យើងជាធម្មតា ទើបញ៉ាំអីហើយ លឿនបំផុតក៏ត្រូវការពេល ៣-៦ ម៉ោងដែរ ទើបអាហារទាំងនោះរលាយអស់ ធ្វើឲ្យយើងឃ្លានចង់ញ៉ាំរបស់ផ្សេងទៀត។ ប៉ុន្តែគ្នាយើងខ្លះ ឃ្លានគ្រប់ពេលតែម្តង ទោះទើបតែញ៉ាំឆ្អែតក៏ដោយ ឃើញអីផ្សេង ក៏ឃ្លានភ្លាមតែម្តង ខណៈបញ្ហានេះត្រូវគេជឿថា ជាប់ពាក់ព័ន្ធកត្តាសុខភាពមួយចំនួន រាប់ទាំងកត្តាផ្លូវចិត្តដែរ។ អត្ថបទនេះ “Hello គ្រូពេទ្យ’ នឹងពន្យល់ឲ្យគ្នាយើងបានដឹង។
១- កត្តាអ្វីខ្លះធ្វើឲ្យចេះតែឃ្លានញ៉ាំមិនចេះឆ្អែត?
មានកត្តាជាមួយចំនួន ធ្វើឲ្យមានបញ្ហាឃ្លានគ្រប់មុខបែបនេះ ដូចជា៖
– បញ្ហាសុខភាព
– ទំនាស់ជាមួយមិត្តភក្តិ គ្រួសារ និងមិត្តរួមការងារ
– ស្ត្រេស
– ស្ថានភាពហិរញ្ញវត្ថុ
– នឿយហត់។
២- គន្លឹះជួយបញ្ឈប់អារម្មណ៍ចេះតែចង់ញ៉ាំគ្រប់មុខ
– បង្ក្រាបភាពស្រ្តេស៖ ក្រៅពីបន្ធូរស្ត្រេសដោយការញ៉ាំ យើងអាចសាកល្បងអ្វីផ្សេង អាចជាការហាត់ប្រាណ ដូចជា យូ៉ហ្កា សមាធិ ឬដកដង្ហើមវែងៗ។
– បំបាត់ភាពអផ្សុក៖ គ្នាយើងភាគច្រើន ចូលចិត្តញ៉ាំនៅពេលអផ្សុក ខណៈវិធីនេះ មិនល្អសម្រាប់សុខភាព និងស្ថានភាពលុយកាក់ប៉ុន្មានទេ។ ត្រូវព្យាយាមស្ដាប់ចម្រៀង មើលកុន ឬទៅ Gym នៅពេលមានអារម្មណ៍ឃ្លាន។
– បង្ការកុំឲ្យញ៉ាំច្រើន៖ វិធីនេះ ត្រូវឈប់ទិញអាហារមកស្ដុកទុកក្នុងផ្ទះ ព្រោះពេលយើងមើលឃើញអាហារទាំងនោះញឹកញាប់ ក៏ជាមូលហេតុ ធ្វើឲ្យចង់ញ៉ាំភ្លាមៗដូចគ្នា។
– អាហារសម្រន់សុខភាព៖ បើមិនអាចរារាំងអំណាចឃ្លានរបស់ខ្លួនបាន គួរធ្វើការផ្លាស់ប្ដូរពីអាហារមិនល្អ មកជាអាហារមានសុខភាពល្អវិញ ដូចជាបន្លែ ផ្លែឈើ ឬសណ្ដែក។ យ៉ាអួរ មួយចាន ផ្សំជាមួយផ្លែស្ត្ររប៊ើរី ប្លូប៊ែរី ផ្លែគីវី និងប្រភេទសណ្ដែកមួយចំនួនទៀត អាចជួយបន្ថែមរសជាតិឆ្ងាញ់ និងមានសុខភាពល្អ។
អត្ថបទពាក់ព័ន្ធ៖
- អ្នកមានជំងឺផ្លូវចិត្តគ្រប់ប្រភេទ បណ្ដាលមកពីកត្តាទាំង៣នេះ
