កាលពីថ្ងៃទី ១៨ មិថុនា ២០២១ យោងតាមលទ្ធផលនៃការវិភាគរបស់វិទ្យាស្ថានប៉ាស្ទ័រ ឲ្យដឹងថា កម្ពុជាបានរកឃើញវីរុសបំប្លែងថ្មីប្រភេទ B.1.617-2 (Delta) លើអ្នកដំណើរចំនួន ៧នាក់។ តើវីរុសកូវីដ-១៩ បំប្លែងថ្មី Delta គួរបារម្ភម៉េចខ្លះ? ចាក់វ៉ាក់សាំងអាចការពារបានកម្រិតណា?
វីរុសកូវីដ-១៩ បំប្លែងថ្មី Delta គួរបារម្ភម៉េចខ្លះ? ចាក់វ៉ាក់សាំងអាចការពារបានកម្រិតណា?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ប្រធានផ្នែកវិទ្យាសាស្ត្រ នៃអង្គការសុខភាពពិភពលោក (WHO) លោកស្រី Soumya Swaminathan បានប្រកាសឲ្យដឹងថា បច្ចុប្បន្ននេះវីរុសកូវីដ-១៩ បំប្លែងថ្មី Delta (ប្រភពចេញពីប្រទេសឥណ្ឌា) កំពុងក្លាយជាវីរុសវាយលុកពាសពេញពិភពលោកហើយ។ អ្នកវិទ្យាសាស្ត្រកំពុងមានការព្រួយបារម្ភប្រសិទ្ធភាពវ៉ាក់សាំងកូវីដ-១៩ លើវីរុសបំប្លែង Delta នេះ។
លោកស្រីបន្តថា វីរុសបំប្លែង Delta អាចឆ្លងពីមនុស្សម្នាក់ទៅមនុស្សម្នាក់ទៀតបានលឿន និងមានភាពកាចសហាវជាងវីរុសកូវីដ-១៩ ដើម ហើយវាក៏ត្រូវបានសន្មតថាជាវីរុសបំប្លែងទី៤ ដែលអង្គការសុខភាពពិភពលោកព្រួយបារម្ភ និងតាមដានវីរុសនេះឲ្យបានហ្មត់ចត់។ មជ្ឈមណ្ឌលគ្រប់គ្រង និងប្រឆាំងជំងឺឆ្លងអាមេរិក (CDC) ក៏បានចាត់ទុកវីរុសបំប្លែង Delta នេះថា ជាវីរុសបំប្លែងគួរឲ្យព្រួយបារម្ភកាលពីថ្ងៃអង្គារ ទី២២ មិថុនា ២០២១។
ការសិក្សាពីវីរុស Delta ជាច្រើនបានឲ្យដឹងថា បច្ចុប្បន្ន វ៉ាក់សាំងគ្រប់ដូស ឬ២ដូសមានប្រសិទ្ធភាពយ៉ាងហោច ៨៨% បង្ការមិនឲ្យយើងធ្លាក់ខ្លួនឈឺធ្ងន់ដោយសារវីរុសកូវីដ-១៩ ឬវីរុសបំប្លែងថ្មី Delta។ ប៉ុន្តែមនុស្សដែលចាក់វ៉ាក់សាំងតែមួយដូស មានប្រសិទ្ធភាពត្រឹមតែ ៣៣% ការពារខ្លួនពីវីរុសកូវីដ-១៩ ឬវីរុសបំប្លែងថ្មី Delta ប៉ុណ្ណោះ។ អ្នកវិទ្យាសាស្ត្រមួយចំនួន បានបង្ហាញការព្រួយបារម្ភខ្លាំងចំពោះបុគ្គលដែលមិនទាន់បានចាក់វ៉ាក់សាំង និងបុគ្គលដែលបានចាក់ហើយ តែឆ្លងអំឡុងពេល២-៣សប្ដាហ៍ ដែលរាងកាយមិនទាន់មានអង់ទីករការពារខ្លាំងក្លា។
ទោះជាយ៉ាងណាក៏ដោយ លោកវេជ្ជបណ្ឌិត Vivek Cherian ឯកទេសផ្នែកវេជ្ជសាស្ត្រនៅទីក្រុង Baltimore សហរដ្ឋអាមេរិក យល់ថា យើងមិនគួរបារម្ភខ្លាំងពេកនោះទេ ព្រោះថា វាជារឿងកម្រដែលអ្នកបានចាក់វ៉ាក់សាំង២ដូសរួច នៅតែឆ្លងវីរុសកូវីដ-១៩។ លោកបានឲ្យដឹងទៀតថា បែបនេះដោយផ្អែកលើរបាយការណ៍របស់ CDC អាមេរិក បង្ហាញថាក្នុងចំណោមប្រជាជនអាមេរិកដែលបានចាក់វ៉ាក់សាំងរួចមានតែ ០.០១% ប៉ុណ្ណោះ បានធ្លាក់ខ្លួនឈឺដោយសារ វីរុសកូវីដ-១៩។
ប៉ុន្តែ បើតាមលោក Bob Watcher ប្រធាននាយកដ្ឋានឱសថនៃសាកលវិទ្យាល័យ California ក្នុងទីក្រុង San Francisco សហរដ្ឋអាមេរិក បារម្ភថា មនុស្សមានវ័យចំណាស់ (អាយុ៨០ឡើង) ឬមានប្រព័ន្ធការពាររាងកាយខ្សោយ នឹងត្រូវប្រឈមគ្រោះថ្នាក់ខ្លាំងជាងមនុស្សទូទៅ ក្នុងករណីឆ្លងវីរុសបំប្លែង Delta ទោះចាក់វ៉ាក់សាំងគ្រប់ដូសហើយក៏ដោយ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម