ញ៉ាំអាហារត្រឹមត្រូវ ធ្វើឲ្យសុខភាពល្អ។ គ្នាយើងមួយចំនួនមានទម្លាប់អាក្រក់ ញ៉ាំភ្លាម ចូលទម្រេតខ្លួនចុចមើលទូរសព្ទ ឬគេងភ្លាម ទាំងមិនខ្វល់ថា អាចបណ្តាលឲ្យមានគ្រោះថ្នាក់ធ្ងន់ធ្ងរដល់សុខភាព។ “Hello គ្រូពេទ្យ” នឹងប្រាប់គ្នាយើងឲ្យដឹងខ្លះៗ ពាក់ព័ន្ធទម្លាប់ញ៉ាំឆ្អែតភ្លាម គេងភ្លាម ប៉ះពាល់អ្វីខ្លះដល់សុខភាព។
ទម្លាប់ញ៉ាំឆ្អែតភ្លាម ទម្រេតខ្លួនគេងភ្លាម គ្រោះថ្នាក់បំផុត
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១- ញ៉ាំឆ្អែតភ្លាម គេងភ្លាម ប៉ះពាល់ដល់សុខភាពមែនទេ?
ចម្លើយ គឺពិតមែន ព្រោះថាអាហារយើងញ៉ាំទៅ អាចរំលាយបានល្អ នៅពេលយើងអង្គុយត្រង់ខ្លួនប៉ុណ្ណោះ។ គួរតែទម្រេតខ្លួនគេង ២ ម៉ោងបន្ទាប់ពីញ៉ាំរួច ហើយការទម្រេតខ្លួនគេងភ្លាមៗបន្ទាប់ពីញ៉ាំ នឹងធ្វើឲ្យអាហារមិនរំលាយល្អ ខណៈទម្លាប់បែបនេះធ្វើឲ្យមានបញ្ហាសុខភាពមួយចំនួនដូចជា៖
– បញ្ហាចាល់ជាតិអាស៊ីដ៖ បំពង់អាហារ (Esophagus) ដែលជាបំពង់មួយភ្ជាប់ពីមាត់ទៅក្រពះ មានសន្ទះបិទ (Valve) សម្រាប់ការពារអាហារកុំឲ្យច្រាលឡើងចេញពីប្រព័ន្ធរំលាយអាហារបាន។ នៅពេលយើងគេង បន្ទាប់ពីញ៉ាំអាហាររួច សន្ទះបិទនោះ នឹងពិបាករក្សាអាហារឲ្យនៅតែក្នុងប្រព័ន្ធរំលាយអាហារ ក៏ជាមូលហេតុពេលក្រពះយើងពេញខ្លាំង ធ្វើឲ្យច្រាលអាស៊ីដឡើងមកលើបាន។
– ក្រហាយទ្រូង៖ ក្រហាយទ្រូង ជាស្ថានភាពមួយដែលក្រពះមានជាតិអាស៊ីដច្រើនលើសកម្រិត។ អាស៊ីដទាំងនោះនឹងច្រាលឡើងពីក្រពះទៅដល់បំពង់ក នាំឲ្យមានអារម្មណ៍ដូចក្រហាយទ្រូង ឬពេលខ្លះ នៅត្រង់បំពង់ក ហើយបញ្ហាទាំងអស់នេះ ច្រើនមានជាមួយអាការៈភើ និងជូរក្នុងមាត់។
– ឡើងទម្ងន់៖ បញ្ហាមួយនេះ បណ្ដាលមកពីញ៉ាំអាហារ ហើយគេងភ្លាមនៅពេលយប់។ ញ៉ាំអាហារយឺតនៅពេលយប់ ក៏មានគ្រោះថ្នាក់ផ្សេងទៀតដែរ រួមមាន សមត្ថភាពធ្វើការវិនិច្ឆ័យខ្សោយ ខួរក្បាលចុះខ្សោយ ជាងធ្វើការហត់នឿយទៅទៀត។ ពេលយើងឃ្លានកណ្ដាលយប់ ការធ្វើម្ហូបញ៉ាំមិនអាចទៅរួចទេ យើងនឹងជ្រើសការញ៉ាំការ៉េម ភីហ្សា ឬរបស់សេសសល់ក្នុងទូទឹកកកមិនខាន ដែលនេះជាការសម្រេចចិត្តខុស មានន័យថា យើងនឹងមិនមានពេលសម្រាប់ដុតកាល់ឡូរីដែលលើសចេញពីរាងកាយឡើយ។
