឡេងទៀតហើយ។ មួយវិញទៀត ក្មេងខ្លះមានអាការៈតឹងច្រមុះ ឬគេងនៅកន្លែងដែលមានសីតុណ្ហភាពត្រជាក់ពេក ទើបធ្វើឲ្យកូនមានសភាពបែបនេះ។
ចំណែកបញ្ហាកូនគេងស្រមុក ក៏អាចធ្វើឲ្យម៉ាក់ប៉ាគិតថា មកពីបញ្ហាសួតដែរ ព្រោះយល់ថាកូននៅតូចមិនអាចចេះស្រមុកដូចមនុស្សធំឡើយ។ ដូចនេះប្រសិនបើរកមិនឃើញភាពខុសប្រក្រតីនៃផ្លូវដង្ហើមទេ មិនចាំបាច់ព្រួយបារម្ភឡើយ ព្រោះពេលកូន៣-៥ ឆ្នាំទៅ នឹងលែងឮសូរដង្ហើមពេលដេកទៀតឡើយ។
អត្ថបទពាក់ព័ន្ធ៖
- ក្មេងជាប់គល់អណ្ដាត បើមិនបានកាត់ រងផលប៉ះពាល់ទាំងនេះ
- ម៉ាក់ប៉ាត្រូវដឹងរឿងទាំងនេះ បើកូនមានជំងឺរលាកទងសួត
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
