ឃើញមុខកូនជាលើកដំបូងមិនមែនតែម៉ាក់ៗឡើយដែលរំភើប ប៉ាៗក៏មិនចាញ់គ្នាដែរ។ ទន្ទឹមនឹងខ្លួនមានអារម្មណ៍រីករាយ ប៉ាៗល្អគួរតែធ្វើរឿង ៥ យ៉ាងនេះ តាមការឲ្យដឹងពីអ្នកគ្រូពេទ្យ មួន រ៉ានី បម្រើការនៅមណ្ឌលសុខភាពព្រែកពោធិ៍ ស្រុកស្រីសន្ធរ ខេត្តកំពង់ចាម ដើម្បីឲ្យកូនកាន់តែមានសុវត្ថិភាព និងកាន់តែកក់ក្ដៅ។
១- ទទួលកូនពីពេទ្យមកបី
បន្ទាប់ពីគ្រូពេទ្យយកកូនទៅសម្អាតខ្លួនហើយ ប៉ាៗអាចទទួលយកប៊េបីមកបីផ្អោបជាប់នឹងទ្រូង ឬយកទៅដាក់លើទ្រូងម៉ាក់ៗបន្ត។ ការធ្វើបែបនេះ នឹងធ្វើឲ្យប៉ាៗទទួលអារម្មណ៍ពិសេសមិនធ្លាប់មាន ព្រោះនោះជាលើកដំបូងដែលខ្លួនបានថ្នាក់ថ្នមកូនមុនដំបូងបំផុត។
២- លួងកូន
ទារកភាគច្រើនបន្ទាប់ពីសម្រាលចេញផ្ទៃម្តាយរួច តែងតែយំ ដូច្នេះដើម្បីចង់ដឹងថា អារម្មណ៍ពេលលួងកូនពិបាកយ៉ាងណា ហើយប៉ាៗនឹងយល់ពីសុខទុក្ខម៉ាក់ៗ។ ជាជំហានដំបូង ប៉ាៗអាចយកកូនមកដាក់ក្បែរទ្រូង ហើយអង្រួនកូនតិចៗ ដើម្បីឲ្យបាត់យំ ឬបើនៅតែមិនបាត់ អាចយកកូនទៅឲ្យពេទ្យ ឬម៉ាក់ៗបំបៅវិញ។
៣- ពិនិត្យមើលអវយវៈកូន
មានប៉ាម៉ាក់មិនតិចទេ ដែលបារម្ភពីរាងអវយវៈកូន ខ្លាចលើស ឬខ្វះ។ ដូចនេះពេលឃើញកូនកើតមកមានសុខភាពល្អហើយនោះ ប៉ាៗក៏គួរតែទៅកន្លែងជូតសម្អាតរបស់អ្នកគ្រូពេទ្យ ដើម្បីមើលថា កូនរបស់ខ្លួនគ្រប់អវយវៈហើយឬនៅ។
៤- តាមមើលកូនរហូតមកដល់បន្ទប់សម្រាល
អ្នកខ្លះចេះតែគិតថា ខ្លាចច្រឡំកូនខ្លួនជាមួយអ្នកដទៃ ពេលពេទ្យបីមកបន្ទប់សម្រាលធម្មតាវិញ។ បើមានការសង្ស័យបែបនេះ ប៉ាៗគួរតែដើរតាមពេទ្យ និងដែលបីកូនចេញពីបន្ទប់សម្រាល មកបន្ទប់សម្រាកវិញ ដើម្បីឲ្យប្រាកដចិត្ត តែចៀសវាងកុំយកខ្សែអ្វីទៅចងចំណាំ ព្រោះស្បែកទារកខ្ចីងាយនឹងប្រតិកម្មណាស់។
៥- ឱបទាំងម៉ាក់ៗ និងកូន
ក្រោយពេលកូនកើតមក ហើយបីយកមកឲ្យម៉ាក់មើលមុខ គួរតែឱបអ្នកទាំង ២ ដើម្បីជាការផ្ដល់កម្លាំងចិត្ត និងក្ដីស្រលាញ់ទ្វេដងចំពោះមនុស្សសំខាន់។
អត្ថបទពាក់ព័ទ្ធ៖ ជាស្វាមី និងប៉ាៗល្អគួរតែធ្វើរឿងទាំងនេះពេលម៉ាក់ៗពពោះ និងសម្រាល
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-due-date]