– ជំងឺដាច់សរសៃឈាមខួរក្បាល៖ ចូលគេងភ្លាមៗបន្ទាប់ពីញ៉ាំរួច អាចធ្វើឲ្យកើនហានិភ័យមានជំងឺដាច់សរសៃឈាមខួរក្បាល នៅពេលខាងមុខ។ លទ្ធផលការសិក្សាមួយរបស់សកលវិទ្យាល័យ Ioannina របស់ប្រទេសក្រិក រកឃើញថា ទម្លាប់គេងភ្លាមៗបន្ទាប់ពីញ៉ាំរួច អាចធ្វើឲ្យកើនហានិភ័យដាច់សរសៃឈាមខួរក្បាល ដោយការសិក្សាធ្វើឡើងទៅលើមនុស្សមានសុខភាពល្អ ៥០០ នាក់ រកឃើញចន្លោះពេលគេង និងពេលញ៉ាំអាហារកាន់តែវែង ឱកាសកើតមានជំងឺដាច់សរសៃឈាមខួរក្បាលកាន់តែទាប។
ទោះទ្រឹស្ដីការសិក្សាផ្សេងៗ អាចនឹងមានហេតុផលខុសគ្នា ប៉ុន្តែអ្នកស្រាវជ្រាវបានវាយតម្លៃរួម ដោយចាត់ទុកការច្រាលជាតិអាស៊ីដ ជាមូលហេតុធ្វើឲ្យគេងមិនដកដង្ហើម (Sleep Apnea) នាំឲ្យដាច់សរសៃឈាមខួរក្បាលបាន។ ទ្រឹស្ដីមួយទៀត គឺដោយសារតែសកម្មភាពរំលាយអាហារ និងឥទ្ធិពលលើសម្ពាធឈាម ជាតិស្ករក្នុងឈាម និងកម្រិតសារធាតុខ្លាញ់ កូលេស្តេរ៉ូល សុទ្ធសឹងគេជឿថា ធ្វើឲ្យមានជំងឺដាច់សរសៃឈាមខួរក្បាល។ យ៉ាងណា គេនៅត្រូវការការសិក្សាស្រាវជ្រាវច្រើនទៀត ដើម្បីបញ្ជាក់ពីបញ្ហានេះ។
២- ត្រូវចៀសវាងធ្វើអ្វីខ្លះ មុនពេលគេង?
គេងភ្លាមបន្ទាប់ពីញ៉ាំ ជាទម្លាប់មិនល្អសម្រាប់សុខភាពនោះទេ ប៉ុន្តែមានសកម្មភាពផ្សេងទៀតគួរចៀសវាង បន្ទាប់ពីញ៉ាំរួច ដូចជា៖
– គេងលក់៖ ពេលយើងគេងលក់ សកម្មភាពរាងកាយក៏ធ្លាក់ចុះដែរ ហេតុនេះនឹងធ្វើឲ្យការរំលាយអាហារកាន់តែយូរ ធ្វើឲ្យឈឺចាប់ប្រព័ន្ធរំលាយអាហារ។ ការទម្រេតខ្លួន គេងផ្ងារ ឬផ្អៀងក៏ដោយ នឹងធ្វើឲ្យអាស៊ីដក្រពះកាន់តែងាយចេញទៅបំពង់អាហារ។ លើសពីនេះ បើយើងគេងភ្លាមបន្ទាប់ពីញ៉ាំអាហារច្រើន ពេលក្រោកងើបឡើងច្រើនតែហើមពោះ។ ត្រូវប្រាកដថា រាងកាយយើង មានពេលគ្រប់គ្រាន់ ដើម្បីរំលាយអាហារ មុនចូលគេង។
– ការហាត់ប្រាណធ្ងន់ៗ៖ ហាត់ប្រាណធ្ងន់ៗ ធ្វើឲ្យរាងកាយពិបាករំលាយអាហារដូចគ្នា ព្រោះថា ហាត់ប្រាណនឹងទាញយកថាមពលរាងកាយដែលត្រូវការ ដើម្បីរំលាយអាហារឲ្យបានត្រឹមត្រូវ។ ហេតុនេះ យើងនឹងជួបបញ្ហារមួល ចង្អោរ ឬរាក នៅពេលហាត់ប្រាណបន្ទាប់ពីញ៉ាំ។
– ញ៉ាំផ្លែឈើ៖ ពិតណាស់ ញ៉ាំផ្លែឈើធ្វើឲ្យសុខភាពល្អ ប៉ុន្តែមិនមែនបន្ទាប់ពីពេលបាយភ្លាមនោះទេ ព្រោះថា ផ្លែឈើរំលាយលឿនជាងប្រភេទអាហារដទៃ ដូចនេះ នឹងនៅលើអាហារ ហើយក៏អាចធ្វើការបំបែកសារធាតុនៅទីនោះទៀតផង។ សកម្មភាពទាំងនេះ ធ្វើឲ្យមានខ្យល់ក្នុងពោះ និងឡើងទម្ងន់។ គួរញ៉ាំផ្លែឈើ យ៉ាងហោច ៣-៤ ម៉ោងបន្ទាប់ពីពេលញ៉ាំអាហារ ដើម្បីប្រាកដថា យើងទទួលផលប្រយោជន៍ពេញលេញពីផ្លែឈើ ដោយមិនបារម្ភពីរឿងហើមពោះ ខ្យល់ក្នុងពោះ ឬបញ្ហាផ្សេងៗឡើយ។
