ខ្លាញ់ត្រីល្អចំពោះសុខភាព ចុះបើស្ត្រីពពោះញ៉ាំថ្នាំខ្លាញ់ត្រីនេះ មានសុវត្ថិភាពចំពោះម៉ាក់ៗ និងគភ៌អត់? “Hello គ្រូពេទ្យ’ នឹងបកស្រាយឲ្យគ្នាយើងបានដឹង។
១- ផលប្រយោជន៍ខ្លាញ់ត្រីលើស្រីៗមានផ្ទៃពោះ
ដោយសារដំណើរលូតលាស់ និងការអភិវឌ្ឍផ្នែកសំខាន់ៗរបស់ខួរក្បាលចាប់ផ្តើមនៅពេលទារកមានអាយុ ២ ឆ្នាំដំបូង នាំឲ្យអាស៊ីដខ្លាញ់អូមេហ្គា ៣ ជាពិសេសសារធាតុ DHA ដើរតួជាធាតុសំខាន់សម្រាប់ស្រីមានផ្ទៃពោះ និងទារកទើបកើត។ ខ្លាញ់ត្រី ជាប្រភពសំខាន់នៃ DHA ក៏ត្រូវចាត់ទុកជាអាហារចាំបាច់សម្រាប់ស្រីមានផ្ទៃពោះគ្រប់រូប ទាំងអំឡុងពេលបំបៅកូនដោយទឹកដោះផងដែរ។
DHA អាចជួយដល់ការសាងសង់ និងរីកលូតលាស់នៃភ្នាសកោសិកាសរសៃប្រសាទ និងភ្នាសកោសិកាភ្នែកទារក ឯ EPA ជាប្រភេទអាស៊ីដខ្លាញ់អូមេហ្គា៣ ត្រូវបានគេរកឃើញភាគច្រើននៅក្នុងខ្លាញ់ត្រី ដើរតួនាទីយ៉ាងសំខាន់ធ្វើឲ្យប្រព័ន្ធភាពស៊ាំទារកកាន់តែប្រសើរឡើង និងការពារពីហានិភ័យកើតមានជំងឺផ្លូវចិត្ត។
ក្នុងការសិក្សារបស់អូស្ត្រាលីចេញផ្សាយក្នុងឆ្នាំ២០០៦ ផ្តោតលើស្រីៗមានផ្ទៃពោះ និងមានសុខភាពល្អចំនួន ៩៨ នាក់ ត្រូវបានគេបែងចែកជា ២ ក្រុម ដោយក្រុមទី១ បានញ៉ាំប្រេងអូលីវ ៤ ក្រាមជារៀងរាល់ថ្ងៃ និងក្រុមមួយទៀត ត្រូវបានឲ្យញ៉ាំខ្លាញ់ត្រីចំនួនស្មើគ្នា ដោយចាប់ផ្តើមញ៉ាំនៅសប្តាហ៍ទី២០ នៃការមានផ្ទៃពោះ រហូតដល់ថ្ងៃសម្រាលកូន។
ជាលទ្ធផលនៃការស្រាវជ្រាវនេះ បន្ទាប់ពីទារកសម្រាលរួច និងធំលូតលាស់ដល់វ័យ ២ ឆ្នាំកន្លះ ក្មេងទាំងពីរក្រុម មិនមានភាពខុសប្លែកគ្នាលើការរីកលូតលាស់ខាងរាងកាយ និងសមត្ថភាពផ្នែកភាសាឡើយ។ ប៉ុន្តែសម្រាប់ក្រុមដែលម៉ាក់ៗញ៉ាំខ្លាញ់ត្រី គឺមានពិន្ទុខ្ពស់ជាង ក្រុមម៉ាក់ៗញ៉ាំប្រេងអូលីវ លើផ្នែកទំនាក់ទំនងរវាងដៃ និងភ្នែក។ លើសពីនេះ អ្នកស្រាវជ្រាវ អះអាងដែរថា ម៉ាក់ៗដែលបានប្រើប្រាស់ខ្លាញ់ត្រី អាចបន្ថយហានិភ័យនៃជំងឺហឺត ប្រតិកម្មអាលែកហ្ស៊ី និងជំងឺស្បែកដទៃទៀត។
អត្ថបទពាក់ព័ន្ធ៖
- ញ៉ាំត្រីឲ្យបាន ២ ដងក្នុងមួយសប្តាហ៍ បេះដូងមានសុខភាពល្អ
- DHA ជាអ្វី? ដឹងថា ខួរក្បាលក្មេងៗត្រូវការវាជាចាំបាច់ប៉ុនណាអត់?
