ម៉ាក់ៗចង់ឲ្យកូនក្នុងផ្ទៃមានសុខភាពល្អ ថ្លោសគួរឲ្យស្រលាញ់ ប៉ុន្តែត្រូវដឹងថា ពេលកូនថ្លោសពេក ហើយសម្រាលដោយវះកាត់មិនអីទេ តែបើសម្រាលបែបធម្មជាតិវិញ ច្បាស់ជាអីហើយ ពោលគឺពិបាកសម្រាល។ ទោះជាកូនអាចកើតដោយសុវត្ថិភាពក៏ពិតមែន ប៉ុន្តែនឹងប្រឈមបញ្ហាសុខភាពច្រើនដូចគ្នា។ “Hello គ្រូពេទ្យ’ នឹងប្រាប់លម្អិតពីករណីកូនថ្លោសលើសកម្រិតឲ្យយើងដឹង។
១- អ្វីទើបហៅថាកូនថ្លោសលើសកម្រិត?
កូនជាមធ្យមកើតមកមានទម្ងន់ ២,៥ គីឡូក្រាមឡើង ប៉ុន្ដែករណីខ្លះ កូនកើតមកមានទម្ងន់ដល់ ៤ គីឡូក្រាម ឬធ្ងន់ជាងនេះ ត្រូវគេចាត់ទុកជាថ្លោស។ ក្នុងវេជ្ជសាស្រ្ដ ហៅថា កូនថ្លោសខុសប្រក្រតី (Macrosomia) ដោយកូនមានទម្ងន់ធ្ងន់ជាង ៤,៥គីឡូក្រាម ហើយករណីនេះ កូនអាចប្រឈមមុខជាមួយបញ្ហាសុខភាពជាច្រើន ក៏ដូចជាផលវិបាក និងប៉ះពាល់ដល់សុខភាពរបស់ម្ដាយផងដែរ។
២- ធ្វើម៉េចទើបដឹងថាកូនថ្លោសខុសប្រក្រតី?
ដើម្បីដឹងថាទារកថ្លោសខុសប្រក្រតី ឬយ៉ាងណា អាចជារឿងពិបាក អំឡុងពេលនៅក្នុងស្បូន ហើយយើងអាចដឹងបាន លុះត្រាក្រោយពេលកូនកើតចេញមកក្រៅប៉ុណ្ណោះ។ ទោះបីការឆ្លុះអេកូ អាចប្រាប់ឲ្យដឹងពីទំហំគភ៌ក៏ដោយ ក៏មិនប្រាកដថាត្រឹមត្រូវ ១០០% នោះដែរ ពិសេសពេលយើងជិតគ្រប់ខែ ប្រហែលមាន ១០% អាចខុស។ ពេលឆ្លុះអេកូ អាចឲ្យយើងដឹងពីទំហំ និងថ្ងៃសម្រាល យើងក៏តម្រូវឲ្យធ្វើតេស្ដឈាមរកកម្រិតជាតិស្ដរ ដើម្បីរកមើលជំងឺទឹកនោមផ្អែមពេលមានផ្ទៃពោះ ដែលជាមូលហេតុចម្បងធ្វើឲ្យគភ៌មានទំហំថ្លោសជ្រុល។
៣- មូលហេតុបណ្ដាលឲ្យកូនថ្លោសជ្រុល
ទឹកនោមផ្អែមពេលមានផ្ទែពោះ គឺជាមូលហេតុចម្បង ប៉ុន្តែក៏មានកត្ដាផ្សេងទៀត អាចបណ្ដាលឲ្យមានបញ្ហាដូចជា៖
– ឡើងទម្ងន់ខ្លាំងពេលមានពពោះថ្មីៗ
– មិនស្រកគីឡូ តាំងពីពេលមានផ្ទៃពោះមុនៗ
– កូនចាស់ខែ (លើស ២ សប្ដាហ៍ ឬច្រើនជាងនេះ)
ទំហំគភ៌ អាចដឹងបានតាមពូជសាសន៍ និងភេទ ទារកតែងមានទំហំធំជាងទារិកា ហើយឱកាសប្រឈមបញ្ហាថ្លោសជ្រុល ក៏ខ្ពស់ បើយើងធ្លាប់សម្រាលកូនមានទំហំធំៗពីមុនមក។
អត្ថបទពាក់ព័ន្ធ៖
៤- មានអ្វីកើតឡើងក្រោយសម្រាល?
