ស្រីៗដែលចូលចិត្តលាបថ្នាំសក់ មានដឹងអត់ថាក្នុងថ្នាំលាបសក់មានផ្ទុកសារធាតុផ្សុំអាចរំខានដល់ស្បែក និងធ្វើឲ្យយើងមានប្រតិកម្មអាលែកហ្ស៊ីបាន។ ដូចនេះហើយជាការសំខាន់ណាស់ដែលស្រីៗយើងត្រូវដឹងពីហានិភ័យ និងវិធីត្រូវដោះស្រាយពេលមានបញ្ហា។
ថ្នាំលាបសក់អាចធ្វើឲ្យមានប្រតិកម្មលើស្បែក និងស្បែកក្បាល?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១. ហេតុអ្វីមនុស្សខ្លះមានប្រតិកម្មនឹងថ្នាំលាបសក់?
មនុស្សមួយចំនួនងាយនឹងមានប្រតិកម្មនៅលើស្បែកណាស់។ នេះមានន័យថាស្បែករបស់អ្នកទាំងនោះឆាប់ឡើងក្រហម ស្ងួត ឬមានរលាក ពេលប៉ះពាល់ជាមួយនឹងសារធាតុណាមួយ។
សារធាតុទាំងនោះអាចមានទាំងសារធាតុបង្កការរលាកដល់ស្បែក ធ្វើឲ្យស្បែកខូចខាត ឬពពួកអាលែកហ្ស៊ែន ដែលភ្ញោចឲ្យមានប្រតិកម្មអាលែកហ្ស៊ីកើតឡើងលើស្បែក។ នៅក្នុងថ្នាំលាបសក់មានសារធាតុគីមីម្យ៉ាងហៅថា paraphenylenediamine (PPD) ដែលជាសារធាតុអាចបង្កឲ្យមានប្រតិកម្មពេលមនុស្សខ្លះប្រើថ្នាំលាបសក់។
២. តើសារធាតុPPD មានសុវត្ថិភាពឬអត់?
ថ្នាំលាបសក់មានផ្ទុកPPD គឺសុវត្ថិភាពក្នុងការប្រើប្រាស់ ដោយយើងអនុវត្តតាមការណែនាំក្នុងការប្រើប្រាស់។ ផលិតផលទាំងនេះ ត្រូវបានត្រួតពិនិត្យយ៉ាងតឹងរឹង និងក៏មានការកំណត់បរិមាណច្រើនបំផុតរបស់PPD នៅក្នុងផលិតផលផងដែរ។ ក្នុងករណីយើងប្រើប្រាស់ថ្នាំលាបសក់ ដោយមិនអនុវត្តតាមការណែនាំពេលលាបសក់ យើងអាចនឹងប្រថុយនឹងប្រតិកម្មធ្ងន់ធ្ងរ។
៣. សញ្ញា និងរោគសញ្ញាប្រតិកម្មនឹងថ្នាំលាបសក់
ប្រតិកម្មទៅនឹងសារធាតុPPD អាចមានពីកម្រិតរលាកស្រាលនៅស្បែកក្បាល ទៅជាប្រតិកម្មអាលែកហ្ស៊ី ដែលអាចភ្ញោចឲ្យមានរោគសញ្ញាប្រតិកម្មធ្ងន់ធ្ងរពេញទាំងរាងកាយ។
ការរំខានកម្រិតស្រាល
បើសិនជាយើងមានផលរំខានពីសារធាតុPPD យើងនឹងឃើញថាស្បែកក្បាល ក ថ្នាស ត្រចៀក និងត្របកភ្នែក នឹងមានបញ្ហាដូចជាទើសៗ និងមានការរលាកបន្ទាប់ពីប្រើថ្នាំលាបសក់។
សម្រាប់ស្បែកដែលប៉ះនឹងសារធាតុPPD នឹងប្រែជាក្រហម ហើម ឡើងកន្ទួល ស្ងួត គ្រើម និងប្រេះ។ ក្រៅពីនេះ យើងក៏អាចមានអារម្មណ៍ថាស្បែកដូចជាក្ដៅផ្សា ផងដែរ។
រោគសញ្ញាទាំងនេះជាធម្មតាអាចកើតមានក្នុងរង្វង់៤៨ម៉ោង តែបើថ្នាំលាបសក់មានផលរំខានខ្លាំង អាចនឹងចេញប្រតិកម្មលើស្បែកភ្លាមៗដែរ។
ប្រតិកម្មអាលែកហ្ស៊ី
ប្រសិនបើយើងអាលែកហ្ស៊ីនឹងសារធាតុPPD នោះស្បែកក្បាល និងមុខរបស់យើងអាចនឹងចាប់ផ្ដើមរមាស់ និងហើម ហើយដងខ្លួនយើងវិញក៏អាចឡើងរមាស់ និងអាចមានអារម្មណ៍មិនស្រួលខ្លួន។ រោគសញ្ញាទាំងនេះ អាចចេញនៅមួយរយៈពេលខ្លី បន្ទាប់ពីប៉ះពាល់ ខណៈប្រតិកម្មកម្រិតធ្ងន់ធ្ងរមួយទៀត អាចនឹងចេញតែប៉ុន្មាននាទីក្រោយប៉ះពាល់ប៉ុណ្ណោះ។
រោគសញ្ញាប្រតិកម្មអាលែកហ្ស៊ីធ្ងន់ធ្ងរទាំងនោះរួមមាន៖
- រមាស់ស្បែក
- ហើមភ្នែក បបូរមាត់ ដៃ និងជើង ហើយត្របកភ្នែកវិញអាចហើមខ្លាំង
- មានអារម្មណ៍ធេងធោង ឬសន្លប់
- ហើមមាត់ បំពង់ក និងអណ្ដាត ដែលធ្វើឲ្យពិបាកដកដង្ហើម
- ក្អួត ឬចង្អោរ
- បាត់បង់ស្មារតី ឬដួលសន្លប់
៤. ដោះស្រាយបែបណា?
បើយើងឃើញមានចេញរោគសញ្ញាប្រតិកម្មអាលែកហ្ស៊ីធ្ងន់ធ្ងរ ត្រូវប្រញាប់ទៅមន្ទីរពេទ្យជាបន្ទាន់។ ប៉ុន្តែបើយើងច្បាស់ថាបញ្ហាកើតមានក្រោយលាបថ្នាំសក់មិនធ្ងន់ធ្ងរ គ្រាន់តែមានការរំខាន យើងអាចកក់សក់ជាមួយសាប៊ូដើម្បីជម្រះថ្នាំសក់ដែលនៅសេសសល់ចេញ។ មួយវិញទៀតចំពោះបញ្ហាលើស្បែក យើងអាចប្រើក្រែមលាបស្បែកមួយចំនួនដើម្បីលាបបំបាត់រោគសញ្ញាបាន។ ក្រែមទាំងនោះ យើងអាចសាកសួរឱសថការី ឬទៅជួបគ្រូពេទ្យដើម្បីឲ្យគ្រូពេទ្យពិនិត្យបន្ថែម និងចេញវេជ្ជបញ្ជាសម្រាប់ក្រែមដែលត្រូវប្រើ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម