ជំងឺគ្រុនឈាមកំពុងផ្ទុះ ហើយរោគសញ្ញាសំខាន់មួយក្នុងចំណោមរោគសញ្ញាផ្សេងទៀតនោះ គឺការកើនឡើងកម្តៅលើសពី ៣៨ អង្សារសេ។ ចំពោះក្មេងតូចៗ ទោះជាក្តៅខ្លួនដោយមូលហេតុអ្វីក៏ដោយ កាលណាក្តៅខ្លួនខ្លាំងអាចឈានទៅប្រកាច់ភ្លាមៗ ដែលអាចធ្វើឲ្យប៉ះពាល់ដល់ខួរក្បាល ដូច្នេះហើយម៉ាក់ប៉ា ចាំបាច់ត្រូវដឹងពីវិធីសង្គ្រោះបឋមមិនកូនគ្រោះថ្នាក់ដល់ជីវិត មុននឹងទៅដល់មន្ទីរពេទ្យ។
លោកវេជ្ជបណ្ឌិត ឯកទេស ជំងឺទូទៅ ចាន់ ស៊ីណេត បានផ្តល់ជាដំបូន្មានថា បើកូនក្តៅខ្លួនខ្លាំង ជាដំបូងយើងមិនឲ្យកូនពាក់ខោអាវជិត និងក្រាស់នោះទេ គឺត្រូវប្រញាប់ដោះខោអាវកូនចេញពីខ្លួន ហាមដាច់ខាតឲ្យកូនដេកសណ្តប់ភួយ ឬកន្សែងក្រាស់ៗជិតខ្លួន ព្រោះការធ្វើឲ្យបែបនេះ កម្តៅរឹតតែងំខ្លាំង ងាយនឹងកើនកម្តៅ។
“ ក្មេងក្តៅខ្លួន ចាញ់រងារណាស់ ចង់ឲ្យតែដណ្តប់ភូយ កន្សែងជិតៗខ្លួនទេ តែយើងមិនត្រូវធ្វើបែបនោះឡើយ ព្រោះធ្វើឲ្យក្មេងរឹតតែក្តៅខ្លួនខ្លាំង ទៅពេទ្យមិនទាន់ប្រកាច់ក៏មាន“។ លោកវេជ្ជបណ្ឌិតបញ្ជាក់។
អត្ថបទពាក់ព័ន្ធ៖ ហេតុអីកូនតូចងាយក្តៅខ្លួន ហើយក្ដៅកម្រិតណា ទើបត្រូវបារម្ភខ្លាំង?
បន្ទាប់មកទៀត គឺត្រូវយកកន្សែងជ្រលក់ទឹកសើមៗមកជូតខ្លួនកូនឲ្យបានញឹកញាប់តាមដែលអាចធ្វើទៅបាន ពិសេសជ្រលក់កន្សែងជាមួយទឹក រួចរុំនៅតំបន់ដែលមានសរសៃឈាមធំៗ ដូចជាក្លៀក និងបរិវេណក។
ចំណុចសំខាន់មួយទៀត ម៉ាក់ប៉ាមិនត្រូវឲ្យកូនញ៉ាំថ្នាំផ្តេសផ្តាស ក្រៅពីថ្នាំបញ្ចុះកម្តៅទេ និងត្រូវឲ្យកូនញ៉ាំទឹកឲ្យបានច្រើន ព្រោះក្មេងក្តៅខ្លួនបាត់បង់ជាតិទឹក។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
