ការមានផ្ទៃពោះ ធ្វើឱ្យរាងកាយរបស់ស្ត្រីមានការប្រែប្រួល ជាពិសេសគឺប្រព័ន្ធអ័រម៉ូនដែលត្រូវសម្របសម្រួលទៅនឹងស្ថានភាពថ្មីរបស់រាងកាយ ធ្វើឱ្យអ័រម៉ូនខ្លះកើនឡើង ហើយអ័រម៉ូនខ្លះក៏ថយចុះ។ អ័រម៉ូនប្រូឡាក់ទីន (Prolactin) មាននាទីជួយឱ្យស្ត្រីផលិតទឹកដោះសម្រាប់បំបៅកូនដែលកើតមក។ នៅពេលកូនកើតមក ខួរក្បាលរបស់ម្ដាយទទួលបានសញ្ញានៃទម្លាប់បៅរបស់កូន ធ្វើឱ្យការផលិតទឹកដោះកើនឡើងបន្តិចម្ដងៗទៅតាមអាយុរបស់កូន។ អំឡុងពេលបំបៅដោះកូន ស្ត្រីនឹងមិនមានរដូវឡើយ ឬអាចមករដូវមិនទៀងទាត់។ អ៊ីចឹង ស្ត្រីអាចមានផ្ទៃពោះទៀតដែរអត់ អំឡុងពេលបំបៅដោះកូន?
១– តើអាចមានផ្ទៃពោះទៀតអត់ ពេលបំបៅដោះកូន?
ទោះជាកំពុងបំបៅដោះកូនក៏ដោយ ម៉ាក់ៗនៅតែអាចមានផ្ទៃពោះ បើរួមភេទមិនបានការពារ គ្រាន់តែអត្រាមានផ្ទៃពោះមានកម្រិតទាបខ្លាំង ព្រោះនៅពេលបំបៅដោះកូន អ័រម៉ូនប្រូឡាក់ទីនកើនឡើងដើម្បីជំរុញផលិតទឹកដោះ ហើយអ័រម៉ូនប្រូឡាក់ទីននេះនឹងបន្ថយអ័រម៉ូនផ្សេងទៀតដែលធ្វើឱ្យមានដំណើរអូវុល (ស៊ុតបង្កកំណើត)។ ដូច្នេះ បំបៅដោះកូនកាន់តែយូរ នឹងពន្យារពេលមានផ្ទៃពោះម្ដងទៀតកាន់តែយូរ។
កម្រិតអ័រម៉ូនប្រូឡាក់ទីនថយចុះ នៅពេលក្មេងគេងលក់ពេលយប់ អាចឱ្យរាងកាយម្ដាយបានសម្រាកខ្លះ។ ស្ត្រីអាចមានផ្ទៃពោះវិញបាន បើសិនបំបៅដោះកូនផង ប្រើទឹកដោះគោផង។ ជាធម្មតា វាត្រូវការរយៈពេល ៣ ទៅ ៨ ខែដើម្បីឱ្យដំណើរអូវុលរបស់ស្ត្រីត្រឡប់មកធម្មតាវិញ។ បើបំបៅដោះកូនកាន់តែញឹកញាប់ កម្រិតអ័រម៉ូនប្រូឡាក់ទីននឹងកាន់តែកើនឡើង។ អ័រម៉ូននេះនឹងថយចុះទៅវិញ ប៉ុន្តែវាត្រូវការរយៈពេលរហូតដល់ពេញមួយឆ្នាំ ទើបស្ត្រីមានរដូវមកវិញ។
២– សញ្ញាធ្លាក់មេជីវិតញីអំឡុងបំបៅដោះកូន
ការមានផ្ទៃពោះ ពេលបំបៅដោះកូន ហាក់ដូចជាមិនអាចទៅរួច ព្រោះអំឡុងពេលបំបៅដោះកូន ស្ត្រីនឹងគ្មានរដូវទេ ដូច្នេះធ្វើម៉េចដឹងថាមានដំណើរអូវុលទៅ?
ជាធម្មតា រដូវនឹងបាត់អស់រយៈពេលជាច្រើនខែ បន្ទាប់ពីសម្រាលកូនហើយ។ ប៉ុន្តែ ការបាត់រដូវ មិនមែនមានន័យថា យើងមិនអាចមានកូនទេ។ ជាការពិត រាងកាយរបស់ស្ត្រីនៅតែមានស៊ុតបង្កកំណើត មុនមករដូវដំបូងក្រោយសម្រាលកូន។ ដូច្នេះ យើងត្រូវយកចិត្តទុកដាក់លើសញ្ញានៃការអាចមានកូនទៀត បើចាប់ផ្ដើមរួមភេទជាមួយស្វាមីវិញ៖
– សញ្ញាដំបូងនៃដំណើរអូវុល គឺមានការកើនឡើងនូវទឹករម្អិលទ្វារមាស។ បើសម្គាល់ឃើញថា ទឹករម្អិលទ្វារមាសប្រែពីខាប់ និងស ទៅជាថ្លា ហើយអន្ធិល មានន័យថា យើងអាចមានកូនវិញហើយ។
– កម្ដៅរាងកាយកើនឡើង មានន័យថា យើងអាចមានធ្លាក់មេជីវិតញី។
– ទឹករម្អិលប្ដូរពណ៌ ក៏ជាសញ្ញាមួយទៀតដែលបញ្ជាក់ថាអាចមានកូនដែរ។ ស្ត្រីជាច្រើន មានរដូវដំបូងក្រោយពីសម្រាលកូន ប្ដូរពណ៌ពីក្រហម ទៅជាមានពណ៌ត្នោត ឬផ្កាឈូក។ ការប្ដូរពណ៌នេះ បង្ហាញថាស្បូនយើងត្រលប់មករកវដ្ដរដូវទៀងទាត់ម្ដងទៀត។
អត្ថបទពាក់ព័ន្ធ៖
- ទម្ងន់ស្តង់ដារកូន ២ គីឡូកន្លះ ចុះបើភ្លោះត្រូវគុណទ្វេដងមែន?
- ដឹងថាទឹកដោះម៉ាក់ៗមានប៉ុន្មានប្រភេទ មានផ្ទុកអីខ្លះអត់?
- កូនកើតភ្លាម គួរបំបៅដោះប៉ុន្មានដងទើបល្អ?
- ត្រូវបំបៅដោះកូនឲ្យបានប៉ុន្មានខែ ទើបសុខភាពកូនល្អ?
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុតសូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា ធ្វើរោគវិនិច្ឆ័យ ឬព្យាបាលជូនទេ៕
[embed-health-tool-due-date]