– ផឹកទឹកច្រើន៖ យើងអាចនឹងមិនចាប់អារម្មណ៍ មានបញ្ហាអីកើតឡើង ដោយសារញ៉ាំទឹកបន្តិចបន្តួចនៅពេលបាយឡើយ ប៉ុន្តែគួរចៀសវាងញ៉ាំទឹកច្រើនបន្ទាប់ពីបាយរួច ព្រោះនឹងពង្រាវអាស៊ីដក្រពះ ធ្វើឲ្យក្រពះពិបាករំលាយអាហារ។ ដូចគ្នានេះដែរ ផឹកទឹកកកបន្ទាប់ពីញ៉ាំអាហារ ក៏កាត់បន្ថយសកម្មភាពក្រពះដូចគ្នា។ បើចង់ផឹកអ្វីមួយបន្ទាប់ពីបាយរួច គួរផឹកតែក្ដៅឧណ្ហៗ ប៉ុន្តែនៅតែត្រូវចៀសវាងពុំគួរញ៉ាំសារធាតុទឹកច្រើនពេក បន្ទាប់ពីញ៉ាំអាហារទេ។
– ងូតទឹក៖ គ្នាយើងខ្លះ អាចនឹងមានទម្លាប់ងូតទឹកបន្ទាប់ពីញ៉ាំបាយរួច បើមាន ត្រូវប្ដូរទម្លាប់នេះចេញ ព្រោះវានាំឲ្យមានបញ្ហារំលាយអាហារមួយចំនួន។ មូលហេតុ គឺដោយសាររាងកាយនឹងកើនកម្ដៅពេលអ្នកងូតទឹក ធ្វើឲ្យឈាមរត់ទៅកាន់ផ្ទៃស្បែក ជើង និងដៃច្រើន នាំឲ្យខ្វះខាតសម្រាប់ការរំលាយអាហារ។ ប្រព័ន្ធរំលាយអាហារនឹងដំណើរយឺត បណ្ដាលឲ្យមានខ្យល់ក្នុងពោះ ហើមពោះ និងបញ្ហាផ្សេងៗទៀត។
– បន្ធូរខ្សែក្រវាត់បន្ទាប់ពីញ៉ាំ៖ បើយើងបន្ធូរខ្សែក្រវាត់បន្ទាប់ពីញ៉ាំរួច មានន័យថាយើងបានញ៉ាំច្រើនបន្តិចហើយ នាំឲ្យមិនអាចអង្គុយបានស្រួលដូចមុនពេលញ៉ាំ។ ពេលយើងបន្ធូរខ្សែក្រវាត់ នឹងមានអារម្មណ៍ថាស្រួលខ្លួនគ្រប់គ្រាន់ដើម្បីញ៉ាំបានបន្តទៀត ជាហេតុធ្វើឲ្យលើសទម្ងន់ខ្លាំង។ ហេតុនេះ គួរញ៉ាំតាមដែលអាចធ្វើទៅបាន ដោយពុំគួរបន្ធូរខ្សែក្រវាត់ទេ។
– ដើរភ្លាមៗបន្ទាប់ពីញ៉ាំរួច៖ ដូចនឹងការទម្រេតខ្លួនដែរ ការដើរភ្លាមៗបន្ទាប់ពីញ៉ាំ គឺមិនល្អទេ អាចប្រឈមជាមួយនឹងបញ្ហាផ្សេងៗ ដូចជា ពិបាករំលាយអាហារ និងច្រាលអាស៊ីដក្រពះ។ ជាការសំខាន់ គួរសម្រាកឲ្យត្រង់ខ្លួនមួយសន្ទុះចន្លោះពី ១០-៣០ នាទី ចាំដើរ អាចការពារបញ្ហាច្រាលជាតិអាស៊ីដ ។ ទាំងនេះនឹងជួយដល់ការធ្វើមេតាបូលីស ជួយឲ្យសាច់ដុំរលា ការពារកុំឲ្យលើសជាតិខ្លាញ់ក្នុងរាងកាយទៀតផង។
- ចូលចិត្តញ៉ាំមិនគិត ប្រយ័ត្នប្រឈមបញ្ហាសុខភាពទាំងនេះ
- ដឹងអត់ថាការញ៉ាំអាហារច្រើនជ្រុលប្រឈមនឹងបញ្ហាគាំងបេះដូង?
- ឃើញអីក៏ឃ្លាន ញ៉ាំមិនចេះឆ្អែត មកពីបញ្ហាអី?
- ញ៉ាំទឹកមុនចូលគេង អាចជួយដល់ការសម្រកទម្ងន់ដែរអត់?
- ញ៉ាំទឹកក្ដៅឧណ្ហៗរាល់ថ្ងៃ អាចជួយឲ្យស្រកគីឡូ
- ឆ្ងល់អត់ ក្រោយញ៉ាំអាហារហឹរ ម៉េចចេះតែចុកពោះ?
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម