គ្រាប់ឈាមក្រហមជាគ្រាប់ឈាមដែលសម្បូរជាងគេនៅក្នុងរាងកាយយើង ក្នុងចំណោមគ្រាប់ឈាមដទៃទៀត (គ្រាប់ឈាមស ប្លាកែត…)។ ប៉ុន្តែ បើយើងខ្វះគ្រាប់ឈាមក្រហមនៅក្នុងខ្លួនវិញ យើងអាចប្រឈមនឹងបញ្ហាច្រើន ហើយជំងឺខាងក្រោមនេះ អាចជាមូលហេតុនៃការផលិតគ្រាប់ឈាមក្រហមថយចុះដែរ។

យោងតាមការចុះផ្សាយរបស់មន្ទីរពេទ្យ កាល់ម៉ែត ឲ្យដឹងថា គ្រាប់ឈាមក្រហមមាននាទីដឹកនាំអុកស៊ីសែនសម្រាប់ផ្គត់ផ្គង់ និងចិញ្ចឹមគ្រប់សរីរាង្គរបស់មនុស្ស។ បើយើងមានបញ្ហាកង្វះគ្រាប់ឈាមក្រហម វាអាចប៉ះពាល់ដល់បញ្ហាសុខភាព និងអាចបង្កឲ្យមានគ្រោះថ្នាក់ធ្ងន់ធ្ងរដល់ជីវិត។ ក្នុងករណីដែលរាងកាយផលិតគ្រាប់ឈាមក្រហមថយចុះ វាអាចបណ្ដាលមកពីជំងឺមួយចំនួននេះ៖

១. កង្វះអាហារូបត្ថម្ភ (ខ្វះជាតិដែក វីតាមីនB12។ល។)

២. ជំងឺក្រពេញអ័រម៉ូនទីរ៉ូអ៊ីត

៣. ជំងឺខ្សោយតម្រងនោម

៤. ជំងឺមហារីកគ្រាប់ឈាម

៥. ជំងឺមហារីកផ្សេងៗ

៦. ជំងឺខ្សោយខួរឆ្អឹង (បណ្ដាលមកពីសារជាតិពុលមួយចំនួនដូច ការប្រើថ្នាំមិនត្រឹមត្រូវ ថ្នាំបាញ់ដំណាំ។ល។)

ថែទាំតម្រងនោម

ប្រសិនបើផលិតភាពឈាមក្រហមថយចុះ នោះយើងអាចប្រឈមមុខនឹងការកើតជំងឺកង្វះគ្រាប់ឈាមក្រហមមួយទៀត ហើយមូលហេតុដែលបណ្ដាលឲ្យបាត់បង់គ្រាប់ឈាមក្រហមអាចដោយសារ៖

– ការហូរឈាមច្រើន (របួស)

– ការរលាកផ្សេងៗដោយសារ បាក់តេរី វីរ៉ុស ប៉ារ៉ាស៊ីត ឬពពួកផ្សិត

– វិបត្តិអ័រម៉ូន បណ្ដាលឲ្យធ្លាក់ឈាម (ចំពោះស្ត្រី)

– ឬ ស្ត្រីពពោះ។

ចំពោះអ្នកជំងឺកង្វះគ្រាប់ឈាមក្រហមនឹងមានចេញរោគសញ្ញាឲ្យយើងដឹងបានដូច ស្លេកស្លាំងខុសពីធម្មតា ហេវហត់ អស់កម្លាំង ល្ហិតល្ហៃ ឧស្សាហ៍វិលមុខ ឈឺក្បាល មានអារម្មណ៍ធេងធោង ញ័រទ្រូង បេះដូងលោតញាប់ ចុកទ្រូង ដង្ហក់ ឆាប់ហត់ខុសធម្មតា។

ហេតុដូចនេះ យើងត្រូវទៅពិគ្រោះជំងឺជាមួយក្រុមគ្រូពេទ្យជំនាញ ដើម្បីរកពីមូលហេតុនៃជំងឺបង្កពិតប្រាកដ។ សម្រាប់ការព្យាបាលជំងឺកង្វះគ្រាប់ឈាមក្រហមវិញ មិនមែនគ្រាន់តែជាការដាក់បញ្ចូលឈាមក្រហម ឬឲ្យថ្នាំជាតិដែកនោះទេ គឺត្រូវការព្យាបាលត្រឹមត្រូវ និងទាន់ពេលទាន់វេលា។

ការផលិតគ្រាប់ឈាមក្រហមនឹងថយចុះ បើមានជំងឺអស់នេះ