គេងមិនលក់ពេលពពោះដោយសារអ្វី? គួរឲ្យបារម្ភអត់?

    គេងមិនលក់ពេលពពោះដោយសារអ្វី? គួរឲ្យបារម្ភអត់?

    អំឡុងពេលពពោះ ស្រីៗគ្នាយើងច្បាស់ជាជួបប្រទះបញ្ហាច្រើន ទាំងធ្លាប់ឆ្លងកាត់ពីមុន ទាំងមិនធ្លាប់ឆ្លងកាត់។ ជាធម្មតាពេលពពោះ ស្រីៗភាគច្រើនតែងមានអារម្មណ៍ល្វើយខ្លាំង និង​គេងច្រើនជារឿងធម្មតាទៅហើយ។ ប៉ុន្តែចំពោះគ្នាយើង មានបញ្ហាគេង​មិនលក់វិញ អាចមិនមែនជារឿងធម្មតាទេ ខណៈគេងមិនលក់ពេលពពោះ ជាបញ្ហាសុខភាពមួយគ្នាយើងត្រូវដឹង។

    ១- គេងមិនលក់ពេលពពោះ

    គេងមិនលក់ពេលពពោះ ជាភាសាបច្ចេកទេស Insomnia មានន័យថា ពិបាកងងុយគេង ឬគេងមិនលក់ ឬកើតមានទាំងពីរយ៉ាងតែម្តង។ ស្រីៗគ្នាយើងកំពុងពពោះ អាចប្រទះបញ្ហានេះគ្រប់ដំណាក់កាល ប៉ុន្តែជាទូទៅ រឿងនេះ​ឧស្សាហ៍កើតមាននៅដំណាក់​កាលត្រីមាសដំបូង និងត្រីមាសទី ៣ នៃការពពោះ។ ជាមួយនឹងបញ្ហាក្រោកបត់ជើងញឹកញាប់ពេលយប់ និងបម្រែបម្រួល​អ័រម៉ូនរាងកាយមិនអាចគ្រប់គ្រងបាន។ ស្រីៗពពោះច្រើនមានបញ្ហាកកស្ទះណាមួយ និងក្រហាយទ្រូងជាដើម ជាហេតុត្រូវចំណាយពេលចេញពីគ្រែច្រើនជាងនៅលើគ្រែ។ យ៉ាងណា ដំណឹងល្អ គឺថាទោះស្ថានភាពគេងមិនលក់ពេលពពោះធ្ងន់ធ្ងរប៉ុណ្ណា ក៏វាមិនគំរាមកំហែងដល់អូនៗក្នុងផ្ទៃនោះដែរ។

    នៅដំណាក់កាលចុងក្រោយនៃការពពោះ ស្រីៗភាគច្រើនកាន់តែពិបាកគេងឲ្យមានផាសុកភាព និង​គ្រប់គ្រាន់ណាស់។ នៅអំឡុងត្រីមាសដំបូងវិញ គ្នាយើងអាចមិនរងឥទ្ធិពលពីគភ៌ក្នុងផ្ទៃក៏ពិតមែន ប៉ុន្តែនៅតែមានបញ្ហាច្រើនទៀត អាចធ្វើឲ្យយើងគេងមិនលក់បាន។

    អត្ថបទពាក់ព័ន្ធ:

    ២- មូលហេតុនាំឲ្យគេងមិនលក់អំឡុងពេលពពោះ

    បើយើងកំពុងពពោះ គឺមានហេតុផលជាច្រើន អាចធ្វើឲ្យក្រោកពីដំណេកកាន់តែច្រើនដងនៅពេលយប់ ដោយរាប់បញ្ចូលទាំង៖

    – ការនោមញឹកញាប់
    – ក្អួត ឬចង្អោរ
    – ឈឺខ្នង
    – បញ្ហាសុដន់
    – មិនស្រួលពោះ
    – រមួលក្រពើ
    – ដកដង្ហើមបានខ្លីៗ
    – យល់សុបិនរវើរវាយ។

    បញ្ហា​ផ្សេងទៀតនាំឲ្យគេងមិនលក់ពេលពពោះ ក៏អាចមានទំនាក់ទំនងជាមួយស្ត្រេស។ គ្នាយើងអាចនឹងព្រួយបារម្ភខ្លាំងពីការសម្រាល ឬបារម្ភពីតួនាទីក្លាយជាម៉ាក់ៗគេ ដែលក្តីបារម្ភទាំងនេះសុទ្ធតែអាចធ្វើឲ្យយើងបញ្ឈរភ្នែកអំឡុងពេលយើងដាក់​ខ្លួន​គេង។

    វាអាចជារឿងពិបាកបន្តិចចំពោះស្រីៗកំពុងពពោះកុំគិតដល់រឿងទាំងអស់នេះ ប៉ុន្តែត្រូវចាំថា ទោះយើងបារម្ភច្រើនប៉ុណ្ណា ក៏មិនអាចជួយអ្វីបានដែរ។ ផ្ទុយមកវិញ គ្នាយើងអាចសាកល្បងកត់ត្រាក្តីបារម្ភទាំងនោះក្នុង​កូន​សៀវភៅ ព្រោះធ្វើបែបនេះអាច​ជួយ​យើងងាយគិតឃើញដំណោះស្រាយ។ បើគ្មានដំណោះស្រាយ ឬយើងគ្មានលទ្ធភាពដោះស្រាយបានបញ្ហាណាមួយ យើង​ក៏អាចរំលងចោលទៅមើលបញ្ហាយើងបារម្ភមួយផ្សេងទៀត ព្រោះនេះ​ជួយឲ្យក្តីបារម្ភទាំងនោះរលាយអស់ពីគំនិតយើង ជួយឲ្យគេងលក់បាន។

