អាហារយើងញ៉ាំ មានឥទ្ធិពលខ្លាំងលើទិដ្ឋភាពសុខភាពរាងកាយរបស់យើង រួមទាំងបានជួយកាត់បន្ថយហានិភ័យជំងឺរ៉ាំរ៉ៃផ្សេងៗ ដូចជាជំងឺបេះដូង ជំងឺទឹកនោមផ្អែម និងជំងឺមហារីកជាដើម។
ការវិវត្តទៅកើតជំងឺមហារីក មានទំនាក់ទំនងយ៉ាងខ្លាំងទៅនឹងរបបអាហារប្រចាំថ្ងៃរបស់យើងរាល់គ្នា។ អាហារជាក់លាក់មួយចំនួន មានគុណប្រយោជន៍ក្នុងការកាត់បន្ថយហានិភ័យជំងឺមហារីកបាន។ តើមានអាហារអ្វីខ្លះដែរ?
១. ផ្កាខាត់ណាខៀវ
ផ្កាខាត់ណាខៀវមានផ្ទុកសារធាតុ sulforaphane ដែលជាធាតុអាចប្រឆាំងនឹងជំងឺមហារីកបាន។ ការសិក្សាលើសត្វកណ្ដុរបានរកឃើញថា សារធាតុ sulforaphane ជួយសម្លាប់កោសិកាមហារីកក្រពេញប្រូស្តាត និងកាត់បន្ថយទំហំដុំសាច់បង្កជំងឺមហារីកបានជាង៥០ភាគរយ។
ដូចគ្នាដែរ ការសិក្សាមួយចំនួនផ្សេងទៀតបានរកឃើញថា ការញ៉ាំផ្កាខាត់ណាខៀវ ក៏បានរួមចំណែកក្នុងការកាត់បន្ថយហានិភ័យជំងឺមហារីកពោះវៀនធំផងដែរ។
២.ការ៉ុត
ការសិក្សាមួយចំនួនបានរកឃើញថា ការ៉ុតអាចជួយបន្ថយហានិភ័យនៃការកើតជំងឺមហារីកប្រភេទមួយចំនួន។ តាមលទ្ធផលនៃការវិភាគលើការសិក្សាចំនួនប្រាំបានរកឃើញថា ការញ៉ាំការ៉ុតអាចជួយកាត់បន្ថយហានិភ័យកើតជំងឺមហារីកក្រពះបានរហូតដល់២៦ភាគរយ។
ការសិក្សាដាច់ដោយឡែកមួយទៀត បានរកឃើញថា ការញ៉ាំការ៉ុតជាប្រចាំ ក៏អាចមានលទ្ធភាពក្នុងការកាត់បន្ថយកត្តាប្រឈមកើតជំងឺមហារីកក្រពេញប្រូស្តាតបាន១៦ភាគរយផងដែរ។
៣. ពពួកសណ្ដែក
ពពួកសណ្ដែកមានជាតិសរសៃខ្ពស់ ការសិក្សាមួយចំនួនរកឃើញថាការញ៉ាំពពួកសណ្ដែកបានជួយការពារប្រឆាំងនឹងមហារីកពោះវៀនធំ។
ការសិក្សាមួយធ្វើលើមនុស្សចំនួន១ ៩០៥នាក់ មានប្រវត្តិមានដុំសាច់បង្កមហារីក និងបានរកឃើញថាអ្នកដែលបានញ៉ាំពពួកសណ្ដែកហាក់បានកាត់បន្ថយអត្រាកើតមានដុំសាច់បង្កជំងឺមហារីក។
ការសិក្សាមួយទៀតធ្វើលើសត្វកណ្ដុរ បានរកឃើញដែរថា កណ្ដុរស៊ីសណ្ដែកខ្មៅ បានកាត់បន្ថយហានិភ័យប្រឈមជំងឺមហារីកពោះវៀនធំ ដោយសារធាតុនៅក្នុងសណ្ដែកជួយទប់ស្កាត់ការលូតលាស់កោសិកាមហារីកបានដល់ទៅ៧៥ភាគរយ។
៤. រមៀត
និយាយដល់រមៀតវិញ ត្រូវគេដឹងថាជាអាហារល្អចំពោះសុខភាពដែរ។ សារធាតុCurcumin នៅក្នុងរមៀត គឺជាធាតុគីមីប្រឆាំងនឹងការរលាក ជាអុកស៊ីតកម្ម និងមានឥទ្ធិពលប្រឆាំងជំងឺមហារីក។
ការសិក្សាបានរកឃើញថា Curcumin បានជួយបន្ថយការរាលដាលកោសិកាមហារីកពោះវៀនធំ ដោយបានដាក់មុខសញ្ញាលើអង់ហ្ស៊ីមទាក់ទងនឹងការលូតលាស់របស់មហារីក។ លើសពីនេះ ការសិក្សាបានរកឃើញដែរថាCurcumin ក៏មានលទ្ធភាពក្នុងការប្រឆាំងនឹងកោសិកាមហារីកនៅ ក្បាល និងក ទៀតផង។
ក្រៅពីនេះ Curcumin ក៏ត្រូវគេជឿថាមានឥទ្ធិពលក្នុងការពន្យឺតការលូតលាស់កោសិកាមហារីកសួត សុដន់ និងក្រពេញប្រូស្តាតផងដែរ។
៥. ប៉េងប៉ោះ
សារធាតុ Lycopene មាននៅក្នុងផ្លែប៉េងប៉ោះ ជាសារធាតុមួយអាចប្រឆាំងនឹងមហារីក។ ការសិក្សាមួយចំនួនបានរកឃើញថា ការញ៉ាំសារធាតុLycopene បានច្រើនអាចជួយកាត់បន្ថយហានិភ័យជំងឺមហារីកក្រពេញប្រូស្តាត។
ការសិក្សាបានបញ្ជាក់ថា យើងអាចញ៉ាំប៉េងប៉ោះឆៅ ឬចម្អិន ឬទឹកប៉េងប៉ោះសុទ្ធតែមានប្រយោជន៍ដល់ការកាត់បន្ថយហានិភ័យជំងឺមហារីកក្រពេញប្រូស្តាត។
៦. ខ្ទឹមស
គ្រឿងទេសមួយមុខនេះវិញ ដឹងតែគ្នាយើងប្រើប្រាស់ក្នុងអាហារស្ទើរតែរាល់ថ្ងៃមិនខាន។ ខ្ទឹមសមានសារធាតុ allicin ដែលអាចសម្លាប់កោសិកាមហារីក។ ការសិក្សាក៏បានរកឃើញទៀតដែរថា អ្នកចូលចិត្តញ៉ាំខ្ទឹមសមានហានិភ័យកើតជំងឺមហារីកក្រពះទាបជាងអ្នកកម្រញ៉ាំខ្ទឹមស។
ដូចគ្នាដែរ ប្រុសៗចូលចិត្តញ៉ាំខ្ទឹមស ក៏បានបន្ថយហានិភ័យកើតជំងឺមហារីកក្រពេញប្រូស្តាតផងដែរ។
[embed-health-tool-bmr]