បើទោះជាមានការលំបាកខ្លះក្ដី ក៏ពេទ្យនៅតែអាចជួយយើងសម្រាលតាមទ្វារមាសបានដែរ។ តាមពិត ២/៣ នៃកូនថ្លោសជ្រុល អាចសម្រាលតាមទ្វារមាស គ្រាន់តែត្រូវការពេលយូរបន្ដិចពេល។
មួយក្នុងចំណោម ៥ ករណី កូនថ្លោសជ្រុលត្រូវការការជំនួយពេលសម្រាល ហើយផលវិបាកមាន ដូចជា ធ្លាក់ឈាមច្រើន និងរហែកទ្វារមាសធ្ងន់ធ្ងរ។ ប៉ុន្ដែចំពោះអ្នកធ្លាប់សម្រាលដោយមិនមានផលវិបាកតាំងពីកូនមុនៗ នឹងមានភាពងាយស្រួលជាង។
ឱកាសសម្រាលកូន ពិបាកខ្លាំង ដោយសារទំហំធំជាងត្រគាក មាន ១/១៣ ករណី ហើយលទ្ធភាពអាចកើនឡើង ២ ដង បើសិនទារកមានទម្ងន់ដល់ ៥ គីឡូក្រាម។ ករណីនេះសំដៅលើការជាប់ស្មាទារក បន្ទាប់ពីចេញក្បាលមកក្រៅ បើករណីធ្ងន់ធ្ងរ គឺត្រូវការសង្គ្រោះបន្ទាន់ពីគ្រូពេទ្យ ពិសេសក្រុមគ្រូពេទ្យជំនាញនឹងនៅក្បែរយើង ដើម្បីណែនាំរបៀបប្រឹង ពេលណាត្រូវប្រឹង និងស្ថិតនៅទីតាំងណា ងាយឲ្យស្មាទារកចេញមកក្រៅបាន។
ដោយឡែក បើយើងពិបាកខ្លាំង នោះឆ្មប នឹងសម្រាលដោយប្រើថ្នាំ តែយ៉ាងណាត្រូវប្រាកដថា យើងអាចគ្រប់គ្រងស្ថានការបាន និងត្រូវមានបម្រុងប្រយ័ត្នខ្ពស់ ព្រោះការចាក់ថ្នាំឲ្យកូនសម្រាលមុនពេល មិនល្អនោះទេ ពិសេសស្រីៗមានជំងឺទឹកនោមផ្អែម គួរសម្រាលនៅសប្ដាហ៍ទី ៣៨ ហើយការសម្រាលដោយវះកាត់ ជាជម្រើសល្អមួយ ដើម្បីការពារកុំឲ្យមានផលវិបាក អំឡុងពេលសម្រាល។
៥- ទំនាក់ទំនងរវាងទំហំ និងបញ្ហាសុខភាពកូន
កូនថ្លោសជ្រុលភាគច្រើន មានសុខភាពល្អណាស់ ប៉ុន្តែកូនដែលសម្រាលជាប់ទម្រង់ស្មា អាចនឹងមានបញ្ហាមួយចំនួនលើប្រព័ន្ធប្រសាទនៅស្មា និងដៃ ដែលអត្រាប្រឈមមានចាប់ពី ២-១៦% អាចបណ្ដាលមកពីការសង្គ្រោះពេលសម្រាល ដោយសារគ្រូពេទ្យ ឬរងសម្ពាធកន្ដ្រាក់ខ្លាំងពេក ទាញកូនចេញមកក្រៅខ្លាំងពេក។ ទោះជាយ៉ាងនេះក្តី ប្រព័ន្ធប្រសាទនៅស្មា និងដៃកូនដែលខូចខាត នៅតែអាចព្យាបាលបាន សូម្បីតែឆ្អឹងដងកាំបិតដែលបាក់ក៏ដោយ ចុងក្រោយនៅតែជាសះស្បើយដោយខ្លួនឯង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-due-date]