- កំហុសមិនមែនជាបរាជ័យទេ! វិធីសាស្ត្រនេះអាចជួយឲ្យសប្បាយចិត្តវិញបាន
– កុំបង្អត់អាហារខ្លួនឯង៖ កំហុសធំមួយគ្នាយើងតែងធ្វើដោយមិនដឹងខ្លួន គឺព្យាយាមញ៉ាំតិច និងញឹកញាប់ ដើម្បីកាត់បន្ថយចំនួនកាឡូរី បង្ខំចិត្តខ្លួនឯង ញ៉ាំអាហារសុខភាពដដែលៗ និងចៀសវាងការញ៉ាំហួសប្រមាណ។ ទោះជាវិធីនេះ ល្អ និងមានប្រសិទ្ធភាពក៏ដោយ ប៉ុន្តែអាចប្រើបានចំពោះគ្នាយើងមានសតិអារម្មណ៍ខ្ពស់ប៉ុណ្ណោះ ខណៈគ្នាយើងខ្លះទៀត បើប្រើវិធីនេះ នឹងកាន់តែធ្វើឲ្យឃ្លានពីមួយថ្ងៃទៅមួយថ្ងៃ។ ហើយនៅពេលមួយយើងលែងគ្រប់គ្រងការស្រេកឃ្លានបាន យើងនឹងញ៉ាំកាន់តែច្រើនជាងមុន ស្មើ ឬលើសបរិមាណអាហារយើងបានតមទៅទៀត។
– ស្វែងរកការគាំទ្រ៖ សម្រកទម្ងន់ និងព្យាយាមគ្រប់គ្រងស្រេកឃ្លាន គឺពិតជាពិបាក ពិសេសនៅពេលយើងព្យាយាមធ្វើតែម្នាក់ឯង ទាំងមិនឲ្យសមាជិកគ្រួសារ ឬមិត្តភក្តិណាមួយដឹង។ ជំនួយទាំងផ្លូវកាយ នឹងផ្លូវចិត្ត យើងទទួលបាន អាចជួយយើងធ្វើការសម្រកទម្ងន់បានជោកគជ័យ។
– រៀនពីអតីតកាល៖ បើយើងធ្លាប់បរាជ័យក្នុងផែនការសម្រកទម្ងន់ និងធ្លាប់មានអារម្មណ៍ចេះតែចង់ញ៉ាំ សូមកុំទាន់បោះបង់ចោលអី។អនុគ្រោះឲ្យខ្លួនឯង និងក្រោកឈរបន្តទៅមុខទៀត។ អាចកត់ត្រាទុកអ្វីមួយយើងបានធ្វើខុស បន្ទាប់មកព្យាយាមឈប់ធ្វើម្តងទៀតនៅថ្ងៃមុខ។
ត្រូវចាំថា មិនមែនលើលោកនេះ មានតែយើងម្នាក់ឯង ចេះតែមានអារម្មណ៍ចង់ញ៉ាំ ឃ្លានគ្រប់ពេលនោះទេ នៅមានមនុស្សជាច្រើន អាចកំពុងជួបប្រទះបញ្ហាដូចជាយើងដែរ ហើយត្រូវចាំក្នុងចិត្ត ញ៉ាំដោយសារតែស្រ្តេស ទុក្ខសោក ឬដោយសារបញ្ហាអ្វីមួយ មិនបានជួយសុខភាពយើងអីឡើង មានតែធ្វើឲ្យយើងមានបញ្ហាសុខភាពស៊ាំញ៉ាំទៅវិញ។ ធ្វើតាមគន្លឹះខាងលើ ដើម្បីអាចគ្រប់គ្រងលើអារម្មណ៍ចេះតែចង់ញ៉ាំនេះ ហើយបែរនៅតែគ្មានប្រសិទ្ធភាព គួរតែទៅជួបជាមួយអ្នកជំនាញឲ្យជួយហើយ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmr]
