អង្គរក្សឆ្លង COVID-19 និងជាគ្រូបង្វឹកកីឡានោះ បានប៉ះពាល់ជាមួយមនុស្ស ៧ នាក់
ក្រសួងអប់រំ យុវជន និងកីឡា នៅល្ងាចនេះ បានប្រកាសផ្អាកដំណើរការសកម្មភាព និងការចេញចូលក្នុងបរិវេណពហុកីឡដ្ឋានជាតិអូឡាំពិកជាបណ្តោះអាសន្ន។ ការផ្អាកនេះក្រោមហេតុផលថា អង្គរក្សមួយរូបដែលឆ្លង COVID-19 និងគ្រូបង្វឹក បានមកបង្ហាត់កីឡាករ ២នាក់ នៅក្នុងបរិវេណពហុកីឡដ្ឋានជាតិអូឡាំពិក និងបានទាក់ទងការងារផ្ទាល់ និងដោយប្រយោលជាមួយបុគ្គលិក ៥រូប នៃមជ្ឈមណ្ឌលជាតិហ្វឹកហ្វឺនកីឡា។
ក្នុងសេចក្តីជូនដំណឹងនោះដែរ ក្រសួងបានបញ្ជាក់ថា កំពុងស្រាវជ្រាវបន្តរកអ្នកទំនាក់ទំនងជាមួយបុគ្គលិក និងកីឡាករទាំង ៨ រូបខាងលើ ហើយបានទាក់ទងជាមួយមន្ទីរសុខាភិបាលរាជធានីភ្នំពេញ ដើម្បីរៀបចំបាញ់ថ្នាំសម្លាប់មេរោគនៅក្នុងមជ្ឈមណ្ឌលជាតិហ្វឹកហ្វឺនកីឡា និងអគារដំបូលទូក សូរីនហ្ស៊ិកាំប៉ូ។
