ស្រា ឬគ្រឿងស្រវឹង មិនល្អចំពោះសុខភាពនោះទេ បើដាក់លើស ហើយណាមួយវាបង្កជំងឺច្រើនមុខ ជាពិសេសជំងឺរលាកថ្លើម។ ទោះបានដឹង និងយល់ពីហានិភ័យចំពោះសុខភាព តែការផឹកស្រា នៅតែពេញនិយមខ្លាំង ហើយអ្នកខ្លះ ផឹកសឹងរាល់ថ្ងៃ។

ក្រោយផឹកស្រា ឬគ្រឿងស្រវឹង ២០នាទី យើងមានអារម្មណ៍សប្បាយ និងឈឺក្បាលតិចៗ។ ១ម៉ោងក្រោយមក យើងចាប់ផ្ដើមខ្សោះជាតិទឹកក្នុងខ្លួន នោមញឹក និងមានអារម្មណ៍ងងុយគេង។ ចាប់ពី ១២-២៤ម៉ោងក្រោយ មានការលេចឡើងនៅរោគសញ្ញាក្រោយស្រវឹង ដូចជា ឈឺក្បាល វិលមុខ ស្រេកទឹក និងញ័រ។ ទាំងនេះ ជាអ្វីដែលកើតឡើងលើរាងកាយរបស់យើង ក្រោយការផឹកស្រា ២៤ម៉ោង។

ចំណែកការផឹកស្រា ឬគ្រឿងស្រវឹងរាល់ថ្ងៃវិញ បណ្ដាលរមាស់ភ្នាសរំអិលក្នុងក្រពះ និងទឹកអាស៊ីដក្រពះ មានបញ្ហា ហើយបង្កជាជំងឺរលាកក្រពះ ទល់លាមក អារម្មណ៍បាក់ទឹកចិត្ត និងមានអារម្មណ៍ធ្ងន់ក្នុងថង់ក្រពះ។ វាក៏បណ្ដាលឲ្យខូចមុខងារប្រឆាំងជាតិពុល ហើយបង្កការវិវត្តជាជំងឺរលាកថ្លើម។

ក្រៅពីនេះ ការផឹកស្រារាល់ថ្ងៃ បណ្ដាលឲ្យខូចមុខងារចម្រោះជាតិទឹក ដោយបណ្ដាលឲ្យខ្សោយជើង គេងមិនលក់ ចុះខ្សោយប្រព័ន្ធការពារ ងាប់ជាលិកាតម្រងនោម និងប៉ះពាល់ដល់ចង្វាក់បេះដូង។ ជាងនេះទៅទៀត វាបង្កើនលំហូរច្រើននៅក្នុងសរសៃឈាម ដែលបណ្ដាលឲ្យកើតជំងឺលើសឈាម ថប់ដង្ហើម និងជំងឺដាច់សរសៃឈាមខួរក្បាល។

ជាមួយគ្នានេះ វាបណ្ដាលឲ្យខូចមុខងារបំបែកអាហារ ហើយបង្កជាជំងឺរលាកលំពែង។ ការផឹកស្រារាល់ថ្ងៃ ក៏បណ្ដាលឲ្យខូចប្រព័ន្ធ Endocrine ផងដែរ ដោយក្នុងករណីប្រុសៗ វារារាំងការផលិតអ័រម៉ូនតេស្ដូស្ដេរ៉ូន បង្កការកកើតខ្លាញ់ក្បាលពោះ ត្រគាក និងចង្កេះ។ ចំណែកស្រីៗវិញ វាបណ្ដាលឲ្យខូចមុខងារអូវែ និងកើតគីស ហើយមិនអាចមានកូនបាន។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបលផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ផឹករាល់ថ្ងៃប៉ះពាល់អីអត់? បើប៉ះកម្រិតណាដែរ ហើយមានបញ្ហាអ្វីខ្លះ?