២- គួរញ៉ាំខ្លាញ់ត្រីអំឡុងពេលមានផ្ទៃពោះដែរទេ?
សម្រាប់ចម្លើយ គឺមិនមែន ១០០% ទេ ព្រោះមិនមែនគ្រប់ខ្លាញ់ត្រីទាំងអស់ បង្កើតដោយធាតុផ្សំដូចគ្នាទេ ហេតុនេះគ្រប់ប្រភេទខ្លាញ់ត្រី ក៏មិនមែនសុទ្ធតែមានសុវត្ថិភាពសម្រាប់គភ៌ដែរ។
ខ្លាញ់ត្រីមានពីរប្រភេទសំខាន់ៗ ដោយប្រភេទមានសុវត្ថិភាពសម្រាប់ម៉ាក់ៗអំឡុងពេលពពោះ ជាប្រភេទខ្លាញ់ត្រីចេញពីសាច់ត្រី តែមិនមែនជាតិខ្លាញ់អូមេហ្គា ៣ បានពីថ្លើមត្រី (ដូចជា ថ្នាំគ្រាប់ Cod liver oil pills) នោះទេ ដោយសារតែខ្លាញ់ថ្លើមត្រី មានកម្រិតវីតាមីន A ខ្ពស់។ កម្រិតខ្ពស់នៃវីតាមីន A ខ្ពស់ពេក អាចបង្កឲ្យមានជាតិពុលដល់ថ្លើម និងបង្កឲ្យមានភាពពិការភាពដល់ទារក។ បើចំណីអាហារយើងមានកម្រិតសារធាតុ Retinol (វីតាមីន A) គ្រប់គ្រាន់ នោះសំខាន់បំផុតត្រូវកំណត់បរិមាណប្រើប្រាស់សារជាតិនេះ ដោយសារវាសំខាន់ណាស់សម្រាប់ប្រយោជន៍ដល់គភ៌ ហើយស្រីៗពពោះ ក៏មិនគួរប្រើប្រាស់ថ្នាំបំប៉នវីតាមីនចម្រុះ Multi-Vitamins និងផលិតផលថែរក្សាស្បែក មានសារធាតុ Retinol ដូចគ្នា។
ស្រីៗមិនចូលចិត្តញ៉ាំត្រី ឬមិនអាចញ៉ាំត្រីបាន ដោយសារមូលហេតុមួយចំនួន គួរប្រើថ្នាំគ្រាប់ខ្លាញ់ត្រី។ ទោះជាយ៉ាងណា ញ៉ាំត្រីស្រស់ នៅតែជាវិធីសាស្ត្រល្អបំផុត ដើម្បីបានអាស៊ីដខ្លាញ់អូមេហ្គា ៣ ។ យោងតាមអ្នកឯកទេសសុខាភិបាល បើយើងញ៉ាំត្រីដែលមានជាតិខ្លាញ់ច្រើន ដូចជា ត្រីសាលម៉ុន ត្រីម៉ាការែ និងត្រីធូណា រៀងរាល់សប្តាហ៍ យើងក៏មិនចាំបាច់ញ៉ាំខ្លាញ់ត្រីបន្ថែមទេ។
បើញ៉ាំបួស គួរញ៉ាំអាហារបំប៉នមានសារធាតុអូមេហ្គា ៣ ដែលគេសំយោគចេញពីសារាយសមុទ្រ (Algae)។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