    មួយទៀត ស្រីៗ​យើង​អាចនិយាយបញ្ហាទាំងអស់ជាមួយប្តីពីអារម្មណ៍ និងអ្វីយើងកំពុងបារម្ភ ព្រោះក៏អាចជួយឲ្យស្រីៗគ្នាយើងមានអារម្មណ៍ធូរស្រាលបានដែរ។

    ៣- បង្កើតទម្លាប់គេងឲ្យបានត្រឹមត្រូវ

    វិធីល្អបំផុតដើម្បីដោះស្រាយបញ្ហាគេងមិនលក់ពេលពពោះ ស្រីៗអាចរៀបចំទម្លាប់គេងត្រឹមត្រូវមួយសម្រាប់ខ្លួនឯង។ ចាប់ផ្តើមទម្លាប់ចូលគេងនៅម៉ោងជាក់លាក់មួយរៀងរាល់យប់ អាចធ្វើឲ្យយើងមានអារម្មណ៍កាន់តែធូរស្រាលបាន។

    កុំមើលទូរទស្សន៍ ឬទូរសព្ទយ៉ាងហោចណាស់ ១ម៉ោងមុនពេលចូលគេង។ ពន្លឺពណ៌ខៀវចេញពីទូរទស្សន៍ ទូរសព្ទ ឬផេប្លេត អាច​ប៉ះពាល់​ដល់​ចង្វាក់នាឡិកាក្នុងរាងកាយយើង។ ស្រីៗពពោះ អាចសាកល្បងអានសៀវភៅជំនួសវិញក៏​បាន។

    ជាមួយគ្នានេះ ការងូតទឹក ត្រាំក្នុងអាងទឹក សុទ្ធតែអាចជួយឲ្យយើងគេងលក់ស្រួលពេលពពោះ គ្រាន់តែប្រយ័ត្នប្រយែងបន្តិចពីកម្តៅទឹក កុំឲ្យក្តៅពេក ព្រោះអាចមានគ្រោះថ្នាក់ដល់ការអភិវឌ្ឍរបស់គភ៌ក្នុងផ្ទៃ ពិសេសនៅអំឡុងពេលដំណាក់កាលដំបូងនៃការពពោះ។ ដើម្បីសុវត្ថិភាព កុំដេកត្រាំក្នុងអាងទឹកក្តៅឲ្យសោះ (hot tubs)។

    ៤- របបអាហារ និងលំហាត់ប្រាណ

    របបអាហារ និងការហាត់ប្រាណ មានឥទ្ធិពលខ្លាំងទៅលើដំណេករបស់យើង។ ស្រីៗពពោះ បើចង់ឲ្យគេងលក់ស្រួល អាចសាកល្បងតាមតិចនិកខាងក្រោម៖

    – ផឹកទឹកឲ្យបានច្រើន៖ ផឹកទឹកឲ្យបានច្រើនពេញមួយថ្ងៃ ប៉ុន្តែកាត់បន្ថយការផឹកទឹកចាប់ពីម៉ោង ៧យប់ ហើយកុំផឹកកាហ្វេអំឡុងពេលថ្ងៃត្រង់ឲ្យសោះ។

    – ញ៉ាំអាហារជួយឲ្យឆាប់គេង៖ ញ៉ាំអាហារពេលល្ងាចដែលអាចជួយឲ្យសុខភាពល្អ ប៉ុន្តែដើម្បីជួយកាត់បន្ថយបញ្ហាក្រហាយទ្រូង ត្រូវញ៉ាំអាហារនៅពេលព្រលប់ៗ និងកុំបង្កើតទម្លាប់ឃ្លានច្រើននៅម៉ោងគេង។ បើមុនចូលគេងមានអារម្មណ៍ថាឃ្លាន អាចញ៉ាំអាហារ​សម្រន់បន្តិចបន្តួច។ អាហារមានប្រួតេអ៊ីនខ្ពស់ អាចធ្វើឲ្យកម្រិតជាតិស្ករក្នុងឈាមមានស្ថិរភាពពេញមួយយប់។ អាចសាកល្បងទឹកដោះគោក្តៅមួយកែវ ក៏ជួយឲ្យគេងលក់ស្រួលដែរ។

    – ហាត់ប្រាណ៖ អំឡុងពេលពពោះ ស្រីៗត្រូវបញ្ចេញសកម្មភាពឲ្យបានច្រើនបន្តិចនៅពេលថ្ងៃ អាចធ្វើកិច្ចការផ្ទះ ឬហាត់ប្រាណបែបពពោះ សុទ្ធតែអាចជួយឲ្យគេងលក់ស្រួលនៅពេលយប់។ សម្រាប់វិធីហាត់ប្រាណពេលពពោះ មានច្រើនស័ក្ដិសមសម្រាប់ស្រីៗគ្រប់គ្នា ប៉ុន្តែគួរពិភាក្សាជាមួយគ្រូពេទ្យ​ មុនសម្រេចជ្រើសយកវិធីហាត់ប្រាណណាមួយដែលសមជាមួយស្ថានភាពសុខភាពយើង​។

    Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    រូបថត​របស់​អ្នក​និពន្ធbadge
    ដោយ សន សុភា កែសម្រួល​ចុងក្រោយ 11/08/2020
    ត្រួតពិនិត្យដោយ គឹម កាណែល