ក្មេងៗជាធម្មតាចាប់តាំងពីសម្រាលចេញពីផ្ទៃម៉ាក់ៗមក បើទោះជាទទួលបានការមើលថែទាំដិតដល់ពីប៉ាម៉ាក់ យាយតាក្តី ប៉ុន្តែដោយសារកោសិកាក្នុងសរីរាង្គក្មេងកំពុងលូតលាស់ និងនៅក្មេងខ្ចីតែងប្រឈមនឹងជំងឺជារឿយៗ។ អ្វីប៉ាម៉ាក់បច្ចុប្បន្នតែងជួបប្រទះគឺបញ្ហាជំងឺសើស្បែកលើកូនមិនដឹងមូលហេតុ និងព្យាបាលបែបណាទើបមិនប៉ះពាល់? បើអ៊ីចឹង “Hello គ្រូពេទ្យ” និងពន្យល់ពីជំងឺស្បែកម្យ៉ាងលើក្មេងៗហៅថា Psoriasis ឲ្យប៉ាម៉ាក់ទាំងអស់បានដឹងនិងប្រុងប្រយ័ត្នខ្ពស់។
ស្វែងយល់ពីជំងឺសើស្បែកម្យ៉ាងឧស្សាហ៍កើតលើអាអូនតូចៗ
១– អ្វីទៅជាជំងឺស្បែកPsoriasis?
Psoriasis (ជំងឺផ្សិតលើស្បែក ឬស្បែករបកក្រហម) ជាជំងឺសើស្បែកម្យ៉ាងបង្កឲ្យវដ្តជីវិតនៃកោសិកាស្បែកមានបញ្ហា។ វាពន្លឿនផលិតកោសិកាស្បែកថ្មី បណ្ដាលឲ្យមានវត្តមានកោសិកាស្បែកថ្មីកើនឡើងច្រើន លើសលប់ ជាហេតុបង្កទៅជាបន្ទះស្បែកក្រហមដុំៗ មានសភាពក្រាស់ស្ងួត របករមាស់ ក្រមរពណ៌សលាយប្រាក់ ពេលខ្លះនាំឲ្យមានការឈឺចាប់ថែមទៀតផង។
២– រោគសញ្ញានៃជំងឺស្បែកPsoriasis
ជំងឺស្បែកចែកចេញជាច្រើនប្រភេទ ហើយប្រភេទនីមួយៗមានរោគសញ្ញាផ្សេងៗគ្នា ប៉ុន្តែរោគសញ្ញាចម្បងៗជាទូទៅកើតលើក្មេងៗរួមមាន៖
− បន្ទះស្បែកក្រហមដុំៗគ្របដណ្តប់ដោយក្រមរពណ៌សលាយប្រាក់ (ជាញឹកញាប់អាចច្រឡំជាមួយនឹងកន្ទួលរមាស់បង្កដោយបញ្ហាកន្ទបក្មេង)
− បន្ទះស្បែកស្ងួត ប្រេះពេលខ្លះមានចេញឈាម
− មានអារម្មណ៍ថា រមាស់ ឈឺ ឬក្រហាយ
− ក្រចកដៃទ្រុឌ ឬក៏ខូងជ្រៅ
៣– វិធីព្យាបាលនៃជំងឺស្បែកPsoriasis
– របបអាហារ៖ ដោយសារតែប្រព័ន្ធស៊ាំកុមារងាយរងនឹងការប៉ះទង្គិចជាងមនុស្សពេញវ័យ ធ្វើឲ្យការព្យាបាលជំងឺស្បែកប្រភេទនេះកាន់តែមានភាពលំបាក។ មួយវិញទៀតជម្រើសនៃការព្យាបាលត្រូវបានអនុម័តដោយរដ្ឋបាលចំណីអាហារនិងឱសថអាមេរិក (FDA) មិនទាន់ត្រូវបានអនុញ្ញាតដាក់ឲ្យព្យាបាលជាផ្លួវការនៅឡើយ។ដូចនេះដើម្បីឲ្យប្រព័ន្ធភាពស៊ាំកុមាររឹងមាំងាយទប់ទល់នឹងជំងឺនេះ របបអាហារក្មេងគួរតែសំបូរទៅដោយសារធាតុចិញ្ចឹម ដូចជា ខ្លាញ់ ត្រី ប្រូព្យូតិច (Probiotics) វីតាមីន D និងអាហារបំប៉នផ្សេងៗទៀត។
– វិធីព្យាបាលដោយថ្នាំលាប៖ ជាទូទៅវិធីព្យាបាលដោយថ្នាំលាប ដូចជាសារធាតុកូរទីកូស្តេរយ (corticosteroids) ផ្តល់ប្រសិទ្ធភាពខ្ពស់ចំពោះជំងឺ Psoriasis តែគប្បីជៀសវាងការប្រើលើសចំណុះព្រោះអាចបណ្តាលឲ្យមានផលប៉ះពាល់ច្រើនយ៉ាង អាចធ្វើឲ្យប្រព័ន្ធភាពស៊ាំចុះខ្សោយជាដើម។មានថ្នាំលាបប្រភេទមួយទៀត ត្រូវចាត់ទុកផ្តល់សុវត្ថិភាពខ្ពស់ គឺពពួកថ្នាំលាបមានសារធាតុធ្យូងថ្មប៉ុន្តែ ប្រសិនកំហាប់ធ្យូងថ្មក្នុងថ្នាំលាបមានលើសពី៥ភាគរយ ហានិភ័យបង្កទៅជាជំងឺមហារីកក៏មានខ្ពស់ដូចគ្នា។
– វិធីព្យាបាលដោយកាំរស្មី (Phototherapy) ៖ ព្យាបាលដោយកាំរស្មី ជាវិធីមានសុវត្ថិភាព និងផ្តល់ប្រសិទ្ធភាពខ្ពស់ដូចគ្នា ដោយវិធីព្យាបាលចែកចេញ២ មួយហៅថា UVB និងមួយទៀត PUVA ប៉ុន្តែអាចប្រើរួមផ្សំជាមួយវិធីដទៃផ្សេងទៀតបាន។
ប្រសិនយើងជ្រើសរើសយកវិធីព្យាបាលនេះ យើងត្រូវពិគ្រោះយោបល់ជាមួយគ្រូពេទ្យជំនាញ ឬគ្រូពេទ្យឯកទេសសើស្បែក និងឯកទេសជំងឺកុមារជាមុន ជៀសវាងផលប៉ះពាល់ដោយប្រការណាមួយ។ ពន្លឺអ៊ុលត្រា UV អាចបង្កឲ្យមានផលប៉ះពាល់ជាច្រើនដូចជា ប៉ះពាល់រចនាសម្ព័ន្ធរបស់ហ្សែន កូឡាហ្សែន វីតាមីន A វីតាមីន C ក៏ដូចជា រ៉ាឌីកាល់ សរីរាង្គក្នុងខ្លួនយើង។
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម